KINOBAḺIAN 19 - Alkitab Singog In Mongondow Masa In Tanaa

Dosa in Sodom

¹ Naonda in nongkon i Abraham, malaekat doyowa tatua minayá in Sodom bo noyaput kon tua ain nodoḷomdon. Ki Lot ḻimitú mako kon ngara in kotá, bo naonda in nokoontong kon i monia, sinimindog in sia sin monontomu kon i monia. Bo dinumokódon in sia kon tayowon monia,

² bo noguman, “Tuang mita, akuoi in mopoigum kon bá mongandupa kon baḷoiku. Tai Tuang in motaau in mondaritdon kon sioḷ bo mogogaipa in doḷom naa kon baḷoiku, bain ikoḷom doḷo-doḷom bo mongingguput kon bobayáan.” Táe mosia in notubag, “Sukur moantó, kami in mogogaidon kon lapangan in kotá”.

³ Ki Lot in nopoigum totok, dá aher mako mosia in sinumuotdon noyotakin kon baḷoi Lot. Ki Lot in nogoḷudon kon kaanon inta totok in mopia in nanamnea bo nomia doman kon roti inta tugat kinaan monia, bo nongaandon in mosia.

⁴ Táe kon wakutu in mokokiangoi mita tatua mayádon mosiug, intau mita in Sodom namangoi nonubu kon baḷoi tatua. Bayongan in intau ḷoḷaki kon kotá tatua, pinomayá inta ain nogurang ande inta batáneapa, namangoibí komintan kon tua in mosia.

⁵ Mosia in nokuuk kon i Lot, bo poḷat noḻibó, “Kon onda in intau mita inta namangoi mosiug kon baḷoimu? Diadon poḷuai mangoi in mosia nion, bá aidanmai nami!”

⁶ Ki Lot iḻumuai nongkon baḷoinea, táe baḷoi in buineadon iḻingkopan.

⁷ Ki Lot in noguman kon intau mita in Sodom tatua, “Utat mita, poigumonku totok kon i monimu, donaaidon momia kon inta moraat ná tatua!

⁸ Ain kinotaauan monimu, kon akuoi in kogadí kon mongodeaga doyowa. Bain ogoiku in mosia kon i monimu bo aidaidon onu in kinoibog monimu aidan, táe poigumonku kon i monimu donaai rupa-rupaan monimu in mokokiangoi mita inta kon baḷoiku naa; sin hakkubí in moḷukad kon i monia.”

⁹ Táe intau mita in Sodom tatua in noguman kon i Lot, “Pomamping! Iko nion tongá mokokiangoi bo mogator kon i nami? Bayá intua! Aka diá, yo iko in bouton nami totok poḻiuon kon inayadua tua.” Bo inundudon monia in ki Lot bo poḷat binayá dinangatan monia in ḷoḻingkop.

¹⁰ Táe mokokiangoi doyowa tatua nopoḷuai in ḻima monia bo poḷat norambit kon i Lot bo pinotuot kon baḷoi, bodongka bui iḻingkopan in baḷoi.

¹¹ Intau mita inta kon ḷuai in baḷoi tatua binilogan monia komintan, nodapot in diádon nouḻí monia ngara in baḷoi tatua.

Ki Lot nonaḷámai kon Sodom

¹² Intau doyowa tatua in noguman kon i Lot, “Aka oyúon in ki adímu ḷoḷaki, ki adímu bobay, mototaka ande ginaḷum inta nogutun kon bonu in kotá tanaa, yo diádon in mosia ḷumuai nongkon kotá tanaa,

¹³ sin kotá tanaa in pagongondon nami. Ki Tuhan ain nokodongog kon onu mita inta pinonapud kon intau mita inta nogutun kon naa, bo kami ain pinotabá-Nea mangoi sin moyompat kon kotá in Sodom.”

¹⁴ Bo minayádon in ki Lot nokipodungkuḷ kon tayowmobiag doyowa inta nongantangdon kon i adínea doyowa, bo poḷat noguman, “Koḻikatdon ḷuai nongkon kotá tanaa, sin yompatondon i Tuhan.” Táe kai monia kamai tongábí mobobaḻitumbuyan in ki Lot.

¹⁵ Kon dodai in modiugdon mobayag, malaekat doyowa tatua totokdon in nondodak kon i Lot sinbá mobuatdon nongkon kotá tatua. “Koḻikatdon,” guman monia. “Bayádon nongkon naa takin ki buḷoimu bo ki adímu bobay doyowa, sinbá moiko in diá matoi aka kotá tanaa yompatondon.”

¹⁶ Mogagawang totok in ki Lot. Táe ki Tuhan in motabi kon inia; tuamai intau mokokiangoi doyowa tatua in nokapit kon i Lot takin ki buḷoinea bo ki adínea bobay doyowa tatua iḻumuai in kotá.

