KINOBAḺIAN 24 - Alkitab Singog In Mongondow Masa In Tanaa

Ki Ishak pinotayakan kon Buḷoi

¹ Ki Abraham nogoguyangdon totok, bo totok doman binarakatan i Tuhan in sia onukadon in inaidannea.

² Kon singgai tobatú ki Abraham in nogumandon kon bobantungnea inta totok in guya-guyang, inta nonompia kon bayongan kapunyaannea, “Poukatdon in ḻimamu kon sigad in páaku.

³ Pongibotdon podoyon kon i Tuhan, Allah inta nongawasa kon ḷangit bo butá, kon iko in diábí motayak kon bobay inta pobuḷoion i Ishak ki adíku nongkon sigad in intau mita in Kanaan tanaa.

⁴ Iko in mustibí mayá bui kon tampat kinolahiranku sin motayak kon bobay pobuḷoionnea nongkon sigad in ginaḷumku.”

⁵ Bo noḻibódon in bobantungnea tatua, “Yo naonda aka bobay tatua doí monaḷámai kon baḷoinea bo doí doman dumudui kon inakó momangoi in butá tanaa? Yo umpaka degá ki adídon i Tuang in musti diaanku mayá kon butá inta pinogutunan i Tuang koḻipod?”

⁶ Táe ki Abraham in notubag, “Pokoingat! Donaaibí in iko kinodia-dianea kon i adíku mayá intua!

⁷ Ki Tuhan, Allah inta nongawasa kon ḷangit, aindon nodia kon inakó nongkon baḷoi i amáku bo nongkon butá in ginaḷumku, bo Sia ain nongibot kon inakó kon Sia in mobogoibí in butá tanaa kon buíku. Sia in mopotabábí doman in malaekat-Nea sin motuḷung kon inimu, sinbá iko in mokouḻí kon bobay tobatú kon tua sin baḻíon buḷoi i adíku.

⁸ Táe aka mongodeaga tatua bo doí dumudui kon inimu, dá iko in moipilatdon nongkon ibot tanaa. Naondaka in mobaḻí, táe donaaibí diaan in ki adí-ku tatua mayá intua.”

⁹ Onda intua bobantung tatua nopoukat in ḻimanea kon sigad in paa i Abraham ki Tuangnea tua, bo nongibot kon sia in mogaidbí kon onu inta pinoigum i Abraham tatua.

¹⁰ Bobantung tatua in nogamá kon unta mopuḷú takin noyagi-yagimai in barang inta koboḻi kapunyaan i tuangnea bo nobuat minayá in kotá tampat pinogutunan i Nahor kon tungkuḷ in nobiagpa; tampat tatua noiukat kon dotá in utuan Mesopotamia.

¹¹ Naonda in noyaput kon tua, pinopogogaineadon in unta mita tatua sinbá mogogaipa kon diug in tobatú parigí kon ḷuai in kotá. Singgai moḷoḷabungdon, bo tuadon in wakutunea bobay mita mamangoi in parigí tatua sin monangkob kon tubig.

¹² Bo bobantung tatua in nosambayang, “Tuhan, ki Allah i tuangku Abraham, tuḷungaidon sinbá onu in pinoki aid kon inakó kodapotankudon in singgai naa; kotabipa in ki tuangku ki Abraham.

¹³ Indoiaika, akuoi in sinimindog kon diug in parigí tanaa. Topilikpa bo mongodeaga mita nongkon kotá tanaa momangoi monangkob kon naa.

¹⁴ Akuoi in moguman kon intau tobatú nongkon sigad monia, ‘Tuḷungaipa bo poponagpa in tampat in tubigmu bo ogoiaipa akuoi in tubig inumonku.’ Aka tubagannea, ‘Ponginumdon, bo unta mita doman i amá in daitonku poinumon!’ Yo sia tuata inta piniḻí i Tuhan kon i Ishak bobantung-Mu tua. Aka ná tatua in mobaḻí, yo kotaauankudon kon ki Tuhan nonotabidon kon i tuangku Abraham.”

