KINOBAḺIAN 29 - Alkitab Singog In Mongondow Masa In Tanaa

Ki Yakub nodapot kon baḷoi Laban

¹ Ki Yakub nogingguput kon bobayánea bo minayá in butá inta kon dotá in pomukaan kon Kanaan.

² Bo daḻí in sia nokoontong kon parigí kon tua, bo kon diugneamai inumuḻid mako toḷu nopaanan in bembé domba inta biasamai poinumon kon tua. Parigí tatua sinaḷoban in batu moḷoben.

³ Aka komintan paanan in bembé bo domba moyosiondon kon tampat tatua, dá gombala mita in moḻitoidon kon batu tatua poposí, bodongka poinumon in biag mita tatua. Mopaḷut mako poinumon buidon taḷoban in gombala mita tatua in parigí tatua.

⁴ Bo ki Yakub in noḻibódon kon gombala mita inta kon tua, “Uḻe, Yobayat, nongkon onda in moiko naa?” “Nongkon Haran,” tubag monia.

⁵ Ki Yakub in noḻibó bui, “Kinotaauan monimu in ki Laban ki adí i Nahor?” “Kinotaauan,” tubag monia.

⁶ “Naonda in kaadaannea?” ki Yakub noḻibó bui. “Nosehatbí mako,” tubag monia. “Indoiai, tua in ki adínea bobay inta tangoinea ki Rahel. Namangoi in sia nodia kon paanan bembé domba i amánea.”

⁷ Guman i Yakub, “Singgai nobayagpa bo deemanpa wakutunea bembé domba potuoton kon ḷantung. Yo nongonu sin biag mita tatua in diábí poinumon monimu, bodongka pomayádon mako in mosia mokaan kon bonok?”

⁸ Tubag monia, “Kami motaau mopoinum in domba mita tatua aka komintan paanan domba ain noyosipun kon naa bo batu pinonaḷob in ḻitoiondon.”

⁹ Koyogotpa in ki Yakub nongongumanmai monia, ki Rahel namangoidon takin kodia-dia in paanan bembé dombanea.

¹⁰ Naonda in ki Yakub nokoontong kon i Rahel takin paanan in bobiagonnea tatua, ki Yakub minayádon in parigí tatua, bo noḻitoi kon batu taḷobnea kon sí-neamai bodongka nopoinum in bobiagon mita tatua.

¹¹ Onda intua sia nongayok kon i Rahel, bo nongombaḷ sin notabi in nokoontong.

¹² Gumannea kon i Rahel, “Akuoi ki adí i Ribka, ki utat i amámu.” Bo noribatukdon in ki Rahel nobui kon baḷoi amánea sin moguman kon soaḷ tatua kon i amánea.

¹³ Naonda in ki Laban nokodongog kon habar soaḷ ki Yakub, pokuadíonea tatua, noribatukdon in sia sin mayá mokipodungkuḷ. Ki Laban nonggakap kon i Yakub bo inayokannea, bodongka dinianea sinumuot kon baḷoi. Naonda in ki Yakub nongonguman kon bayongan kaadaannea kon i Laban,

¹⁴ Ki Laban in noguman, “Totuu, kon iko nion in ginaḷumku inta modagin totok.” Ki Yakub nogutun kon baḷoi tatua notompodon in tobuḷan.

Ki Yakub nogaid kon i Laban sinbá motaau motonibuḷoi i Rahel bo i Lea

¹⁵ Kon singgai tobatú ki Laban in noguman kon i Yakub, “Diábí mopia aka iko mogaid kon inakó takin diá uboḻian, tongá popisí in iko pokuadíonku. Tongonu in koibogmu ponondanku kon inimu?”

¹⁶ Ki Laban naa in kogadí kon mongodeaga doyowa; guya-guyang tangoinea ki Lea, bo ki ai-ainea tangoinea in ki Rahel.

¹⁷ Ki Lea matanea nopira, táe ki Rahel mogaga in awak bo pogotnea in moḷunat.

¹⁸ Ki Yakub in noibogdon kon i Rahel, tuamai sia noguman kon i Laban, “Akuoi in mogaid pitupa notaong aka ogoimu akuoi motonibuḷoi takin i Rahel.”

