KINOBAḺIAN 32 - Alkitab Singog In Mongondow Masa In Tanaa

Ki Yakub nosadia moyodungkuḷ i Esau

¹ Ki Yakub nongingguputdon kon bobayáannea. Bo tongonumai in malaekat namangoi kon inia.

² Naonda in ki Yakub nokoontong kon i monia, sia in noguman, “Naa ḷoḷaigan i Allah,” tuamai sinangoiannea in tampat tatua Mahanaim.

³ Nopaḷut mako kon tua ki Yakub nopotabá kon tongonumai in totabá minayá inumuna kon inia minayá in butá Edom sin mokipodungkuḷ kon i Esau, ki guya-guyangnea.

⁴ Ki Yakub in noguman kon i monia, “Pogumandon nanaa kon i guya-guyangku ki Esau, ‘Akuoi ki Yakub, bobantungmu. Noonggotdon akuoi nogutun kon i Laban.

⁵ Tanaa akuoi ain nokouḻí kon sapi keledai, domba, bembé bo bobantung mita. Akuoi mopoyaput in habar kon i tuangku, takin moharap mako kotabimupa in akuoi.’ ”

⁶ Naonda in totabá mita tatua nobuidon mangoi kon i Yakub, mosia in noguman, “Kami ain minayá kon i Esau, ki guya-guyang i Tuang bo tanaa sia tayo-tayowdon mangoi sin motomu kon i Tuang. Sia in namangoi takin intaunea opat nogatut.”

⁷ Nokodongogmai kon tua ki Yakub totokdon inagían in ondok bo ḻia-ḻiaw in gina. Bo intau mita inta noyotakinnea in sinilaineadon doyowa nokolompok, ná tua doman in dombanea, bembénea sapi bo untanea.

⁸ Kon bonu in raiannea, “Aka ki Esau mamangoi bo monubu kon kolompó inta muna, dá kolompó induanea oyúonpa in wakutu moḷagui moposaḷamat in awak.”

⁹ Onda intua ki Yakub in nosambayang, “O Allah, inta sinumba i akiku ki Abraham, bo i amáku ki Ishak, indongogaipa in akuoi! Ki Tuhan ain nopotabá kon inakó mobui kon butáku bo kon ginaḷumku. Bo ki Tuhan nodandi kon monompia kon inakó.

¹⁰ Akuoi in diá patus motarima kon bayongan tabi bo kososatia inta ain pinoontong i Tuhan kon inakó. Naonda in akuoi nobuat iḷumoḷan kon Ongkag in Yordan, akuoi in diábí nodia kon onu bo onu koḻikudbí in tungkud. Tanaa akuoi in nobui mangoi takin nobaḻídon doyowa nokolompok tanaa.

¹¹ Akuoi in mopoigumdon totok, posaḷamatpa in akuoi nongkon i Esau ki guya-guyangku. Akuoi in moondok dikabo sia in mamangoi monubu bo moyopú kon i nami komintan, diá doman taḻibannea in bobay bo adí mita.

¹² Toropdon kon ki Tuhan tontaní ain nodandi monompia kon inakó kotompiaan bo mobogoi kon inakó in buí mobarong. Diá tobatúmai in mokoiap sin kobayongnea naonda bo bungaion kon pintad.”

^13-15 Naonda in nosiugpa kon tua in doḷom tua, ki Yakub nogamá kon tosilai in bobiagonnea mita sin ogoi kon i Esau saḷaku tombuinagnea. Tombuinag tatua in doyowa nogatut in bembé kobaayan, doyowa nopuḷú in bembé koḷakian, doyowa nogatut domba kobaayan, doyowa nopuḷú in domba koḷakian, toḷu nopuḷú in unta inta koyogotpa mopoteté bo takin doman ki adínea inta monetépa tua, opat nopuḷú in sapi kobaayan, mopuḷú in sapi koḷakian, doyowa nopuḷú in keledai kobaayan bo mopuḷú in keledai koḷakian.