^15-16 Kon dodai in sia yogotpa mosambayang tua, ki Ribka, mongodeaga tobatú inta totok in moḷunat bo diápa doman dodai onda in nosiug takin ḷoḷaki, noiangoidon kon parigí tatua kodia-dia in buyung inta kopota-potaannea. Sia in ki adí i Betuel, guranganea in ki Nahor bo ki Milka; ki Nahor tua ki guya-guyang i Abraham. Ki Ribka minayá in parigí tatua bo nomonu kon buyungnea, bodongka nobui.

¹⁷ Bobantung i Abraham tatua in noribatuk bo dinimiug kon inia takin noguman, “Tuḷungaipa Uḻe, ogoiaipa akuoi in tubig inumon nongkon buyugmu tanion.”

¹⁸ Mongodeaga tatua in notubag, “Ponginumdon, Amá,” bo baḷúneadon pinopoponag in buyungnea tatua nongkon obaganea, bo takin kokada-kadainea in buyung tatua inogoianneadon nonginum in bobantung tatua.

¹⁹ Naonda in bobantung tatua nopaḷut nonginum; adí bobay tatua in noguman, “Akuoi in monangkobpa bui kon tubig sin poinum doman kon unta mita i amá, sinbá mosia in monginum doman modapot in moguḻí in yogang monia.”

²⁰ Onda intua iḻikataneadon binutak in tubig kon bonu in buyung tatua kon tampat pongonginuman in unta, bodongka bui in sia noribatuk minayá in parigí bo nonangkob kinobarong nodapot in bayongan unta nonginum dapot in noguḻí in rogang monia.

²¹ Dodai intua bobantung i Abraham umuran monarukiramai takin diábí noposingo-singog. Sia in moibog monotaau mongo baḻíondon i Tuhan bobayáannea bo oaidannea tatua kodapotan ande diá.

²² Naonda in unta nonginumdon dapot in nooropdon totok, bobantung i Abraham in nogamádon kon ḷambá mita buḷawan inta nongo mahaḷ, bodongka pinopopakénea kon ngiung in mongodeaga tatua. Bo kon poguḻingkitannea pinopoḷutudannea doman ḻingkit in buḷawan togapang.

²³ Bo Bobantung tatua in noguman, “Pogumanka mongo ki ine in ki amámu. Degá oyúon in tampat pogogaian nami kon baḷoinea?”

²⁴ “Ki amáku in ki Betuel, ki adí i Nahor bo i Milka,” tubag in mongodeaga tatua.

²⁵ “Kon baḷoi nami oyúonbí in posiugan i Amá bo nobarong doman in wawa pokaan kon bobiagon mita.”

²⁶ Dá dinumokódon in bobantung tatua nosumba kon i Tuhan.

²⁷ Gumannea, “Dinayo-dayowdon in ki Tuhan, ki Allah i tuangku Abraham. Ki Tuhan noniata kon mosatia bo motabi kon i tuangku Abraham. Dinia-Nea in akuoi baḷú noyodungkuḷ in ginaḷumnea.”

²⁸ Onda intua mongodeaga tatua in noribatuk minayá in baḷoi i inánea bo nongonguman kon bayongan inta ain nobaḻí tatua.

^29-30 Ki Ribka naa oyúon in ki guya-guyangnea inta tangoinea ki Laban. Sia in nokodongog kon ouman i ai-ainea soaḷ onu inta pinoguman in bobantung tatua. Sia in nokoontong doman kon ḷambá kon ngiung bo ḻingkit kon poguḻingkitan i ai-ainea tatua. Dá noribatuk iḻumuai kon baḷoi in ki Laban sin mayá mokipodungkuḷ kon bobantung i Abraham tatua inta simindogpa mako takin untanea kon diug in parigí.

³¹ Bo ki Laban noguman, “Ki Amá inta binarakatan i Tuhan! Donaai tongá kon ḷuai naa. Koḻigai mayá in baḷoi nami. Ki Amá aindon pinosadiaan nami kon posiugan, bo unta mita i Amá ain doman pinosadiaan nami kon ḷantungnea.”

³² Bo dinumuduidon in bobantung tatua poḷat sinumuot kon baḷoi. Ki Laban nopoponag in datog in unta mita tatua, bo poḷat nobogoi in wawa bo nopokaan kon mahaḷuk mita tatua. Nopaḷut mako kon tua nodia mangoi in sia kon tubig sin pondaritan in bobantung i Abraham tatua kon sioḷ takin intau mita inta noyotakinnea.

