KINOBAḺIAN 37 - Alkitab Singog In Mongondow Masa In Tanaa

Ki Yusup bo ki utatnea mita

¹ Ki Yakub in nogutundon notantú kon butá in Kanaan, tampat pinogutunan i amánea,

² bo naadon riwayat motoḷuadí i Yakub: Kon tungkuḷ in ki Yusup, ki adí i Yakub umur mopuḷú bo pitu notaong, sia in moḷukadmai kon paanan in bembé domba moyotakin i guya-guyangnea mita, inta ki adí mita i Bilha bo i Zilpa, ki buḷoi amánea inta bobantung. Sia in nopotaau kon oaid mita diá mopia i guya-guyangnea kon inia.

³ Tabi i Yakub kon i Yusup noiḻiu kon tabinea kon i adínea mita ibanea, sin ki Yusup in pinononggadí kon wakutu in ki amánea nogoguyangdon. Kon singgai tobatú ki Yusup pinogaidannea kon jubah tobatú inta totok in mogaga.

⁴ Naonda in ki guya-guyang mita i Yusup nokoontong kon ki Yusupbí in kotabi-tabi amá monia, noyaatdon in gina monia kon i Yusup, dapot in mosia doídon mongonguman tumompiamai takinnea.

⁵ Kon doḷom tobatú ki Yusup sinumogoindop, bo naonda inoumannea kon i guya-guyangnea in togoindopnea tatua, nodugangdon noyaat in gina monia kon inia.

⁶ Nanaa in guman i Yusup kon i monia, “Indongogaika!

⁷ Sinumogoindop in akuoi kon kuma kita komintan in kon gobá bo mobogotmai kon gandum, indoianmai gandumku in sinimindogbí monik. Onda intua bogotan mita in gandum monimu namangoi iḻimibu kon bogotan in gandumku bo nosumba kon bogotan in gandumku.”

⁸ “Kainimu kamai iko in mobaḻíbí datu bo kawasaanmu in kami?” guman i guya-guyangnea mita. Bo nodugangdon in yaat in gina monia kon inia popisí in togoindopnea mita bo popisí doman in onu inta siningognea.

⁹ Noiduduimai kon tua ki Yusup bui doman sinumogoindop, bo sia noguman kon i guya-guyangnea mita, “Akuoi in sinumogoindop bui, inontongku mata in singgai, buḷan bo tundi mopuḷú bomitá sinumungkud nosumba kon inakó.”

¹⁰ Togoindopnea tatua inoumannea doman kon i amánea, bo sinorúan i amánea in sia, kai amánea, “Togoindopbí onu in natua? Iraimumai akuoi, ki inámu bo ki utatmu mita in mamangoi bo tumungkud mosumba kon inimu?”

¹¹ Ki guya-guyang mita i Yusup nointoidon kon inia, táe ki amánea umuran moraimai kon togoindop tatua.

Ki Yusup pinotaḷui bo dinia kon Mesir

¹² Kon singgai tobatú kon dodai in ki guya-guyang mita i Yusup mayá in Sikhem sin moḷukad kon paanan bembé domba i amá monia,

¹³ ki Yakub in noguman kon i Yusup, “Bayápa iko in Sikhem, kon tampat pinoḷukadan i guya-guyangmu mita kon paanan bembé domba naton.” Tubag i Yusup, “Mobaḻí, Papa.”

¹⁴ Guman i amánea, “Indoiaipa in kaadaan i guya-guyangmu bo paanan in bembé domba, bo bui angoi potaau kon inakó.” Dá pinotabáneadon in ki Yusup minayá nonaḷámai kon Ḷopá in Hebron. Diá noonggot kon tua nodapotdon in ki Yusup kon Sikhem.

¹⁵ Kon dodai in ki Yusup minayá magí-mako kon tampat popokaanan in bobiagon, sia noyodungkuḷ in tobatú intau ḷoḷaki inta noḻibó kon inia, “Onu in tayakonmu?”

¹⁶ “Akuoi motayak kon i guya-guyangku mita. Mosia yogot moḷukad kon paanan in bembé domba,” tubag i Yusup, “Kinotaauan degá i amá kon onda in mosia tua?”

¹⁷ Tubag in intau tatua, “Mosia in nomampingdon nongkon naa. Dinongogku mosia in noguman kon mosia in mopobayá in Dotan.” Bo nobuatdon in ki Yusup nomatuk kon i guya-guyangnea mita bo nouḻíneadon in mosia kon Dotan.

