KINOBAḺIAN 36 - Alkitab Singog In Mongondow Masa In Tanaa

Buí mita i Esau

¹ Naa in buí mita i Esau inta dinonoi doman ki Edom.

² Ki Esau nonika takin bobay intau in Kanaan toḷu: ki Ada, ki adí i Elon intau in Het; ki Oholibama, ki adí i Ana bo ki ompu i Zibeon intau in Hewi;

³ Ki Basmat, ki adí i Ismael nayadua i Nebayot.

⁴ Ki Ada in nopononggadí kon i Elipas, ki Basmat nopononggadí kon i Rehuel,

⁵ bo ki Oholibama in nopononggadí kon i Yeus, Yaelam bo ki Korah. Adí mita tatua noilahir kon butá in Kanaan.

⁶ Onda intua ki Esau nonaḷámai kon i Yakub bo minayá in butá ibanea nodia kon i buḷoinea mita, kon i adínea bo bayongan intau inta kon baḷoinea, takin bayongan bobiagon bo kapunyaan inta ain nouḻínea kon Kanaan.

⁷ Ki Esau in sinumontanídon kon i Yakub sin kapunyaan monia noiḻiudon antó dapot in mosia diádon motaau mogutun moyotakin. Apa doman butá inta iḻitúan monia tua in diá tugat popokaanan in bobiagon monia inta moantó totok tua.

⁸ Dá ki Esau inta dinonoi doman ki Edom, nogutundon notantú kon buḷud in Seir.

⁹ Naa in buí i Esau, mogoguyang intau in Edom.

^10-13 Ki buḷoi Esau inta ki Ada nopononggadí in tobatú adí ḷoḷaki, tangoinea ki Elipas. Bo ki Elipas kogadí kon adí ḷoḷaki ḻima, inta ki Téman, ki Omar, ki Zepo, ki Gaetam bo ki Kenas. Ki Elipas kobuḷoi doman kon bobantung, tangoinea ki Timna. Sia nopononggadí in adí ḷoḷaki, ki Amalek in tangoinea. Ki buḷoi i Esau inta ki Basmat nopononggadí in tobatú adí ḷoḷaki, tangoinea ki Rehuel. Bo ki Rehuel kogadí kon opat in adí ḷoḷaki, inta ki Nahat, ki Zera, ki Syama bo ki Miza.

¹⁴ Ki buḷoi i Esau inta ki Oholibama, inta ki adí i Ana ki ompu i Zibeon, nopononggadí in adí ḷoḷaki toḷu, inta ki Yeus, ki Yaelam bo ki Korah.

¹⁵ Naa in tongguḷu in suku mita buí i Esau: ki Elipas, ki adí guya-guyang i Esau, in nobaḻí mogoguyang in suku mita tanaa: Téman, Omar, Zepo, Kenas,

¹⁶ Korah, Gaetam bo Amalek. Mosia komintan buí i Ada, ki buḷoi i Esau.

¹⁷ Ki Rehuel, ki adí i Esau, in nobaḻí mogoguyang in suku mita tanaa: Nahat, Zerah, Syama bo Miza. Mosia komintan buí i Basmat, ki buḷoi i Esau.

¹⁸ Suku mita inta moiduduimai naa in buí i Esau nongkon i buḷoinea inta ki Oholibama ki adí i Ana, tuata in suku Yeus, Yaelam bo Korah.

¹⁹ Suku mita tatua buí i Esau.

Buí i Seir

^20-21 Intau mita inta nogutun kon Edom sinilai nobaḻí suku mita buí i Seir, intau in Hori. Suku mita tatua in: Lotan, Syobal, Zibeon, Ana, Disyon, Ezer bo Disyan.

²² Ki adí mita i Lotan in ki Hori bo Heman. (Ki Lotan kogutat kon bobay, tangoinea ki Timna.)

²³ Naa in ki adí mita i Syobal: Ki Alwan, ki Mahanat, ki Ebal, ki Syepo bo ki Onam.

²⁴ Ki Zibeon kogadí kon adí ḷoḷaki doyowa, ki Aya bo ki Ana. (Ki Ana naa inta nokouḻí kon bokaká mita in tubig mopatú kon padang gurun, kon tungkuḷ in sia koyogot mopokaan in keledai mita i amánea.)

^25-26 Ki Ana naa ki amá i Disyon, bo ki Disyon ki adínea in ki Hemdan, ki Esyban, ki Yitran bo ki Keran. Ki Ana kogadí doman kon adí bobay tobatú, tangoinea ki Oholibama.

²⁷ Naa in ki adí mita i Ezer: Ki Bilhan, ki Zaawan, bo ki Akan.

²⁸ Ki adí mita i Disyan in ki Us bo ki Aran.

^29-30 Naa in suku mita i Hori kon butá in Edom: ki Lotan, ki Syobal, ki Zibeon, ki Ana, ki Disyon, ki Ezer bo ki Disyan.

Datu mita in Edom

^31-39 Kon dodai in diápa in datu nomarenta kon Israel, datu mita inta noiduduimai tanaa nomarenta kon butá in Edom noyo-noyodudui: Ki Bela ki adí i Beor kon i Dinhaba. Ki Yobab ki adí i Zera nongkon i Bozra. Ki Husyam nongkon butá in Téman. Ki Hadad ki adí i Bedad nongkon Awit (sia tuata inta nonaḷow kon intau in Midian tungkuḷ in noparang kon butá in Moab). Ki Samla nongkon Masreka. Ki Saul nongkon Rehobot inta kon bingkí in ongkag. Ki Baal-Hanan ki adí i Akhbor. Ki Hadar nongkon Pahu (Tangoi buḷoinea in ki Mehetabeel, ki adí i Matred inta ki ompu i Mezahab).

^40-43 Ki Esau in nobaḻí mogoguyang in suku-suku Edom inta noiduduimai naa: Timna, Alwa, Yete, Oholibama, Ela, Pinon, Kenas, Téman, Mibzar, Magdiel, bo Iram. Pomuḷoi in suku nobogoi in tangoi kon butá pinogutunan monia tontaní.