KINOBAḺIAN 28 - Alkitab Singog In Mongondow Masa In Tanaa

¹ Onda intua ki Ishak nogoiní kon i Yakub, bodongka nomarakat kon inia poḷat noguman, “Donaaidon iko motonibuḷoi takin bobay in Kanaan.

² Bayádon in Mesopotamia, kon motoḷuadí i Betuel, ki ḷakimu, bo potonibuḷoidon takin adí bobay i Laban, ki utat i inámu.

³ Poigumon mako ki Allah Inta Totok Mokawasa momarakat kon tonibuḷoimu bo mobogoi kon inimu in adí bo ompu inta mobarong, dapot in iko mobaḻídon bangusa inta mobarong!

⁴ Poigumon mako ki Tuhan momarakat kon inimu bo buímu naonda bo pinomomarakat-Nea kon i Abraham, bo igumon mako mobaḻí kapunyaanmu in butá inta iḻitúanmu mako tanaa, inta ain inogoi i Allah kon i Abraham!”

⁵ Natuata inaidan i Ishak kon tungkuḷ in sia nopotabádon kon i Ishak minayá in Mesopotamia, kon i Laban, ki adí i Betuel intau in Aram tua. Ki Laban naa in ki guya-guyang i Ribka inta ki iná i Yakub bo i Esau.

Ki Esau notonibuḷoi bui

⁶ Ki Esau in nokodongog kon ki Ishak ain nomarakat kon i Yakub bo nopotabádon kon inia minayá in Mesopotamia sin motayak kon buḷoi kon tua. Kinotaauannea doman kon tungkuḷ in ki Ishak nomarakat kon i Yakub, inimaḷowannea in ki Yakub motonibuḷoi takin bobay in Kanaan.

⁷ Kinotaauannea doman kon ki Yakub in dinumuduidon kon tosingogon i amá bo i inánea bo minayádon in Mesopotamia.

⁸ Dá kinotaauandon i Esau kon ki Ishak, ki amánea tua in doíbí kon bobay in Kanaan,

⁹ tuamai ki Esau minayádon kon i Ismael, ki adí i Abraham, bo notonibuḷoi takin ki adí i Ismael inta tangoinea ki Mahalat, ki adí i Nebayot.

Togoindop i Yakub kon Betel

¹⁰ Ki Yakub nonaḷámai kon Bersyeba bo minayá in Haran.

¹¹ Kon dodai in mata in singgai sinumoyopdon nodapotdon in sia kon tampat tobatú, bo nogogai in sia kon tua. Inumuḻid in sia sin mosiugdon; sia nonguḷun kon batu tobatú.

¹² Onda intua sia sinumogoindop kon sia in nokoontong kon tukad tobatú inta nongkon butá dapot in ḷangit bo malaekat mita moponik moponag kon tukad tatua.

¹³ Bo kon diugneamai sinimindogdon in ki Tuhan bo noguman, “Akuoi naa in ki Tuhan, Allah inta sinumba i Abraham bo i Ishak. Akuoi in mobogoi kon inimu bo kon buímu in butá tampat inta pinosiuganmu tanaa.

¹⁴ Buímu in nádon kobarong in ḷobud kon butá. Mosia in moginḷoben kon butá monia kon bayongan tampat, bo pongin inimu bo buímu, Akuoi in momarakat kon bayongan bangusa kon dunia.

¹⁵ Toropdon, Akuoi in motuḷung bo mogoḻiung kon inimu, kon ondaka in bayáanmu, bo Akuoi in modia kon inimu mobui mangoi kon butámu tanaa. Akuoi in diábí monaḷámai kon inimu modapot in aidan-Kudon bayongan inta ain pinodandi-Ku kon inimu.”

¹⁶ Bo ki Yakub in nobangondon nongkon pinosiugannea bo noguman, “Ki Tuhan oyúon kon naa, kon tampat tanaa, táe bain tanaa bo kinotaauanku!”

¹⁷ Sia inagíandon in ondok bo noguman, “Totokbí in mokoondok in tampat tanaa! Pastibí kon tanaa in baḷoi i Allah, ngara in soroga.”

¹⁸ Nobangon monik doḷo-doḷom, ki Yakub sinimindog, bo nogamá kon batu inta pinakénea pinonguḷunan bo pinosindognea nobaḻí tobatú tompoingat bodongka pinobutakneadon in ḷana zaitun kon tudu in batu tatua.

¹⁹ Tampat tatua sinangoiannea Betel. (Koḻipod tangoinea Lus.)

²⁰ Bo nongibotdon in ki Yakub, “Aka ki Tuhan motuḷung bo mogoḻiung kon inakó kon binayáan tanaa bo poḷat mobogoi kon inakó in kaanon bo pakeang

²¹ modapot in akuoi in mobuidon mangoi kon baḷoi amáku takin mosaḷamat, dá ki Tuhan in mobaḻí ki Allahku.

²² Bo akuoi in mobogoi kon i Tuhan mopuḷú noporsen nongkon bayongan in yagi-yagi inta inogoi i Tuhan kon inakó. Batu tompoingat inta pinosindogku tanaa in mobaḻí tampat posumbaan kon i Tuhan.”