¹⁸ Nongkon moyayúpa inontongdon monia in ki Yusup, bo kon dodai in sia diápa nodapot kon i monia, mosia in noyosingogdon kon moḻimod kon inia.

¹⁹ Mosia nosigumanan tobatú bo tobatú, “Indoiaika, ki totumogoindop tatua nion taya-tayamangoi.

²⁰ Igai ḻimodon naton in sia bo awaknea ḷabúon naton kon bonu in parigí inta noingkag. Bain poguman naton kon sia in dinomok in mahaḷuk inta mokokaan kon intau. Bain indoian naton onu in mobaḻí soaḷ togoindopnea mita tatua.”

²¹ Ki Ruben nokodongog kon tomayá monia tatua, dá sia in moramuji moposaḷamat kon i Yusup. “Dika ḻimodon in sia,” gumannea.

²² “Bonuondon naton in sia kon parigí kon padang gurun tanaa, táe donaai bongkugon ande donaai tompaḻían naton in sia.” Tua in pinogumannea sin sia monomayá moposaḷamat kon i Yusup bo mopotabá bui mayá in baḷoi amánea.

²³ Naonda in ki Yusup noyaput kon i guya-guyangnea, takin sampuradu in mosia noḷongkut kon jubah i Yusup inta totuu mogaga tua.

²⁴ Bodongka pinobonu monia in sia kon parigí inta noingkag.

²⁵ Kon tungkuḷ in mosia koyogot mongaan, indoianmai noitaḻibdon in kapilah intau in Ismael, intau tatua kon binayáan nongkon Gilead mopobayá in Mesir. Unta mita monia nodatog kon pododungú mita, balsam bo taḷong.

²⁶ Bo ki Yohuda in noguman kon i utatnea mita, “Onubí in mangaḻenea kita moḻimod kon i ai-ai naton bodongka mobuni kon tua?

²⁷ Igai bá potaḷuidon naton in sia kon intau in Ismael tatua. Dikadon rorigaan naton in sia. Naondaka in sia táe ki ai-aibí doman naton tontaní in sia.” Ki utatnea mita noyopakatdon kon tosingogon tatua,

²⁸ bo naonda in tongonumai intau in Midian mododagang noitaḻib, ki Yusup pinoḷuaidon i guya-guyangnea mita nongkon bonu in parigí tatua bo pinotaḷui kon intau Ismael tatua, boḻinea in doyowa nopuḷú in doit saḷaka. Onda intua ki Yusup diniadon in podagang mita tatua minayá in Mesir.

²⁹ Naonda in ki Ruben minayádon bui in parigí tatua bo diádon inontongnea in ki Yusup kon tua, binerakneadon in ḷambungnea, sin norobonoḷ in ginanea.

³⁰ Sia in minayá kon i utatnea mita bo noguman, “Diá bidon kon tua in adí tatua! Onu in pomiaanku in tanaa?”

³¹ Bo mosia in noratá kon bembé tobatú bo jubah i Yusup pinoḷodok monia kon dugú in bembé tatua.

³² Onda intua jubah tatua pinoki atod monia kon i amá monia takin koyow, “Jubah tanaa nouḻí nami. Pirikisaka mongo jubah i adí i Papa in naa?”

³³ Kinotaauan i Yakub in jubah tatua, bo sia in noguman, “Totuu, jubah i adíku in naa! Pasti sia dinomokdon in mahaḷuk mokokaan kon intau. Kaasí, ki adíku ki Yusup ain minatoi pinoguraat in mahaḷuk tatua!”

³⁴ Ki Yakub nomerak kon pakeangnea sin norobonoḷ totok in ginanea bo sia in nogiḷambung norondí. Pomuḷoi in singgai sia in mogamuimai mongombaḷ sin kinopatoian i adínea tatua.

³⁵ Bayongan i adínea, ḷoḷaki bo bobay namangoi nohibur bo nodondouḷug kon inia, táe sia in doí dondouḷugan, Gumannea, “Modapot in matoi umurankubí ombaḷan in sia.” Natuata in nobaḻí, ki Yakub umuran nongombaḷ sin ki Yusup ki adínea tatua.

³⁶ Kon dodai intua, kon Mesir, intau mita in Midian ain nopotaḷui kon i Yusup kon i Potipar, tobatú pogawai i datu inta pongawal Komaḻig.