KINOBAḺIAN 23 - Alkitab Singog In Mongondow Masa In Tanaa

Ki Sara minatoi bo ki Abraham notaḷui kon butá poḷobongan

¹ Naonda in ki Sara umurdon mogatut bo doyowa nopuḷú notaong,

² sia in minatoi kon Hebron kon butá in Kanaan. Norobonoḷ totok in gina i Abraham kinopatoian i buḷoinea tua, sia in nongombaḷ.

³ Nopaḷut mako kon tua ki Abraham nonaḷámai kon mayat i buḷoinea bo minayá kon intau mita in Het, inta nogutun kon butá kon tua. Sia in noguman,

⁴ “Akuoi naa in intau mokokiangoi inta nogutun kon yua-yuak i Utat mita; dá ogoipa in akuoi motaḷui kon butá sinbá oyúon in poḷobonganku kon i buḷoiku.”

⁵ Mosia notubag,

⁶ “Ki Tuang horomaton totok nami saḷaku itoi inta moropot kon sigad nami, dá ḷobongdon ki buḷoi Tuang kon poḷoḷobongan inta totok in mopira inta oyúon kon inami. Komintanbí nosanang in gina nami noposadia in poḷoḷobongan tatua kon i buḷoi Tuang.”

⁷ Onda intua sinumungkudon in ki Abraham kon tayowon monia,

⁸ bo noguman, “Aka tai Utat mita bo mosanangbí in gina dá akuoi moḷobongdon kon i buḷoiku kon naa, dá tuḷungaipa in akuoi poigumai kon i Epron, ki adí ḷoḷaki i Zohar,

⁹ sinbá ogoineadon taḷuionku in Angob in Makhpela inta noiukat kon bingkí in gobánea. Poigumdon bá potaḷuineadon tua kon inakó kon naa takin koonto-ontong i Utat mita. Boḻinea daitonkubí ogoi kotompodon, sinbá butá tatua in mobaḻídon kapunyaanku.”

¹⁰ Kon dodai intua ki Epron ḻimitú doman mako takin intau mita in Het kon pinoyodungkuḷan kon ngara moḷoben in kotá. Bo takin koonto-ontong in bayongan intau kon tua, sia in notubag,

¹¹ “Bangusakudon tontaní in nobaḻí sakusi kon gobá tatua takin angobnea in ogoiku sinbá ki Tuang motaau moḷobong kon i buḷoi Tuang kon tua.”

¹² Dá ki Abraham in sinumungkudon kon tayowon intau mita in Het tatua,

¹³ bo takin kodongo-dongog in bayongan intau, sia in noguman kon i Epron, “Akuoi in mopoigum, indongogaipa in akuoi. Akuoi in moibog motaḷui kon bayongan in gobá tatua. Tarimadon in doit tanaa, sinbá akuoi in moḷobongdon kon i buḷoiku kon tua.”

¹⁴ Ki Epron in notubag,

¹⁵ “Butá inta boḻinea tongá opat nogatut doit saḷaka–onubí in mangaḻenea intua kon i natonda? Ḷobongdon ki buḷoi tuang kon tua.”

¹⁶ Noibog in ki Abraham kon boḻi inta sinantúnea tatua. Sia in nogiapdon kon doit saḷaka inta pinoguman i Epron inta opat nogatut tatua, podudui in pogogiapan in intau mita mopopotaḷui. Bo inuboḻianneadon kon i Epron, takin koonto-ontong in bayongan intau in Het kon tua.

¹⁷ Natuata in ouman gobá i Epron inta kon Makhpela kon dotá in pomukaan kon Mamre, nobaḻí kapunyaan i Abraham. Butá tatua in gobá bo angobnea takin bayongan kayu inta ibanea nobaḻí sigadnea mita.

¹⁸ Butá tatua ináku in bayongan intau in Het inta oyúon kon pinoyodungkuḷan kon ngara moḷoben in kotá, kon tua in butádon i Abraham.

¹⁹ Nopaḷut mako kon tua ki Abraham noḷobongdon kon i Sara ki buḷoinea kon bonu in angob Makhpela kon butá in Kanaan.

²⁰ Natuata in gobá takin angobnea inta koina kapunyaan intau in Het, nobaḻídon kapunyaan i Abraham inta binaḻídon butá poḷoḷobongan.