¹⁷ Naonda intua tobatú nongkon malaekat tatua in noguman, “Poḷaguidon, posaḷamatdon in nyawamu! Donaai mobobui kon tumi bo donaai mogogai kon ḷopá. Poḷaguidon bayá in buḷud, sinbá diá matoi in moiko!”

¹⁸ Táe ki Lot in notubag, “Kaasí ah, Tuang dikadon pokiḷaguian in kami mayá in buḷud.

¹⁹ Totuubí kon ki Tuang aindon totok notuḷung kon inakó bo noposaḷamat kon nyawaku. Táe buḷud tatua totuu moyayú; moondok in akuoi, dika-dikabo kobatukan in bodito tatua in akuoi bo matoi kon dodai in diápa moyaput in tampat tatua.

²⁰ Indoiai, kon tayowon tatua oyúon in kotá mointok inta diá totok noyayú. Potabádon in akuoi mayá intua sinbá mosaḷamat.”

²¹ Malaekat tatua in notubag, “Duduyanku in ibogmu, kotá mointok tatua in diábí yompaton.

²² Koḻikat, poḷaguidon! Sin diápabí akuoi momia kon onuka aka iko diápa moyaput kon tampat tatua.” Popisí in ki Lot nonangoi kon kotá mointok tatua, dá tuamai kotá tatua sinangoian Zoar.

Kinopokakan in Sodom bo Gomora

²³ Mata in singgai koyogotdon momuká tungkuḷ in ki Lot nodapotdon kon Zoar.

²⁴ Indoianmai daḻídon in ki Tuhan nopoonag in uyan balerang inta kodoko-dokot. Tua mita in noḷabú kon Sodom bo Gomora.

²⁵ Kotá doyowa tatua pinokak, ná doman tua in bayongan ḷopá bo bayongan mobobiag takin bayongan intau inta nogutun kon tua.

²⁶ Táe ki buḷoi Lot in nobobuibí ná tumi, dá sia in nobaḷui nobaḻí oigi simuton.

²⁷ Nopoikoḷomai kon singgai, doḷo-doḷompa, ki Abraham iḻimikat minayá in tampat inta sinindogannea kon tayowon i Tuhan koḷabung kon tungkuḷ in diápa nobaḻí intua.

²⁸ Sia in nobobui kon dotá in Sodom bo Gomora bo kon ḷopá mita, bo inontongnea in poyok in tuḷú inta nosipun nongkon butá tatua, naonda bo poyok nongkon doḷuong moḷoben.

²⁹ Natuata, tungkuḷ in ki Allah nomokak kon kotá mita tatua bo ḷopá inta pinogutunan i Lot, kinotoropan i Allah in ki Abraham bo sinuḷungan-Nea in ki Lot noḷagui.

Kinobobaḻí intau in Moab bo intau in Amon

³⁰ Pinopisí in ki Lot moondok in mogutun motantú kon Zoar, dá minayádon ná buḷud in sia takin ki adínea bobay doyowa tua, bo nogutun kon tua kon bonu in tobatú angob.

³¹ Ki adínea bobay inta guya-guyang noguman kon i ai-ainea, “Ki amá aindon nogurang, bo bayongan ḻipú tanaa diádon in ḷoḷaki inta motaau motonibuḷoi naton sinbá kita mokouḻípa kon adí.

³² Koḻigai bá poinumon naton in anggur ki amá dapot in moḷoḷangu, bodongka kita mosiug takinnea sinbá kita mokouḻípa kon adí.”

³³ Kon doḷom tua pinoinum monia in anggur in ki amá monia, bo adí guya-guyang in nosiug takin i amánea; táe ki amánea totokdon in noḷoḷangu nodapot in diádon kinotaauannea onu in nobaḻí doḷom tua.

³⁴ Nopoikoḷomai kon singgai, ki adínea guya-guyang noguman kon i ai-ainea, “Kogobíi akuoi ain nosiug takin i amá! Bain doḷom bo poinumon bui naton in ki amá dapot in moḷoḷangu bui. Bodongka iko mosiug takinnea. Bá kitada in tumpaḷadon mokouḻí kon adí.”

³⁵ Natuata in pinomia monia kon i Lot, pinoinum monia dapot in noḷoḷangu, bo ki adínea induanea in nosiug takinnea. Ki Lot noḷoḷangu totok dapot in diá kinotaauannea onu in nobaḻí.

³⁶ Bo sidiadon in ki adí i Lot doyowa tatua sin oaid i amá monia tontaní.

³⁷ Adí guya-guyang nopononggadí in adí ḷoḷaki inta sinangoiannea ki Moab. Sia in nobaḻí mogoguyang intau in Moab inta masai naa.

³⁸ Adí induanea nopononggadí doman in adí ḷoḷaki inta sinangoiannea ki Ben-Ami. Sia in nobaḻí mogoguyang in bangusa Amon inta masai naa.