KINOBAḺIAN 26 - Alkitab Singog In Mongondow Masa In Tanaa

Ki Ishak nogutun kon Gerar

¹ Kon butá tatua nomukádon bui in malarat ná inta nokoimontandon in nobaḻí kon dodai i Abraham. Ki Ishak in minayá kon tayowon i Abimelek, datu intau in Pilistin kon Gerar bo nopoigum sinbá ogoinea mogutun kon tua.

² Soaḷ tatua inaidannea sin ki Tuhan aindon nokipogontong kon inia bo noguman, “Dika mayá in Mesir; pogutundon kon butá tanaa, ná inta ain pinoguman-Ku kon inimu.

³ Akuoi in moḷukadbí bo momarakat kon inimu. Komintan butá tanaa in ogoi-Kubí kon inimu bo kon buímu. Intompodan-Kubí in dandi-Ku inta ain pinoguman-Ku kon i Abraham ki amámu.

⁴ Akuoi in mobogoibí kon inimu in adí bo ompu inta kobayongnea in naonda bo tundi kon ḷangit, bo butá mita kon naa daiton-Kubí ogoi kon i monia. Bayongan in bangusa kon dunia naa in mopoigumbí kon i-Nakó sinbá Akuoi momarakat kon i monia naonda Akuoi ain nomarakat kon buímu.

⁵ Akuoi in momarakatbí kon i monimu, sin ki Abraham ain dinumudui totu-totuu kon i-Nakó bo noḷukadon kon bayongan hukum bo parenta-Ku.”

⁶ Dá ki Ishak in nogutundon kon Gerar.

⁷ Naonda in intau mita kon tua noḻibó mongo ki ine in ki Ribka, ki Ishak noguman kon ki Ribka tua in ki ai-aineabí, deemanbí ki buḷoinea. Sin ki Ishak in moondok dika-dikabo intau mita kon tua moḻimod kon inia bo mogamá kon i Ribka inta moḷunat totok tatua.

⁸ Naonda in ki Ishak nogutun kon tua degá tongonumaidon nosinggai, kon singgai tobatú ki Datu Abimelek iḷumongow nongkon jandelanea, bo inontongnea in ki Ishak nongongayokanbí takin i Ribka.

⁹ Dá inoinínea in ki Ishak bo poḷat noguman, “Ki buḷoimu in bobay tatua, yo nongonu sin kainimu sia tua in ki ai-aimubí?” Tubag i Ishak, “Akuoi in norai, kon akuoi in ḻimodon aka pogumanku kon sia in ki buḷoiku.”

¹⁰ “Onudon in pinomiamu naa kon inami?” guman i Abimelek. “Totuubí mogampa-gampang in intauku tobatú mayá mosiug moyotakin i buḷoimu, bo aka tua in mobaḻí, yo ikodon in motanggung jawab kon taḷá nami tatua.”

¹¹ Bo ki Abimelek in nobogoidon in tompoingat kon bayongan in rayatnea nanaa, “Ki ine in moporupa-rupamai kon intau tanaa ande kon i buḷoinea, yo hukumonbí kopatoion.”

¹² Ki Ishak nonompinomuḷa kon butá tatua, bo taong tatua sia in nokouḻí kon bungai in boyó mogatut noguntuḷ nongkon onu inta pinomuḷanea, sin ki Tuhan nomarakat kon inia.

¹³ Kapunyaannea in kodugang-kodugangdon bo sia in nobaḻídon intau inta totok in nooyúon.

¹⁴ Intau mita in Pilistin nointoidon kon inia popisí in noantódon in bobantungnea takin domba bo sapinea.

¹⁵ Bo binumbunandon monia in bayongan parigí inta ain kinaḻi in bobantung mita i Abraham kon tungkuḷ in sia nobiagpa.

¹⁶ Onda intua ki Abimelek in noguman kon i Ishak, “Bayádon nongkon butá nami. Ikodon in mokawa-kawasa in kami.”

¹⁷ Dá ki Ishak in minayádon bo nogaid kon ḷoḷaigan kon Ḷopá in Gerar. Sia in nogutunpa kon tua.

¹⁸ Sia in bui nongaḻi kon parigí mita inta ain kinaḻi kon tungkuḷ i Abraham bo inta ain binumbunan in intau mita in Pilistin naonda in ki Abraham minatoidon. Parigí mita tatua in tantúbí sinontangoian in tangoi inta pinonangoi i amánea.

