KINOBAḺIAN 20 - Alkitab Singog In Mongondow Masa In Tanaa

Ki Abraham bo ki Abimelek

¹ Ki Abraham nomamping nongkon Mamre minayá kon dotá in toḷatan butá in Kanaan, bo nogutun kon sigad in Kades bo Syur. Diá noonggot noiduduimai kon tua, naonda in sia nogutun kon Gerar,

² sia in noguman kon ki Sara ki buḷoinea tua in ki ai-ainea. Tuamai ki Datu Abimelek inta nongkon Gerar nopotabá in totabánea sin modia mangoi kon i Sara poangoi kon inia.

³ Kon doḷom tobatú ki Allah nokipogontong kon i datu tatua kon bonu in togoindop, bo noguman, “Iko in matoi, popisí in ginamámudon in bobay tatua; sin sia ain bidon kobuḷoi.”

⁴ Táe ki Abimelek in diápabí noḻiai kon i Sara, dá datu tatua in noguman, “Tuhan, akuoi in diábí kotaḷá! Yo degá yopúondon i Tuhan in akuoi bo bangusaku?

⁵ Ki Abrahambí tontaní in noguman kon bobay tatua in ki ai-ainea, bo bobay tatua in noguman doman natua. Tua in pinomiakubí takin gina inta modarit, dá diábí in akuoi kotaḷá.”

⁶ Dá ki Allah in notubag kon bonu in togoindop tatua, “Totuu, kinotaauan-Kubí kon soaḷ tatua in inaidanmubí takin gina modarit. Tuamai Akuoi in nogimaḷowdon kon inimu bá diá momia kon dosa kon i-Nakó, bo diábí pomayá-Ku mako iko in moḻiai kon bobay tatua.

⁷ Táe tanaa, pobuidon in sia kon i buḷoinea. Ki buḷoinea in tobatúbí nabi, bo sambayangannea in iko sinbá diá matoi. Táe aka diá pobuimu in sia, yo pokotaaudon, iko bo bayongan rayatmu in matoi!”

⁸ Nobangon monik, doḷo-doḷom, ki Abimelek nogoiní kon bayongan pogawainea bo nopotaau kon i monia in bayongan inta nobaḻí tatua. Mosia komintan inangoian in ondok.

⁹ Nopaḷut mako kon tua ki Abimelek nogoiní kon i Abraham bo noḻibó “Onu inta ain pinomiamu kon inami? Onu in taḷáku kon inimu, dapot in pinopoangoimudon inta mokobodito kon inakó bo kon dodatuan ku? Totuu kon diábí patus iko in momia kon natua kon inakó.

¹⁰ Nongonu sin iko momiabí natua?”

¹¹ Ki Abraham in notubag, “Kon bonu in raianku, kon naa in diádon in intau inta motoguondok kon i Allah, dapot in akuoi patoiondon in intau inta moibog kon i buḷoiku.

¹² Bo totuubí kon sia tua in ki ai-aikubí. Kami in toamáan, táe noyoposi kon iná, bo kami in notonibuḷoi.

¹³ Dá tungkuḷ in ki Allah nopotabá kon inakó nonaḷámai kon baḷoi i amáku bo minaya-mayá mako kon butá mita inta diá kinotaauanku, akuoi in nogumandon kon i buḷoiku, ‘Poniatadon in kotoinduduimu kon inakó takin mopotaau kon bayongan intau kon akuoi naa in ki guya-guyangmubí.’ ”

¹⁴ Nopaḷut mako kon tua ki Abimelek nogatodon bui kon i Sara kon i Abraham, bo kon dodai intua sia in nobogoi doman in bobantungnea takin domba bo sapi mita.

¹⁵ Guman i datu tatua kon i Abraham, “Naadon in bayongan butáku; pogutundon kon ondaka in kinoibogmu.”

¹⁶ Bo sia in noguman kon i Sara, “Ki Guya-guyangmu inogoiankudon in doit saḷaka toribu inta mobaḻí bukti kon bayongan intau kon iko in totu-totuubí diá kotaḷá.”

^17-18 Binaḻí komintan i Tuhan bantó in bayongan bobay kon komaḻig i Abimelek pinopisí inta nobaḻí tatua kon i Sara, ki buḷoi i Abraham tatua. Bo ki Abraham in nosambayang kon i Allah, bo ki Allah nongundam bui kon i Abimelek, ki buḷoinea bo bobantungnea mita bobay, dá bobay mita tatua buidon nononggadí.