KINOBAḺIAN 35 - Alkitab Singog In Mongondow Masa In Tanaa

Ki Yakub takin rombongannea minayá in Betel

¹ Kon singgai tobatú ki Allah in noguman kon i Yakub, “Akuoi naa in ki Allah inta nokipogontong kon inimu kon wakutu iko noḷagui kon i Esau, ki guya-guyangmu tua. Ḷagidon bayá in Betel. Pogutundon kon tua bo pogaidon kon mezbah tobatú kon i-Nakó.”

^2-3 Bo ki Yakub in noguman kon buḷoi, adí ginaḷumnea bo kon bayongan intau inta kotaki-takinnea, “Kita in mobuatdon nongkon naa bo mayá in Betel. Kon tua akuoi in moposindogdon in mezbah kon i Allah inta ain notuḷung kon inakó kon dodai in kinoantugan in roriga bo inta ain noḷukad kon inakó kon ondaka in binayáanku. Dá ḷumbúdon in patong dewa mita ibanea mako inta kodia-dia monimu; aidaidon in upacara pondaritan kon awak bo pakédon in pakeang inta modarit.”

⁴ Bo mosia in noposarakandon kon i Yakub in bayongan patong dewa ibanea mako inta kodia-dia monia bo nganti-nganting doman monia. Komintan barang mita tatua nodait iḷobong i Yakub kon siungon in pangkoi kayu moḷoben kon diug in kotá in Sikhem.

⁵ Kon tungkuḷ in ki Yakub bo rombongan buḷoi, adí bo ginaḷumnea nobuat, ki Allah nogoḻingoi kon intau mita inta kon kotá tatua, dapot in mosia diá nogaḷow kon i Yakub bo rombongannea.

⁶ Bo nodapotdon in mosia kon butá in Kanaan kon kotá in Betel inta koḻipod in tangoinea Lus.

⁷ Kon tua ki Yakub noposindog in mezbah bo sinangoiannea in tampat tatua “El-Betel”. sin ki Allah ain nokipogontong kon inia kon tua kon dodai in sia noḷagui kon i guya-guyangnea.

⁸ Kon tua doman ki Debora, tobatú moḷoḷukad kon i Ribka, minatoi bo iḷobong kon siungon pangkoi in kayu moḷoben inta kon dotá in toḷatan kotá tatua. Tuamai pangkoi in kayu tatua sinangoian “Pangkoi Moḷoben Pinongombaḷan”.

Ki Allah nomarakat kon i Yakub kon Betel

⁹ Naonda in ki Yakub nobui nongkon Mesopotamia, ki Allah bui nokipogontong kon inia bo nomarakat kon inia.

¹⁰ Guman i Allah kon inia, “Iko in diá bidon tangoion ki Yakub, táe tangoion bidon ki Israel.” Natuata in ki Allah noponangoi kon inia ki Israel.

¹¹ Bo ki Allah in noguman doman, “Akuoibí naa in ki Allah Inta Totok in Mokawasa. Pononggadí bo pononggompudon inta kobarongon! Nongkon inimu momukádon in bangusa mita bo mobaḻí mogoguyang in datu mita.

¹² Butá inta ain inogoi-Ku kon i Abraham bo kon i Ishak, in ogoi-Ku kon inimu bo kon buímu.”

¹³ Nopaḷut mako kon tua ki Allah nonaḷámaidon kon i Yakub.

¹⁴ Kon tampat ki Allah noguman kon i Yakub, pinosindogneadon in batu tompoingat tobatú. Bo kon batu tatua sia nobogoi in sosumba kon i Allah takin nopobutak in anggur bo ḷana zaitun kon tudunea.

¹⁵ Tampat tatua sinangoiannea “Betel”.

Ki Rahel minatoi

¹⁶ Nopaḷut mako kon tua ki Yakub bo rombongannea nonaḷámaidon kon Betel. Tungkuḷ in mosia noḻin yayúpa nongkon Eprata, noyaputdon in wakutunea ki Rahel mononggadí. Táe totokdon in mororiganea pononggadí in adí tatua.

¹⁷ Naonda in totokdon mororiganea in mogatong, mototuḷung kon pononggadían noguman kon inia, “Koropoton in ginamu, Rahel, ki adímu tanaa in ḷoḷaki doman bui.”

¹⁸ Táe ki Rahel diádon moonggot in matoi, bo naonda in sia mopobuitdon in tompot pangabisannea, sinangoiannea in adí tatua Ben-Oni táe ki amánea nonangoi kon inia ki Benyamin.

¹⁹ Naonda in ki Rahel minatoi, sia iḷobong kon bingkí in daḷan inta mopobayá in Eprata, inta masai naa sinangoian Betlehem.

²⁰ Ki Yakub noposindog in batu tompoingat tobatú kon tua, bo nodapotpabí in masai naa pinoḷobongan kon i Rahel tatua sinandaan in batu tatua.

²¹ Nopaḷut mako kon tua ki Yakub nongingguputdon kon bobayáannea, bo noposindog in ḷoḷaigannea kon tampat tobatú kon ḻimakomai in ḷangkeang Eder.

²² Kon tungkuḷ in mosia kon tampatpa tatua ki Ruben nosiugdon noyotakin i Bilha, ki buḷoi amánea inta bobantung tatua. Soaḷ tatua kinodongogan i Yakub, bo sia in totok sinumorú. Ki Yakub kogadí kon ḷoḷaki mopuḷú bodoyowá.

Ki adí mita i Yakub

²³ Ki adí mita i Lea in ki Ruben (adí guya-guyang i Yakub), ki Simeon, ki Lewi, ki Yohuda, ki Isakhar bo ki Zebulon.

²⁴ Ki adí mita i Rahel in ki Yusup bo ki Benyamin.

²⁵ Ki adí mita i Bilha, bobantung i Rahel in ki Dan bo ki Naptali.

²⁶ Ki adí mita i Zilpa, bobantung i Lea in ki Gad bo ki Asyer. Adí mita tatua noilahir kon Mesopotamia.

Ki Ishak minatoi

²⁷ Bo noyaputdon in ki Yakub kon i Ishak ki amánea, kon tampat pinogutunannea kon Mamre kon diug in Hebron. (Koḻipod ki Abraham inta ki ḷakinea, nogutun doman kon tua).

^28-29 Kon tungkuḷ in umurnea totokdon in nogoguyang, mogatutdon bo waḷu nopuḷú notaong, ki Ishak minatoi bo iḷobongdon i Esau bo i Yakub inta ki adínea mita.