¹⁹ Bobantung mita i Ishak in nongaḻi kon parigí kon Ḷopá in Gerar tatua bo nokouḻí kon tubig inta totok mobarong.

²⁰ Táe gombala mita kon Gerar in nobobayowan takin gombala mita i Ishak. Guman monia, “Tubig tanaa kamibí in kitogi.” Tuamai parigí tatua sinangoian i Ishak “Bobayowan”.

²¹ Bobantung mita i Ishak nongaḻi bui kon parigí ibanea, dá bui doman nobaḻí in bobayowan soaḷ parigí tatua. Tuamai, parigí tatua sinangoian i Ishak “Sosaturuan”.

²² Onda intua sia in nomamping nongkon tua bo nongaḻi bui kon parigí intoḷunea. Aka tanaa diá bidon in bobayowan. Tuamai sinangoian i Ishak in parigí tatua “Kabebasan”. Kainia, “Tanaa ki Tuhan ain nobogoi in kabebasan kon inaton mogutun kon butá tanaa, bo kita in mobaḻídon mobiag motompia kon naa.”

²³ Onda intua ki Ishak nobuat bo noiyaput kon Bersyeba.

²⁴ Kon doḷom tua ki Tuhan nokipogontong kon inia bo noguman, “Akuoibí naa in ki Allah i amámu ki Abraham. Dika moondok; Akuoi in mogoḻiung kon inimu. Barakatan-Ku in iko bo ogoian-Ku iko in buí inta mobarong podudui in dandi-Ku kon bobantung-Ku ki Abraham.”

²⁵ Bo ki Ishak in noposindog in mezbah bo nosumba kon i Tuhan kon tampat tatua. Sia nomia kon ḷoḷaigan kon tua bo bobantungnea mita in nongaḻi kon parigí ibanea.

Dodandian i Ishak bo i Abimelek

²⁶ Kon singgai tobatú namangoidon in ki Abimelek nongkon Gerar, takin ki Ahuzat, mononongginanea, bo ki Pikhol, panglima in tontaranea, sin mokipodungkuḷ kon i Ishak.

²⁷ Dá ki Ishak in noḻibódon, “Nongonu sin moiko in namangoibí mokipodungkuḷ kon inakó in tanaa, bokaka koḻipod in sinaturu bo inuntun monimu in akuoi nongkon butá monimu?”

²⁸ Tubag monia, “Tanaa in kinotaauandon nami kon ki Tuhan nogoḻiung kon inimu bo kon bonu in raian nami maníka kita mogaid kon dodandian. Pongibotdon

²⁹ kon iko in diábí momia kon inta moraat kon inami, ná doman kami inta diábí dodai onda in momia kon inta moraat kon inimu. Kami in notabidon kon inimu bo nopomayádon mako kon inimu minayá takin saḷamat. Noniatadon kon inami kon ki Tuhan ain nomarakat kon inimu.”

³⁰ Onda intua ki Ishak nogoḷudon kon i monia, bo nongaan bo nonginumdon in mosia.

³¹ Nobangon monik doḷo-doḷom mosia in tumpaḷadon nopoyaput in tosingogon dandi monia takin itu-itum. Bo ki Ishak in nogumandon kon i monia kon mokopopiadon in kon daḷan bo noyogapídon in mosia saḷaku yobayat.

³² Kon singgai doman tatua bobantung mita i Ishak namangoi bo nopotaau kon inia soaḷ parigí inta ain kinaḻi monia. Guman monia, “Kami in nokouḻídon kon tubig.”

³³ Bo ki Ishak nonangoidon kon parigí tatua “Ibot”. Tuata in kinobobaḻí muna in kotá tatua sinangoian Bersyeba.

Ki buḷoi mita i Esau nongkon suku bangusa ango-angoi

³⁴ Tungkuḷ in ki Esau umurdon opat nopuḷú notaong, sia in nonika takin mongodeaga doyowa nongkon suku bangusa Het, tangoi monia ki Yudit ki adí i Beeri, bo ki Basmat ki adí i Elon.

³⁵ Bobay doyowa tatua in nokoposusamai kon kobiagan i Ishak bo i Ribka.