³³ Naonda in kaanon inoḷudon, bobantung tatua in noguman, “Akuoi in diápabí mongaan aka diápa potaauku muna in koyow inta diniaku naa.” Ki Laban in noguman, “Oumandon mangoi.”

³⁴ Bo nomangkoidon in bobantung i Abraham tatua nongonguman, gumannea, “Akuoi naa in bobantung i Abraham.

³⁵ Ki Tuhan in nomarakat totok kon i tuangku tua bo binaḻí-Nea nooyúon totok. Ki Tuhan ain nobogoi kon inia in paanan in domba, bembé, sapi, unta, keledai, bo saḷaka doman, buḷawan, takin doman bobantung ḷoḷaki bo bobay.

³⁶ Kon tungkuḷ in ki Sara ki buḷoi tuangku noguyangdon, sia nopononggadídon in adí ḷoḷaki tobatú, bo ki tuangku aindon nobogoi in bayongan kapunyaannea kon i adínea tatua.

³⁷ Ki Tuangku ain noigum sinbá akuoi in modandi takin mongibot sinbá dumudui kon parentanea. Gumannea, ‘Donaaidon potayakanmu in ki adíku kon buḷoi nongkon sigad in bobay mita kon butá in Kanaan tanaa,

³⁸ táe mustibí nongkon sigad in ginaḷumku, buí i amáku. Dá koḻikatdon bayá in ḻipú tatua.’

³⁹ Bo akuoi in noḻibó kon inia, ‘Yo naonda aka bobay tatua doí dumudui takinku?’

⁴⁰ Tubagnea, ‘Ki Tuhan inta umuran duduianku, in mopotabábí in malaekat-Nea sin motuḷung kon inimu sinbá onu inta pinoki aidku kon inimu kodapotanpa doman. Iko in mokodungkuḷbí kon bobay inta pobuḷoion i adíku nongkon sigad in ginaḷumku inta nongkon buí i amáku.

⁴¹ Tongá aka diá tarimaan monia iko, bain tua bo iko in moipilatdon nongkon ibotmu.’

⁴² Bo naonda in akuoi nodapot kon parigí koina, akuoi in nosambayang kon bonu in gina, ‘Tuhan, Allah i tuangku Abraham, poigumonku sinbá onu in pinoki aid i tuangku kon inakó yo kodapotankupa doman.

⁴³ Akuoi in tantúpabí simindog mako kon diug in parigí tanaa. Aka tobatú mongodeaga mamangoi sin monangkob kon tubig, yo akuoi in moigum kon inia kon tubig inumonku.

⁴⁴ Aka moibog in sia mobogoi intua, bo moibog doman in sia mobogoi in tubig kon untaku mita, dá sia tuata in igumon mako ogoi i Tuhan mobaḻí buḷoi i adí i tuangku tua.’

⁴⁵ Diápa akuoi nopaḷut nosambayang kon bonu in ginaku, namangoidon in ki Ribka nomotaan kon buyung bodongka nonangkob kon parigí tatua. Onda intua akuoi in noguman kon inia, ‘Tuḷungaipa ogoiai akuoi in tubig inumon.’

⁴⁶ Baya-bayánea bo pinopoponag in buyung tatua nongkon obaganea bo noguman, ‘Ponginumdon, bo unta mita i Amá in poinumonku doman.’ Bo nonginumdon in akuoi, nopaḷut mako untaku mita tatua pinoinumnea doman.

⁴⁷ Onda intua akuoi in noḻibó, ‘Ki ine in ki amámu?’ Bo sia in notubag, ‘Ki amáku ki Betuel, ki adí i Nahor bo i Milka.’ Bo pinopopakéankudon in ḷambá buḷawan kon ngiungnea bo iḷutudanku domandon in ḻingkit kon ḻimanea.

⁴⁸ Akuoi in dinumokó nosumba bo nodayow kon i Tuhan, Allah i tuangku Abraham. Sia in bayá-bayádon nodia kon inakó namangoi in naa, kon ginaḷum i tuangku, nodapot in akuoi bayá-bayádon noyodungkuḷ in mongodeaga sin potonibuḷoion kon i adínea.

