KINOBAḺIAN 16 - Alkitab Singog In Mongondow Masa In Tanaa

Ki Hagar bo ki Ismael

¹ Ki Sarai, ki buḷoi Abram tatua, diápa doman nokouḻí kon adí. Táe sia in kobobantung tobatú inta mongodeaga in Mesir tangoinea in ki Hagar.

² Ki Sarai in noguman kon i Abram, “Akuoi naa in diádon ogoi Tuhan mononggadí. Tuamai, maníka iko in mosiugdon moyotakin in bobantungku tanaa, sin degá sia motaaupa mopononggadí in adí inta baḻíon ki adíku.” Dá dinuduian i Abram in singog i Sarai tatua.

³ Dá natua in nobaḻí, ki Sarai in nogamá kon i Hagar bo inogoi kon i Abram sin baḻíonnea buḷoi. Dodai intua ki Abram aindon mopuḷú notaong kon Kanaan.

⁴ Ki Abram in nosiugdon takin i Hagar, bo nobaḻídon sidia in bobay tatua. Táe naonda in kinotaauan i Hagar kon sia in sidiadon, sia in mokaḷakuangdon bo moningkuḻemaidon kon i Sarai.

⁵ Bo ki Sarai in noguman kon i Abram: “Inogoikudon in ki Hagar bobantungku tua kon inimu, tongá naonda in kinotaauannea kon sidia in sia, sia in moningkuḻemaidon kon inakó. Tua in taḷámudon. Poigumon mako ki Tuhan mobaḻídon hakim kon sigad inatonda.”

⁶ Tubag i Abram, “Mopia, sia tua in bobantungmu bo kon bonubí in kawasamu in sia; dá aidaidon onu in koibogmu.” Dá pinomiadon ibo-ibog i Sarai in ki Hagar, dapot in noḷaguidon in sia.

⁷ Malaekat i Tuhan namangoi nokipodungkuḷ kon i Hagar kon diug in bokaká kon padang gurun, kon daḷan mopobayá in padang gurun Sur.

⁸ Malaekat tatua in noguman, “Hagar, bobantung i Sarai, nongkon onda in iko bo mopobayá in onda?” Tubag i Hagar, “Akuoi in noḷagui kon i Sarai ki Tuangku.”

⁹ Malaekat tatua in noguman, “Buidon bayá kon inia bo pobantungdon kon inia.”

¹⁰ Bo malaekat tatua in bui noguman, “Akuoi in mobogoi kon inimu in adí bo ompu inta mobarong, dapot in diá tobatúmai intau mokoiyap kon i monia.

¹¹ Diádon moonggot bo iko in mopononggadí in adí ḷoḷaki tobatú; tangoiaidon in sia ki Ismael, sin dinongogdon i Tuhan in ombaḷmu.

¹² Táe ki adímu tua in mobiag naonda bo keledai kaḻig, sia in moḷawang kon intau, bo pomuḷoi in intau moḷawang kon inia. Sia in mobiagbí moitondí nongkon bayongan utat bo ginaḷumnea.”

¹³ Ki Hagar noḻibó kon bonu in ginanea, “Totuu degá kon akuoi aindon nokoontong kon i Allah inta notabi kon inakó?” Dá sia in nodonoi kon i Tuhan, inta ain nopoyaput in tosingogon kon inia, “Ki Allah Inta Nonotabi.”

¹⁴ Tuamai intau monangoi kon parigí inta kon sigad in Kades bo Bered tua, “Parigí i-Nia inta nobiag bo inta notabi kon inakó”.

¹⁵ Bo ki Hagar in nopononggadídon in adí ḷoḷaki tobatú, bo ki Abram ki amá in adí tatua nonangoi kon adí tatua ki Ismael.

¹⁶ Kon dodai intua ki Abram umurdon waḷu nopuḷú bo onom notaong.