KINOBAḺIAN 25 - Alkitab Singog In Mongondow Masa In Tanaa

Buí i Abraham inta nongkon i Ketura

¹ Ki Abraham nonika bui takin bobay inta tangoinea ki Ketura.

² Ki buḷoinea tatua nopononggadí in adí mita inta naa in tangoi monia: ki Zimran, ki Yoksan, ki Medan, ki Midian, ki Isybak, bo ki Suah.

³ Ki Yoksan ki amá i Syeba bo i Dedan, bo buí i Dedan tuata in intau mita in Asyur, intau Letus, bo intau Leum.

⁴ Ki adí mita i Midian in ki Epa, Ki Eper, ki Henokh, ki Abida, bo ki Eldaa. Mosia tua komintan buí i Ketura.

⁵ Umpaka ki Abraham nopotonsilaidon in bayongan kapunyaannea kon i Ishak,

⁶ táe kon dodai in sia nobiagpa nobarongbí doman in tombuinag inogoinea kon i adínea mita inta nongkon i buḷoinea ibanea. Onda intua pinotabáneadon in ki adínea mita tatua nomamping kon butá inta kon dotá in pomukaan kon Kanaan, sinbá yumayú kon i Ishak ki adínea.

Ki Abraham minatoi bo iḷobong

^7-8 Ki Abraham in minatoi kon tungkuḷ in sia nogoguyangdon totok in umurnea, sin mogatutdon bo pitu nopuḷú boḻima notaong.

⁹ Sia in iḷobongdon i adínea mita, inta ki Ishak bo ki Ismael, kon Angob in Makhpela inta noiukat kon gobá kon dotá in pomukaan kon Mamre. Tungkuḷ intua gobá tatua gobábí i Epron ki adí i Zohar, intau in Het,

¹⁰ táe ain sinaḷui i Abraham nongkon intau in Het tatua. Ki Sara ki buḷoi i Abraham, iḷobong doman kon tua.

¹¹ Naonda in ki Abraham minatoi, ki Allah nomarakat kon i Ishak, ki adí i Abraham. Kon tungkuḷ intua ki Ishak nogutun kon diug in parigí inta sinangoian “Sia inta nonarukira kon inakó.”

Buí mita i Ismael

¹² Ki Ismael naa in ki adí i Abraham kon i Hagar, bobay in Mesir, bobantung i Sara tua.

^13-16 Ki Ismael kogadí kon mopuḷú bodoyowá inta tangoion kon naa podudui in kinololahir monia: Ki Nebayot, ki Kedar, ki Adbeel, ki Mibsam, ki Misyma, ki Duma, ki Masa, ki Hadad, ki Tema, ki Yetur, ki Napis bo ki Kedma. Adí mita tatua nobaḻí mogoguyang in mopuḷú doman bodoyowá nosuku bangusa, ḻipú bo ḷoḷaigan monia in sinangoian podudui in tangoi mita monia.

¹⁷ Ki Ismael in minatoi kon tungkuḷ in umurdon mogatut bo toḷu nopuḷú bopitu notaong.

¹⁸ Buínea in nogutun kon butá inta kon sigad in Hawila bo Syur kon dotá in Pomukaan kon Mesir mopobayá in Asyur. Mosia in nobiag noyotondí nongkon buí i Abraham inta ibanea.

Ki Esau bo ki Yakub

¹⁹ Naadon in riwayat i Ishak, ki adí i Abraham.

²⁰ Ki Ishak in umurdon opat nopuḷú notaong tungkuḷ in sia nonika takin i Ribka, ki adí i Laban, inta ki adí i Betuel, intau in Aram nongkon Mesopotamia.

²¹ Popisí in ki Ribka diá nokouḻí kon adí, dá ki Ishak nosambayang kon i Tuhan sin motuḷung kon i buḷoinea. Bo inindongogandon i Tuhan in sambayang i Ishak, nodapot in ki Ribka sidiadon.

²² Sia in nonogusian kon adí apang, bo kon tungkuḷ in adí mita tatua diápa pinononggadí, mosia in mosikondogan kon bonu in sian i inánea. Ki Ribka noguman, “Nongonu sin soaḷ tanaa mustibí mobaḻí kon inakó?” Bo sia nopoigum in totundú kon i Tuhan.

²³ Ki Tuhan noguman kon inia, “Doyowa nobangusa nion kon bonu in sianmu; iko mopononggadí in bangusa doyowa inta mososaturuan; ai-ai in moropo-ropot nongkon guya-guyang inta guya-guyang mobaḻí bobantung in ai-ai.”

²⁴ Nodapotdon in wakutu i Ribka mononggadí, bo sia nopononggadí in adí ḷoḷaki apang.

²⁵ Inta guya-guyang batangannea nopuya-puya bo kuḻitnea naonda bo jubah bobubuḷan. Tuamai sinangoian ki Esau.

²⁶ Kon tungkuḷ adí induanea pinononggadí, ḻimanea nokadai kon singkod i Esau. Tuamai in sia sinangoian ki Yakub. Ki Ishak in umurdon onom nopuḷú notaong tungkuḷ in ki adínea doyowa tatua pinononggadí.

Ki Esau nopotaḷui in haknea saḷaku adí guya-guyang

²⁷ Adí doyowa tatua koḷoben-koḷobendon. Ki Esau nobaḻí pemburu inta mokaḻet bo moibo-ibog mogutun kon kayuon, táe ki Yakub in dodianea moonow bo moibo-ibog mogutun mako kon baḷoi.

²⁸ Ki Esau in kotabi-tabi i Ishak, sin sia in moibog totok mokaan kon ponoyá inta moaḷap kon kayuon. Táe ki Yakub in kotabi-tabi i Ribka.

²⁹ Kon singgai tobatú tungkuḷ in ki Yakub yogot modungú kon kuyat berenebon, namangoidon in ki Esau nongkon tampat pinotayakannea kon biag in kayuon. Sia in ginogoi totok.

³⁰ Sia in noguman kon i Yakub, “Akuoi in gogoyon totok. Ogoiaipa in berenebon topiḻik tatua.” (Tuamai sia sinangoian Edom.)

³¹ Tubag i Yakub, “Motaau, asaḷ bo ogoimudon muna in hakmu saḷaku adí guya-guyang.”

³² Guman i Esau, “Onubí in mangaḻenea in hak tatua kon inakó. Akuoi in gogoyondon totok!”

³³ Guman doman bui i Yakub, “Pongibotdon muna kon ogoimudon in hakmu tatua kon inakó.” Dá nongibot domandon in ki Esau poḷat nobogoi in haknea tatua kon i Yakub.

³⁴ Onda intua ki Yakub nobogoidon in roti kon inia bo berenebon doman tatua. Ki Esau nongaan bo nonginum bodongka minayá. Natuata in ki Esau nonganggap kon diábí in mangaḻenea in hak saḷaku adí guya-guyang tua.