KINOBAḺIAN 2 - Alkitab Singog In Mongondow Masa In Tanaa

¹ Natuata in nobaḻí bo noḷapatdon in pinomaḻían kon dunia naa bo bayongan tombonunea.

² Kon singgai nogimpitu nodaitdon noḷapat i Allah in bayongan oaidan-Nea tatua, bo Sia in nogogaidon.

³ Dá binarakatandon i Allah in singgai nogimpitu tatua bo binaḻí-Neadon singgai husus, sin kon singgai tatuata ki Allah nogogai naonda in noginḷapat mako kon oaidan-Nea.

⁴ Tuata in ouman soaḷ pinomaḻían i Allah kon dunia naa takin tombonunea. Kon tungkuḷ in ki Tuhan nomaḻí kon dunia naa,

Taman Eden

⁵ diápabí in nobiag nion nonokat bo diápabí doman in pinomuḷa kon dunia naa, sin diápa pinopoponagan i Tuhan in uyan bo diápa doman in intau mononggobá kon butá tatua.

⁶ Táe oyúon in tubig inta ḷumuai nongkon butá bo momuntad kon tudu in butá tua.

⁷ Onda intua ki Tuhan Allah in nogamá kon butá bodongka pinomia-Nea in tobatú intau, bodongka pinopoirupan in tompot inta mobogoi in kobiagan, pinopoirup kon bonu in ngiungnea; dá nobiagdon intau tatua.

⁸ Noiduduimai kon tua ki Tuhan Allah nomia kon taman kon Eden, kon dotá in pomukaan, bo sinampat-Nea kon tua in intau inta ain pinomia-Nea tatua.

⁹ Ki Tuhan Allah in nopobiag in bayongan pangkoi in kayu inta mongogaga, inta mopomungai doman in ayop inta mopia. Kon yua-yuak in taman tatua nobiag domandon in kayu inta mobogoi in kobiagan bo pangkoi in kayu inta mobogoi in pongotahuan kon soaḷ inta mopia bo inta moraat.

¹⁰ Tubig tobatú in moiḻig nongkon Eden, momuntad kon taman tatua; bo nongkon tua tubig tatua nosilai opat notanga.

¹¹ Inta muna tangoinea in Pison; tubig tatua in moiḻig noḻibu kon butá in Hawila.

¹² Kon tua oyúon in buḷawan inta mopia bo taḷong mobondu inta mosaged mouḻí kon tampat ibanea takin doman batu mita permata.

¹³ Tubig nogindua tangoinea in Gihon; tubignea in moiḻig noiḻibu kon butá in Kus.

¹⁴ Tubig nogintoḷu tangoinea in Tigris; tubig tanaa in moiḻig kon ḻimako in timur Asyur. Tubig noginggopat tangoinea in Eprat.

¹⁵ Onda intua sinampatdon i Tuhan Allah in intau tatua kon taman Eden sin monompia bo moḷukad kon taman tatua.

¹⁶ Ki Tuhan in noguman kon intau tatua, “Iko in motaaubí in mokaan kon bungai mita in pangkoi ayop kon taman tanaa,

¹⁷ koḻikudbí in bungai pangkoi in kayu inta mobogoi in pongotahuan soaḷ inta mopia bo inta moraat. Bungainea diábí motaaumu kaanon; aka iko mokaan yo nopastibí kon matoi iko kon singgai doman tuata.”

¹⁸ Bo ki Tuhan Allah in noguman, “Diábí mopia intau aka mobiag tongá sia-sia mita. Pomiaan-Kudon kon yobayatnea inta motombuḷoi sinbá motaau motuḷung kon inia.”

¹⁹ Dá Sia in nogamá kon butá topiḻik bo nomia kon bayongan in mahaḷuk in toba bo mahaḷuk inta ḷumoḷayug. Onu inta pinomia-Nea tatua komintan dinia kon intau sinbá tontangoiannea. Tuata in kinobobaḻí in mahaḷuk mita kon toba bo inta ḷumoḷayug nokouḻí kon tangoi monia tontaní.

²⁰ Natuata in intau nonontangoi kon bayongan mahaḷuk inta kon toba bo inta ḷumoḷayug. Táe diá in tobatúmai kon sigad in mahaḷuk mita tatua in motaau baḻíon yobayat inta motombuḷoi motuḷung kon inia.

²¹ Bo pinopoḷoḷotdon totok i Tuhan Allah in intau tatua, bo noitongkaná in sia nosiug, ki Tuhan Allah in nogamá kon tuḷan gutuk tobatú nongkon awak in intau tatua, nopaḷut mako bui-Nea bo binonuan in tapú.

²² Nongkon gutuk tatua ki Tuhan nomia kon tobatú bobay, bodongka dinia-Nea kon intau tatua.

²³ Dá intau tatua in nogumandon nanaa, “Naa in sia, intau inta notongkaiku – tuḷan nongkon tuḷanku, bo tapú nongkon tapúku. Tangoianku in sia bobay, sin sia in ginamá nongkon ḷoḷaki.”

²⁴ Tuamain ḷoḷaki in musti monaḷámai kon i amá bo kon i inánea, bo motobatú takin i buḷoinea.

²⁵ Ḷoḷaki bo bobay tatua in nomilang táe diápabí mooyá in mosia.