KINOBAḺIAN 22 - Alkitab Singog In Mongondow Masa In Tanaa

Ki Allah nomarenta kon i Abraham moposumba kon i Ishak

¹ Diá noonggot kon tua, kotoindudui Abraham sinungkuḷan i Allah. Ki Allah in nogoiní, “Abraham!” Bo ki Abraham sinumubag, “Ya Tuhan.”

² Guman i Allah, “Bayádon kon butá in Moria takin ki Ishak, ki adímu tuḷong tua, inta totok in kinotabimu tua. Kon tua, kon buḷud tobatú inta tundúon-Ku kon inimu, posumbadon in ki adímu tatua kon i-Nakó mobaḻí kuruban inta tubáan.”

³ Nobangon monik doḷo-doḷompa, ki Abraham noniai kon kayu sin pakéon potubaan kon kuruban, kayu tatua sinogotnea mako bo pinopobaba kon keledainea. Sia in minayá takin i Ishak bo bobantungnea doyowa, mosia nopobayá in tampat inta pinoguman i Tuhan kon inia.

⁴ Kon singgai intoḷunea kon binayáan inontongdon i Abraham in tampat tatua nongkon moyayú.

⁵ Bo sia in noguman kon bobantungnea doyowa tatua, “Kon naadon kamunda takin keledai tanaa. Akuoi bo ki adíku in mayápa intua sin mosumba kon i Tuhan, buibí mamangoi in kami kon i namunda.”

⁶ Ki Abraham nopopotaan in kayu tatua kon obaga i Ishak, bo sia in nodia kon tosilad bo baga in tuḷú sin ponontuḷúan. Naonda in taya dua i adínea kon daḷan,

⁷ ki Ishak in noḻibó, “Papa!” Ki Abraham notubag, “Nongonu uḻeku?” Ki Ishak in noḻibó, “Kita ain nodia kon tuḷú bo kayu, táe ondabí in ki adí in domba inta pakéon kuruban tubáan tua?”

⁸ Ki Abraham in notubag, “Ki Allahbí in moposadia in tua.” Bo taya dua in nogingguputdon kon bobayáan.

⁹ Naonda in mosia nodapotdon kon tampat inta pinoguman i Allah kon i Abraham, sia in noposindog in mezbah tobatú bodongka nopotudu in kayu inta pakéon potubaan tatua. Nopaḷut mako kon tua sinogotneadon in ki adínea bo pinopouḻidnea kon tudu in mezbah tatua, kon tudu in kayu inta tubáan tatua.

¹⁰ Onda intua ginamáneadon in tosilad sin ponumbukdon kon i adínea.

¹¹ Táe malaekat i Tuhan in nokuuk kon inia nongkon ḷangit, “Abraham, Abraham!” Tubag i Abraham, “Ya, Tuhan!”

¹² “Donaai yoyigaanmu in adí tanion ande donaaidon yagi-yagionmai in sia,” guman tuhan pinongin malaekat tatua. “Tanaa in kinotaauan-Kudon kon iko in totokbí in mohoromat bo motoindudui kon i-Nakó, popisí in iko diábí nonolak in nobogoi kon i adímu tuḷong tua kon i-Nakó.”

¹³ Bo ki Abraham nobobui bo nokoontong kon domba koḷakian tobatú kon tumineamai, Tungoi in domba tatua noikarit kon singsing mita. Ki Abraham minayá nogamá kon domba tatua bo dongka pinosumbanea kon i Tuhan saḷaku kuruban sinubá nobaḻí toḻiu i adínea.

¹⁴ Tampat tatua sinangoian i Abraham “Ki Tuhan noposadia onu inta paraḷu”. Bo dapot in masai naa intau moguman “Kon tudu in buḷud-Nea ki Tuhan moposadia kon onu inta paraḷuon”.

¹⁵ Komintanpa doman nongkon ḷangit malaekat i Tuhan nokuuk kon i Abraham,

¹⁶ “Ki Tuhan noguman: Akuoi mongibot podoyon kon tangoi-Ku tontaní, sin iko ain nogaid kon soaḷ tanaa bo diábí nogindoí in moposumba kon i adímu tuḷong tua kon i-Nakó,

¹⁷ Akuoi mobogoi in barakat kobarongon totok kon inimu bo baḻíon-Ku in buímu moantó naonda bo tundi kon ḷangit bo ná kobayong in bungayon kon bingkí in dagat. Ki adí bo ki ompumu in monaḷowdon kon musung mita monia.

¹⁸ Bayongan in bangusa kon dunia naa in mopoigum kon i-Nakó sinbá Akuoi momarakat kon i monia ná Akuoi ain nomarakat kon buímu – sin iko ain dinumudui kon parenta-Ku.”

¹⁹ Nopaḷut mako kon tua ki Abraham buidon minayá nokipodungkuḷ kon bobantungnea doyowa tua, bo mosia minayádon in Bersyeba noyotakin, bo ki Abraham nogutundon kon tua.

Buí i Nahor

²⁰ Ki Abraham koguya-guyang kon ḷoḷaki inta tangoinea in ki Nahor. Naonda in onu inta nobaḻí kon Buḷud in Moria tatua, ki Abraham in nokodongog kon ki Milka, ki buḷoi i Nahor aindon waḷu in ki adínea ḷoḷaki, naa in tangoi monia:

²¹ ki Us inta guya-guyang; ki Bus, ki ai-ainea; ki Kemuel, inta kon singgai noiduduimai nobaḻí ki amá i Aram;

²² Ki Kesed, ki Hazo, ki Pildas, ki Yidlap, bo ki Betuel,

²³ inta nobaḻí ki amá i Ribka. Taya waḷu tuata in ki adí i Milka kon i Nahor, ki utat i Abraham.

²⁴ Ki Nahor in kobuḷoi kon bobantungnea inta tangoinea ki Reuma, ki buḷoinea tatua nopononggadí kon i Tebah, kon i Gaham, bo kon i Maakha.