KINOBAḺIAN 41 - Alkitab Singog In Mongondow Masa In Tanaa

Ki Yusup noginsilang kon togoindop i datu in Mesir

¹ Naonda in doyowadon notaong noiduduimai, ki datu in Mesir sinumogoindop, kon sia sinimindog mako kon bingkí in Ongkag Nil.

² Indoianmai daḻíbí noitukat magí in sapi pitu inta totok nongoḷongó bo kuḻitnea in mopouḻi uḻinag, iḻumuai nongkon ongkag tatua bo mulai nokaan kon bonok kon bingkí in ongkag tatua.

³ Noiduduimai kon tua sapi mita ibanea noitukat doman mangoi; biag mita tatua nongorutuk, dongkadon kuḻit noibakut kon tuḷan. Sapi mita inta nongorutuk tatua sinimindog kon diug in sapi mita inta nongoḷongó, kon bingkí in ongkag tatua.

⁴ Onda intua sapi mita inta nongorutuk nokaanbí kon sapi mita inta nongoḷongó. Onda intua ki datu noibangondon nongkon siugnea tatua.

⁵ Sia in nosiug bui bo sinumogoindop doman bui. Kon bonu in togoindopnea tatua sia in nokoontong kon batoḷ in gandum pitu inta nomonu bo noḷutúdon mita nobiag kon simpungoinea.

⁶ Noiduduimai kon tua nobiag doman monik in batoḷ in gandum pitu ibanea, inta nokepa bo noḷaotdon sin inirup in tompot in pomukaan.

⁷ Bo batoḷ in gandum inta nokepa tatua noḻiom kon batoḷ in gandum pitu inta kobonu tatua. Onda intua ki datu noibangondon bo kinotaauanneadon kon sia in sinumogoindopdon.

⁸ Nobangon monik doḷo-doḷom moajardon totok in ginanea, tuamai sia nomarentadon nokioiní in bayongan mososihir bo intau mita inta mopandoi kon Mesir. Bodongka inoumannea in togoindopnea tatua kon i monia, táe diá tobatúmai in kon sigad monia tua motaau moginsilang kon mangaḻe in togoindopnea tatua.

⁹ Onda intua mopoposadia in oinumon i datu noguman kon i datu, “Singgai naa bobantungmu naa musti mongaku kon taḷáku.

¹⁰ Koḻipod ki Tuang datu in sinumorú kon mopoposadia in kaanon bo kon inakó, bo kami pinopobonu kon ponjara, kon baḷoi in moḷoḷukad kon komaḻig.

¹¹ Kon doḷom tobatú kaminda tumpaḷa sinumogoindop, bo togoindop naminda tua diábí notongkai in mangaḻenea.

¹² Tayowmobiag tobatú intau in Ibrani oyúon doman kon tua noyotakin nami. Sia oḻit in itoi in moḷoḷukad kon komaḻig tatua. Kaminda in nongonguman kon togoindop nami tua kon inia, bo pinotaauneadon in mangaḻe in togoindop naminda tatua.

¹³ Bo indoianmai onu in nobaḻí tua totokbí in notongkai ná inta ain pinogumannea, kainia: ki Tuang in buidon mopobui kon inakó bobantung naa mogaid kon oaidanku koḻipod, táe mobogoi in hukuman matoi kon intau inta mopoposadia in kaanon i Tuang tua.”

¹⁴ Dá ki datu in nomarenta nokioiní kon i Yusup, bo ḷagidon sia pinoḷuai nongkon ponjara tatua. Naonda in ki Yusup nongarugdon kon kumi bo nomaḷuidon kon ḷambung, bo sia in minayádon kon tayowon i datu.

¹⁵ Ki datu noguman kon inia, “Akuoi ain sinumogoindop, bo diá tobatúmai intau mokopoguman kon mangaḻenea. Bo oyúon in nopotaau kon inakó kon iko in motaau mopoguman kon inakó in mangaḻe in togoindopku tatua.”

¹⁶ Ki Yusup in notubag, “Deemanbí akuoi bobantung tanaa, Tuangku, táe ki Allahbí in moginsilang kon mangaḻe in togoindop i Tuang.”

¹⁷ Bo ki datu nosiritadon, “Akuoi in sinumogoindop, kon akuoi sinimindog mako kon bingkí in Ongkag Nil.