¹⁹ Guman i Laban, “Maníka sia in ogoiku kon inimu dika in ogoi kon intau ibanea; dá pogutundon kon naa.”

²⁰ Dá ki Yakub in nogaidon pitupa notaong in koonggotnea sinbá sia in motaau motonibuḷoi takin i Rahel, táe korasaannea pitu notaong tua in tongá inanggapnea naonda bo tongonumai nosinggai, sin popisí in ibognea totok kon i Rahel tua.

²¹ Nopaḷut mako intua ki Yakub in noguman kon i Laban, “Pitu notaong noitaḻibdon; dá ogoidon in akuoi motonibuḷoi takin i adímu.”

²² Ki Laban nomia kon rame ponikaan bo nogoiní kon bayongan intau kon kotá tatua.

²³ Táe kon doḷom tua, deemanbí ki Rahel táe ki Leabí in inatod i Laban kon i Yakub, bo ki Yakub in nosiugdon noyotakinnea. (

²⁴ Ki Laban nobogoi in bobantungnea bobay inta ki Zilpa in tangoinea kon i Lea, sin mobaḻí bobantungnea.)

²⁵ Bain nobangon monik bo kinotaauannea kon ki Leabí in pinobuḷoinea. Bo minayádon in ki Yakub kon tayowon i Laban bo noguman, “Nongonu sin pomiaanmubí nanaa in akuoi? Akuoi in nogaid sinbá motaau motonibuḷoi i Rahel? Nongonu sin inuboḷanmubí in akuoi?”

²⁶ Ki Laban notubag, “Podudui in adat kon naa, ai-ai in diábí motaau in muna pobuḷoion nongkon guya-guyang.

²⁷ Oḷatdon modapot in mopaḷut pesta ponikaan pitu nosinggai, bain ogoiku in ki Rahel kon inimu doman, asaḷ iko in moibogpa mogaid kon inakó pitu notaong bui in koonggotnea.”

²⁸ Ki Yakub noibog, bo naonda in rame tatua nopaḷut, ki Laban nobogoi kon inia notonibuḷoi takin i Rahel. (

²⁹ Ki Laban nobogoi in bobantungnea bobay ki Bilha kon i Rahel sin mobaḻí bobantungnea.)

³⁰ Ki Yakub nosiugdon noyotakin doman i Rahel, bo ki Rahelbí in kotabi tabinea nongkon i Lea. Onda intua sia nogaid pitupa doman notaong in koonggotnea.

Ki adí mita i Yakub

³¹ Naonda inontong i Tuhan kon ki Lea in diá totok kinotabi i Yakub ná tabinea kon i Rahel, dá binaḻídon i Tuhan sia bobay inta motaau mopononggadí in adí, táe ki Rahel in binaḻí-Nea bantó.

³² Ki Lea in sidiadon bo nopononggadídon in adí ḷoḷaki tobatú. Gumannea, “Ki Tuhan ain noindoi kon rorigaku, bo tanaa ki buḷoiku in motabidon kon inakó.” Bo sinangoianneadon in adí tatua ki Ruben.

³³ Ki Lea sidiadon bui bo nopononggadí bui in adí ḷoḷaki tobatú. Guman i Lea, “Ki Tuhan ain nobogoi bui in adí tanaa doman sin dinongog-Nea kon akuoi in diá kinotabi.” Bo sinangoianneadon in adí tatua ki Simeon.

³⁴ Ki Lea in buidon sidia bo nopononggadí bui in adí ḷoḷaki. Gumannea, “Tanaa ki buḷoiku modiugdon totok kon inakó sin akuoi ain nopononggadí in adí ḷoḷaki toḷu.” Bo sinangoianneadon ki adínea tatua ki Lewi.

³⁵ Onda intua ki Lea sidiadon bui bo nopononggadí in adí ḷoḷaki. Gumannea, “Tanaa mako akuoi in modayowdon kon i Tuhan.” Bo sinangoianneadon in adí tatua ki Yohuda. Nopaḷut mako kon tua ki Lea diádon nononggadí.