KINOBAḺIAN 39 - Alkitab Singog In Mongondow Masa In Tanaa

Ki Yusup bo ki buḷoi Potipar

¹ Ki Yusup ain dinia in intau mita Ismael tatua kon Mesir, bo pinotaḷui kon i Potipar, tobatú porwira i datu inta nokadai kon jabatan saḷaku tongguḷu in moḷoḷukad kon komaḻig.

² Ki Tuhan notuḷung kon i Yusup dapot in sia umuran mokodungkuḷ kon inta mopia onukabí in aidannea. Sia in nogutun kon baḷoi i tuangnea, intau in Mesir tatua.

³ Inontong i Tuangnea kon ki Tuhan notuḷung kon i Yusup dá tuamai ki Yusup umuran mokodungkuḷ kon inta mopira onukabí in aidannea.

⁴ Nopia in gina i Potipar kon i Yusup, bo sia binaḻíneadon simpaḷnea; bo inogoianneadon in oaidan ki Yusup monompia kon baḷoi bo bayongan kapunyaannea.

⁵ Mulai sia inogoian kawasa mogurus kon baḷoi bo bayongan in kapunyaannea, ki Tuhan nomarakatdon kon baḷoi intau bo bayongan kapunyaan intau in Mesir tatua sin oaid i Yusup, pinomayá inta kon baḷoi ande inta kon gobá.

⁶ Bayongan onu inta kon i Potipar pinopopirisayadon kon i Yusup. Takin natua ki Potipar beresi bidon sia doí monotaau kon bayongan inta kon baḷoinea, koḻikudbí in soaḷ kaanonnea. Ki Yusup naa in moroton bo moḷunat totok.

⁷ Diá noonggot kon tua, ki buḷoi Potipar nomangkoidon nongibog kon i Yusup, bo tayowmobiag tatua inanutanneadon mosiug moyotakinnea.

⁸ Doí in ki Yusup bo sia in noguman kon i buḷoi Potipar, “Ampung, Nyora, ki tuang Potipar ain nopopirisaya in bayongan kapunyaannea kon inakó. Sia diá in bidon paraḷu momikir kon onuka in kon baḷoi tanaa.

⁹ Kon naa kawasaku notongkai in kawasanea. Diábí in tobatúmai diá pinopopirisayanea kon inakó koḻikudbí in ki Nyora. Yo naondabí in akuoi momia kon inta moraat natua bo mogaid kon dosa kon i Allah?”

¹⁰ Umpaka ki buḷoi Potipar umuran modondouḷug kon i Yusup pomuḷoi in singgai, táe tayowmobiag tatua in umuranbí doman doí mosiug takinnea.

¹¹ Kon singgai tobatú kon dodai in ki Yusup sinumuot kon baḷoi sin mogaid kon oaidannea, diá tobatúmai intau in kon tua.

¹² Ki buḷoi Potipar nokadai kon jubah i Yusup bo poḷatnea inugut bo noguman, “Igai mosiug moyotakin in kitada.” Ki Yusup in nomarow bo nokobuḻidon, bo poḷat in sia iḻumuai noḷagui, táe jubahnea kokada-kadaipa in bobay tatua.

¹³ Naonda in ki buḷoi Potipar nokoontong kon ki Yusup ain noḷagui bo jubahnea in kinotaḷáan,

¹⁴ sia nogoiní kon bobantungnea mita bo noguman, “Indoiaika! Intau in Ibrani inta dinia mangoi i buḷoiku kon baḷoi tanaa, nopohinamaidon kon inaton. Sia sinumuot in gopotku bo modomok kon inakó, táe kinumarak in akuoi.

¹⁵ Onda in dinongognea kon akuoi in kinumarak, sia noḷagui iḻumuai bo jubahnea in kinotaḷáan.”

¹⁶ Bo ki buḷoi Potipar notagú kon jubah tatua dapot in ki buḷoinea nobui kon baḷoi.

¹⁷ Naonda in ki buḷoinea nobui, sia in bayá-bayádon noguman kon i buḷoinea, kainia, “Intau Ibrani inta diniamu tua, sinumuot kon gopotku sin mopoyagi-yagimai kon inakó.

¹⁸ Táe naonda in akuoi kinumarak, sia in noḷagui iḻumuai bo jubahnea in kinotaḷáan.”

¹⁹ Ki Potipar sinumorúdon totok.

²⁰ Bo sia in nomarenta sinbá ki Yusup ḷagidon domokon bo popobonu kon ponjara, tampat pongongurungan kon datu mita.

²¹ Táe ki Tuhan notuḷung kon i Yusup bo umuran motabi kon inia, dapot in itoi in ponjara motabi kon inia.

²² Bayongan intau kon ponjara tatua pinoki indoineadon kon i Yusup, bo ki Yusupdon moindoi kon bayongan oaidan kon bonu in ponjara tatua.

²³ Itoi in ponjara tatua diá bidon umuran moindoimai kon onu inta ain pinoki aidnea kon i Yusup, sin ki Tuhan notuḷung kon inia dapot in bayongan inta aidannea umuranbí mobaḻí motompia.