KINOBAḺIAN 38 - Alkitab Singog In Mongondow Masa In Tanaa

Ki Yohuda bo ki Tamar

¹ Kon tungkuḷ intua ki Yohuda nonaḷámaidon kon i utatnea mita bo minayá nogutun takin i Hira, tobatú ḷoḷaki inta nongkon kotá in Adulam.

² Kon tua ki Yohuda noyobayat takin mongodeaga in Kanaan, ki Sua in tangoinea. Bo mosia in notonibuḷoi.

³ Ki adí monia muna in ḷoḷaki, sinangoian i amánea ki Er.

⁴ Adí induanea, ḷoḷaki doman, bo sinangoiannea ki Onan.

⁵ Adí intoḷunea ḷoḷaki doman, bo sinangoiannea ki Syela. Tungkuḷ in ki Syela pinononggadí ki Yohuda in kon Kezib.

⁶ Ki Yohuda nopotonibuḷoi kon i Er, ki adínea inta guya-guyang takin i Tamar.

⁷ Gogutú i Er moraat totok, dá ki Tuhan sinumorú bo nomatoi kon inia.

⁸ Bo ki Yohuda in noguman kon i Onan ki ai-ai Er, “Bayádon kon i baḷú i guya-guyangmu, bo potonibuḷoidon takinnea saḷaku toḻiu i guya-guyangmu bo pobogoidon in buí kon i guya-guyangmu.”

⁹ Táe kinotaauan i Onan kon aka oyúondon in adínea yo deemanbí sia in kitogi gadí kon tua mita. Dá, pomuḷoi in sia mosiugdon moyotakin i baḷú i guya-guyangnea tatua, tongá tantúnea ḷumbúon kon ḷuai in tubignea sinbá ki guya-guyangnea diá mokouḻí kon buí.

¹⁰ Gogutúnea tatua nokopomuká kon torú i Tuhan, bo ki Tuhan nomatoi doman kon inia.

¹¹ Noiduduimai kon tua ki Yohuda nogumandon kon i Tamar mototakanea tatua, “Pobuidon kon baḷoi in guyangamu bo pogutundon kon tua saḷaku mobobaḷu modapot in ki adíku ki Syela moitoidon.” Sia in noguman natua sin sia in moondok dikabo ki Syela gamáan domandon i Tuhan, ná ki guya-guyangnea doyowa. Dá nobuidon in ki Tamar kon baḷoi in guyanganea.

¹² Diá noonggot kon tua ki buḷoi Yohuda minatoi. Naonda in nopaḷut mako pinonusaan, ki Yohuda nonongganut kon i Hira, yobayatnea nongkon Adulam tua, minayá in Timna, tampat pinonggonsingan kon bubuḷ in dombanea mita.

¹³ Ki Tamar nokouḻí kon habar kon ki Yohuda ki nunutonnea tua mamangoi in Timna sin monggonsing kon bubuḷ in dombanea mita

¹⁴ Dá sia in nomaḷui kon pakeangnea nobaḷu takin pakeang ibanea. Pogotnea inoḻingoiannea, bo minayá in sia iḻimitú kon ngara in kotá Enaim, inta noiukat kon daḷan mopobayá in Timna. Kinotaauan totok i Tamar kon ki Syela, ki adí i Yohuda inta muit tua ain noḷoben, táe sia in diápa doman pinotonibuḷoi takin tayowmobiag tatua.

¹⁵ Naonda in ki Yohuda nokoontong kon i Tamar, kainia kamai bobay tatua in bobaybí sundaḷ, sin pogotnea inoḻingoiannea.

¹⁶ Bo ki Yohuda dinimiug kon inia kon bingkí in daḷan tatua, bo noḻibó, “Tongonu in igumonmu?” Diábí kinotaauannea kon bobay tatua in ki mototakaneabí tontaní. Ki Tamar in notubag, “Taaudon kon i Tuang.”