¹⁸ Bo iḷumuaibí magí nongkon ongkag tatua in sapi pitu inta mongoḷongó totok bo kuḻitnea mopouḻi-uḻinag, bo mulaidon mokaan kon bonok kon bingkí in ongkag tatua.

¹⁹ Noiduduimai kon tua noitukat domandon magí in sapi pitu ibanea, inta nongorutuk bo dongkadon kuḻit in noibakut kon tuḷan. Diápa dodai onda akuoi nokoontong kon sapi námai tua in kororomú in batangannea kon Mesir naa.

²⁰ Sapi mita inta nongorutuk tatua nokaanbí kon sapi mita pitu inta nongoḷongó koina.

²¹ Táe nokaan mako in sapi mita inta norutuk tatua umuranbí doman norutuk. Bo akuoi noibangondon kon siugku tatua.

²² Onda intua akuoi bui noḷoḷot bo sinumogoindop bui, kon akuoi nokoontong kon batoḷ in gandum pitu inta nomonu bo noḷutúdon mita, nobiag kon tobatú simpungoi.

²³ Bo nobiag domandon in batoḷ in gandum pitu inta nongo kepa bo noḷaot domandon sin iruponmai in tompot in pomukaan.

²⁴ Batoḷ in gandum inta nokepa tatua noḻiom kon inta kobonu koina. Aindon inoumanku in togoindopku tanaa kon mososihir mita, táe diá tobatúmai in motaau moginsilang kon mangaḻe in togoindopku tatua.”

²⁵ Bo ki Yusup noguman kon i datu, “Togoindop doyowa tatua notongkai in mangaḻenea; Ki Allah ain nopotaau kon i Tuangku onu in aidan-Nea.

²⁶ Sapi pitu inta noḷongó tatua in pitu notaong, bo batoḷ in gandum pitu inta kobonu tatua mangaḻenea in pitu doman notaong; notongkai in mangaḻe doyowa tatua.

²⁷ Sapi pitu inta norutuk tatua, inta noitukat noiduduimai, bo batoḷ in gandum pitu inta nokepa bo noḷaot in tompot pomukaan, tua in mangaḻenea sempo in malarat koonggotnea pitu notaong.

²⁸ Ná inta ain pinogumanku kon i Tuangku, kon ki Allah ain nopoontong kon i Tuangku onu in pomiaan-Nea.

²⁹ Pokotaaudon Tuangku, kon bonu in pitu notaong mobaḻí in sempo mosipun kon bungai in boyó inta mobarong totok kon bayongan butá in Mesir.

^30-31 Mopaḷut mako kon tua moiangoidon in sempo malarat pitu notaong in koonggotnea, bo sempo in bungai in boyó mobarong tatua in koḻiongandon, sin sempo in malarat tatua in totokbí in motoyang dapot in butá tanaa mobaḻídon moingkag totok.

³² Togoindop i Tuang tua kodua nobaḻí, tua in mangaḻenea kon soaḷ tatua aindon sinantú i Allah bo ḷagidon aidan i Allah intua.

³³ Tuamai, maníka ki Tuangku momiḻídon kon intau inta mopandoi bo mobijaksana bo mobogoi kon inia in kawasa sin monompia kon butá tanaa.

^34-35 Ki Tuangku in musti doman mogamá kon pogawai mita ibanea, bo mobogoi kon i monia in kawasa mosipun kon seperlima nongkon bayongan boyó in gandum kon bonu in pitu notaong kon sempo in posipunan kon bungai in boyó inta moḷoben totok tua, bodongka sipunon kon kotá mita bo poḷat ḷukadan.

³⁶ Gandum tatua in mobaḻí toibaḷun in kaanon kon bonu in pitu notaong kon sempo in malarat inta kon singgai moiduduimai kon Mesir. Takin natua rayat mita diábí matoi in gogoy.”

Ki Yusup binaḻí gubernur kon Mesir

³⁷ Ki Datu bo pogawainea noyopakat kon tomayá i Yusup tatua.

³⁸ Bo ki datu in noguman kon i monia, “Diá bidon kita mokouḻí kon intau ibanea inta ná ki Yusup naa, sin sia kinawasa in Roho i Allah.”

³⁹ Dá ki datu noguman kon i Yusup, “Ki Allah ain nopotaau in naa komintan kon inimu, dá nosimantagdon kon ikobí in mopando-pandoi bo mobija-bijaksana nongkon i inekadon.