¹⁶ Sinila-silainea in biag mita tatua nobaḻí tongonu nokolompok bodongka pinosarakannea kon bobantungnea. Gumannea kon i monia, “Bayádon umuna kon inakó, bo ḷukadaidon sinbá oyúon in sigad in kolompó tobatú bo kolompó ibanea.”

¹⁷ Ki Yakub nomarenta kon bobantung inta muna, “Aka ki guya-guyangku ki Esau moyodungkuḷmu, bo moḻibó, ‘Ki ine in ki tuangmu? Mayá in onda? Ki ine in kitogi bobiagon mita inta diniamu tanion?’

¹⁸ Dá tubagaidon nanaa, ‘Bobantungmu ki Yakub in kitogi. Sia nokidia in naa mobaḻí sosumbanea kon i Esau, ki tuangnea. Bobantungmu tontaní ki Yakub niondon tayo-tayow mangoi kon tumi nami.’ ”

^19-20 Kon bobantungnea nogindua, nogintoḷu bo bayongan intau inta pinoki kantangannea in bobiagon mita tatua, komintanbí notongkai in parentanea. Sin iraidon i Yakub kon sia in mokodondouḷugbí kon i Esau aka mobogoi in sosumba tatua, sahingga in aka moyodungkuḷdon, ampungandon i Esau in sia.

²¹ Dá tuamai sia in nokidiadon muna in sosumba tatua, yo sia tontaní nosiugpa in doḷom tua kon ḷoḷaigan.

Ki Yakub bo malaekat i Allah kon Pniel

²² Kon doḷom doman tua ki Yakub nobangon bo nodia kon i buḷoinea doyowa, bo kon buḷoinea doyowa inta bobantung bo ki adínea mopuḷú bomitá, iḷumoḷan kon Ongkag in Yabok.

²³ Naonda in nopoḷoḷan mako kon i monia, sia nobui bo nokidia in bayongan kapunyaannea kon ḷoḷan mako.

²⁴ Táe sia kon tuapa sia-sia mita. Bo namangoidon in tobatú ḷoḷaki noridomok takin i Yakub nodapot in modiug mobayag.

²⁵ Naonda in kinorasaanmai intau tatua kon sia in diábí mountung kon pinorodomokan tatua, dá pinangkánea in ki Yakub kon kayangnea, nodapot in kayangnea tatua noyoḷogit.

²⁶ Bo intau tatua in noguman, “Pomayádon mako akuoi mayá, sin mobayagdon in naa.” Ki Yakub in notubag, “Diábí pomayáku mako in ki Tuang tongá mayá mako natua, koḻikudbí in aka ki Tuang momarakatdon kon inakó.”

²⁷ “Ki ine in tangoimu?” intau tatua noḻibó. “Ki Yakub,” tubagnea.

²⁸ Intau tatua in noguman, “Tangoimu in deeman bidon ki Yakub. Iko noridomokdon takin i Allah bo takin intau, bo iko in nokountung; tuamai tangoimu in ki Israel bidon.”

²⁹ Ki Yakub in noguman, “Pogumandon tangoi Tuang.” Táe intau tatua notubag, “Diábí paraḷu iko moḻibó mongo ki ine in tangoiku!” Bo binarakatanneadon in ki Yakub.

³⁰ Onda intua ki Yakub noguman, “Akuoi ain noyodungkuḷ noyopogotmai i Allah, bo akuoi nobiagpa.” Tuamai tampat tatua sinangoiannea Pniel.

³¹ Kon dodai mata in singgai nomukádon, ki Yakub nonaḷámaidon kon Pniel, bo bobayánea in nododengkódon sin kayangnea in noyoḷogit.

³² Nodapot in masai naa buí in Israel diá mokaan kon tapú inta moikoḷob kon tuḷan in kayang biag, sin ki Yakub ain pinangká kon kayangnea.