¹⁷ Ki Yohuda in noguman bui, “Ogoianku iko in bembé tobatú inta batáneapa.” Tubag i Tamar, “Motaaubí asaḷ oyúon in kantanganku modapot in ki Tuang mokidia mangoi in bembé tatua.”

¹⁸ “Onu in kokantangan tua?” ki Yohuda in noḻibó. Tubag i Tamar, “Ogoiaidon in akuoi stempel i Tuang takin togotnea bo tungkud doman inta kodia-dia i Tuang tanion.” Ki Yohuda nobogoi in barang mita tatua kon inia, bo mosia in nosiug noyotakin, bo ki Tamar sidiadon.

¹⁹ Ki Tamar nobui kon baḷoinea bo nobuká kon oḻingoi in pogotnea, bodongka nomaké bui in ḷambungnea saḷaku mobobaḷu.

²⁰ Noḻin onggotmai nongkon tua ki Yohuda nopotabá kon i Hira, yobayatnea, sin mogatod kon bembé bo mogamá bui kon barang mita inta ain inogoinea saḷaku kokantangan, táe ki Hira diá noyodungkuḷ in bobay tatua.

²¹ Ki Hira in noḻibó magí-mako kon intau mita kon Enaim, “Kon onda in bobay sundaḷ inta biasamai mogoḷat kon bingkí in daḷan tanaa?” “Diábí in bobay sundaḷ kon naa,” tubag monia.

²² Bo nobuidon in ki Hira kon i Yohuda bo noguman, “Diábí nouḻíku in bobay tatua. Podudui in katarangan intau diábí nokoimontanmai oyúon in bobay sundaḷ kon tua.”

²³ Ki Yohuda in noguman, “Pomayádon mako barang mita tatua kon iniadon, asaḷ bo kita in diá pokooyáanmai. Akuoi ain noramuji moguboḻi, táe diá nouḻímu in sia.”

²⁴ Degá toḷumai nobuḷan noiduduimai kon tua ki Yohuda nokouḻí kon habar kon ki Tamar mototakanea tatua sinumundaḷ bo sidiadon. Bo ki Yohuda nobogoi in parenta, “Gamádon in sia bo tubá dapot in matoi!”

²⁵ Koyogot in ki Tamar dinia iḻumuai, sia nokidia in koyow kon i Yohuda ki nunutonnea, kainia, “Akuoi aindon nobaḻí sidia nanaa sin aid in intau inta kitogi barang mita tanaa. Pirikisaka mongo ki ine in kitogi stempel takin togotnea tanaa bo tungkud tanaa.”

²⁶ Kinotaauan i Yohuda in barang mita tatua bo sia in noguman, “Bobay tatua diábí kotaḷá. Diádon inaidanku in onu inta patus aidanku kon inia; sabanarnea sia in mustibí popobuḷoiku kon i adíku ki Syela.” Bo ki Yohuda diá bidon dodai onda nosiug takin bobay tatua.

²⁷ Naonda in wakutuneadon ki Tamar mononggadí, indoianmai sia in mopononggadíbí in adí apang.

²⁸ Koyogot in sia mononggadí, tobatú adí mointok inta apang tatua nopoḷuaibí in ḻimanea, bo intau inta motuḷung kon pinononggadíannea tatua nopotogot in siningkoi nopura kon ḻimanea. Gumannea, “Adí tanaa in muna noilahir.”

²⁹ Táe adí mointok tatua bui nogugut kon ḻimanea, bo adí mointok inta tobatú in muna noilahir. Onda intua intau mototuḷung kon ponononggadían tatua noguman, “Dá natuabí in aidmu mondodak ḷumuai!” Dá adí inta noilahir muna tatua sinangoian ki Peres.

³⁰ Bain noiduduimai kon tua bo noilahirdon in ki ai-ainea inta ḻimanea sinogotandon in siningkoi nopura. Sia sinangoian ki Zerah.