⁴⁰ Iko in baḻíonku gubernur, bo bayongan rayatku in dumuduibí kon parentamu. Tongábí kawasaku tontaní in kon naa in moḷantu-ḷantud nongkon kawasamu.”

^41-42 Onda intua ki datu noḷongkut kon sising inta nongkon gongguyamúnea inta ukuran stempel in dodatuan, bodongka pinopoḷutud kon gongguyamú i Yusup poḷat noguman, “Nanaadon akuoi in mopobaḻí kon inimu gubernur kon bayongan butá in Mesir.” Noiduduimai kon tua pinopopakéneadon kon i Yusup in tobatú jubah inta momahaḷ bo moaḷus totok, bo pinopopakéannea domandon in boboḷ buḷawan.

⁴³ Bo inogoineadon kon i Yusup in kereta dodatuan inta induanea, bo pongawal kahoromatan i datu minaya-mayá kon muna in kereta tatua takin mobaḷu, “Pokoingat! Ogoiai in daḷan! Ogoiai in daḷan!” Natuata ki Yusup binaḻídon gubernur kon butá in Mesir.

⁴⁴ Guman i datu kon inia, “Akuoi naa in datu – bo akuoi mopotaau kon aka diá muna kotaauanmu yo diá tobatúmai in motaau mogaid kon onuka.”

^45-46 Bo ki Yusup in sinangoianneadon in tangoi in intau Mesir, ki Zapnat-Paaneah. Inogoiannea domandon in buḷoi inta tangoinea ki Asnat, ki adí i Potisaḷaka inta nobaḻí imang kon kotá in Heliopolis. Ki Yusup umur toḷu nopuḷú notaong dodai in sia nogaid kon tayowon i datu in Mesir. Dá nobuatdon in ki Yusup nongkon komaḻig i datu bo minayá noḻibu kon bayongan butá in Mesir.

⁴⁷ Kon bonu in pitu notaong butá totokdon in nobogoi in bungai in boyó inta mobarong totok.

⁴⁸ Gandum tatua sinipun i Yusup bodongka sinagúnea kon kotá mita. Kon pomuḷoi in kotá sia in motagú doman kon gandum boyó in gobá mita inta kon diugmai in kotá tatua.

⁴⁹ Gandum inta sinipun tua totokdon mobarong sahingga in diádon mokoiyap, sin kobayongnea nádon onda bo bungayon kon pintad.

⁵⁰ Kon dodai in diápa noiangoi sempo in malarat, ki Asnat ki buḷoi Yusup nopononggadídon in adí ḷoḷaki doyowa.

⁵¹ Guman i Yusup, “Pinoḻiongdon i Allah in bayongan rorigaku bo motoḷuadí i amáku.” Tuamai ki adínea inta muna sinangoiannea ki “Manasye”.

⁵² Sia in noguman doman, “Ki Allah ain nobogoi kon inakó in adí kon bonu in rorigaku,” bo sinangoianneadon ki adínea induanea tua ki “Epraim”.

⁵³ Pitu notaong sempo in pinosipunan kon bungai in boyó inta mobayong totok ain kinobayáan kon bonu in butá kon Mesir nopaḷutdon.

⁵⁴ Dá noitoḻiudon pitu notaong sempo in malarat, noyokaan totok ná inta ain pinotaau i Yusup. Kon bayongan tampat nobaḻídon in malarat, táe kon bayongan butá in Mesir nobarong in toibaḷun in kaanon.

⁵⁵ Kon dodai intau mita in Mesir momangkoidon momalarat, mosia namangoi noigum kon kaanon kon i datu. Bo ki datu in nopotabá kon i monia mayá kon i Yusup bo dumudui kon bayongan inta parentaan i Yusup kon i monia.

⁵⁶ Naonda in malarat tatua nodunggangdon totok in kororiganea bo noibaya-bayádon mako kon bayongan ḻipú, ki Yusup nomukatdon kon bayongan ontag bo nopotaḷui in gandum tatua kon intau in Mesir.

⁵⁷ Nongkon bayongan ḻipú kon dunia naa intau mita namangoi in Mesir sin motaḷui kon gandum nongkon i Yusup, sin malarat tatua totokdon in motoyang kon bayongan tampat.