⁴⁹ Tanaa, aka moiko motabi bo oyúonpa in tanggung jawab monimu kon inia saḷaku ginaḷum monimu, dá potaaudon kon inakó; tongá aka diá, dá potaaubí doman kon inakó, sinbá kotaauanku mongo onupa in aidanku.”

⁵⁰ Ki Laban bo ki Betuel in notubag, “Popisí in onu inta nobaḻí tanaa bo nongkon i Tuhanbí, dá kami in diábí motaau mogamá kon simpod in tosingogon.

⁵¹ Naa in ki Ribka; pomayádon mako bá sia in tumakindon kon i Amá bo mobaḻí ki buḷoi adí i tuangmu, ná inta pinoguman i Tuhan tontaní.”

⁵² Naonda in bobantung i Abraham tatua nokodongog kon singog monia natua, sia dinumokó nosumba kon i Tuhan.

⁵³ Bo sia nopoḷuai in pakeang, ḷambá saḷaka bo buḷawan, bo inogoi in tua komintan kon i Ribka. Ki guya-guyangnea bo ki inánea inogoiannea doman in tombuinag inta mongomahaḷ.

⁵⁴ Nopaḷut mako kon tua bobantung i Abraham bo intaunea mita nongaan bo nonginumdon, bo nosiugpa kon tua. Naonda in mosia nobangon nopoikoḷomai kon singgai, bobantung tatua in noguman, “Ogoidon akuoi mobui mayá kon i tuangku.”

⁵⁵ Táe ki guya-guyang bo ki iná i Ribka in noguman, “Pomayápa mako in ki Ribka mogutunpa moyotakin nami todiminggumai ande mopuḷúpa nosinggai, bain mopaḷut kon tua bo mayá in sia.”

⁵⁶ Táe bobantung tatua in noguman, “Donaaidon tahangon in akuoi. Ki Tuhan ain notuḷung kon inakó takin nopoyodungkuḷ kon onu inta sinayakku; ogoidon in akuoi mobui kon i tuangku.”

⁵⁷ Tubag monia, “Igai bá oiníon naton in ki Ribka bo poḻibóan.”

⁵⁸ Bo inoinídon monia in ki Ribka bo noḻibó, “Moibog degá iko tumakin kon intau tanaa?” Tubag in mongodeaga tatua, “Moibog in akuoi.”

^59-60 Dá inogoidon monia in ki Ribka minayá bo sinakinan in intau inta moḷoḷukadnea. Mosia in minayá noyotakin in bobantung i Abraham bo intaunea mita. Bo ki Ribka in binarakatan monia, nanaa, “Poigumon mako iko, Ribka mobaḻí ki iná in ribuan intau! Poigumon mako buímu monaḷow kon bayongan kotá mita in musungnea!”

⁶¹ Onda intua ki Ribka nonoinutdon takin mongodeaga monia inta batáneapa inta nobaḻí bobantungnea, bo sinumakoi kon unta bo minayá dinumudui kon bobantung i Abraham tatua.

⁶² Kon dodai intua ki Ishak aindon namangoi nongkon padang gurun, nongin parigí inta sinangoi “Sia inta nonarukira kon inakó” bo nogutun kon dotá in toḷatan Kanaan.

⁶³ Kon ḷoḷabungnea tobatú sia in iḻumuai kon ḷoḷaigannea sin mayá in gobánea, bo sia in nokoontong kon unta mita nopoangoi.

⁶⁴ Kon dodai in ki Ribka nokoontong kon i Ishak, noponag in sia nongkon untanea,

⁶⁵ bo noḻibó kon bobantung i Abraham tatua, “Ki ine in ḷoḷaki inta kon gobá tatua inta mopoangoi kon i naton?” “Sia tuata in ki tuangku,” tubag in bobantung tatua. Bo ki Ribka in nogamá kon aḷuangnea bo pinogoḻingoi kon pogotnea.

⁶⁶ Onda intua bobantung tatua nongongumandon kon i Ishak in bayongan inta ain inaidannea.

⁶⁷ Nopaḷut mako kon tua ki Ishak nodia kon i Ribka sinumuot kon ḷoḷaigan i Sara, ki inánea, bo sinonibuḷoineadon in ki Ribka. Ki Ishak motabi totok kon i Ribka; dá noḻipoidon in susa i Ishak popisí in kinopatoiandon i inánea.