KINOBAḺIAN 14 - Alkitab Singog In Mongondow Masa In Tanaa

Ki Abram notuḷung kon i Lot

¹ Datu opat: ki Amrapel nongkon Babilonia, ki Ariokh nongkon Elasar, ki Kedorlaomer nongkon Elam, bo ki Tideal nongkon Goyim

² moparang monayow kon datu ḻima ibanea: ki Bera nongkon Sodom, ki Birsya nongkon Gomora, ki Syinab nongkon Adma, ki Semeber nongkon Zeboim, bo datu nongkon Bela inta dinonoi doman ki Zoar.

³ Datu taya ḻima tatua in notobatú bo nosipun kon tontara monia kon Ḷopá in Sidim, inta masai naa sinangoi Laut Mati.

⁴ Kon bonu in mopuḷú bodoyowá notaong mosia in kinawasa i Datu Kedorlaomer, táe kon taong impuḷú botoḷú, mosia in nomarontak nonayow kon inia.

⁵ Kon bonu in taong impuḷú boopat, ki Kedorlaomer bo topotakinnea mita namangoi takin tontara monia bo nonaḷow kon intau in Repaim kon Asyterot-Karnaim, intau in Zuzim kon Ham, intau in Emim kon Syawe-Kiryataim,

⁶ bo intau in Hori kon buḷud in Edom, bo inaḷowan monia nodapot in El-Paran kon bingkí in padang gurun.

⁷ Nopaḷut mako kon tua intau mita inta nogaḷow tua nobuidon bui kon En-Mispat inta masai naa sinangoiandon Kades. Mosia in nopotungkud kon bayongan intau kon butá in Amalek poḷat nonaḷow kon intau in Amori inta nogutun kon Hazezon-Tamar.

⁸ Onda intua datu mita kon Sodom, Gomora, Adma, Zeboim bo Bela nogator kon tontara monia kon Ḷopá in Sidim bodongka noparang

⁹ nonayow kon datu mita inta nongkon Elam, Goyim, Babilonia, bo Elasar; dá, datu taya ḻima nonayow kon datu taya opat.

¹⁰ Ḷopá tatua nopuḻing in parigí aspal, bo naonda in datu mita nongkon Sodom bo Gomora noramuji noḷagui nongkon parang, mosia in noḷabú kon bonu in parigí mita tatua. Toḷu in datu ibanea nosaḷamat bo noḷagui nopobayá in buḷud.

¹¹ Datu taya opat inta nountung tua, nogagow kon bayongan in yagi-yagi kon Sodom bo Gomora, nodapot in bahan kokaanon mita, bodongka minayá.

¹² Ki Lot pokuadíon i Abram in nogutun doman kon Sodom, tuamai sia in noitakin doman dinia in musung takin bayongan kapunyaannea.

¹³ Táe intau tobatú inta nokoḷagui minayá nopotaau in bayongan inta nobaḻí tatua kon i Abram, intau Ibrani tatua. Ki Abram in nogutun kon diug in pangkoi mita in kayu karamat tampat pososumbaan kapunyaan i Mamre, intau in Amori. Ki Mamre bo ki utatnea mita, inta ki Eskol bo ki Aner in yobayat mita i Abram inta notobatúnea doman.

¹⁴ Naonda in kinodongogan i Abram kon pokuadíonnea tua kinodomokan, sinipunnea in bayongan intau inta kon bonu in ḷoḷaigannea, mosia inta mongopandoi moparang, kobayong monia tua in toḷu nogatut bo mopuḷú bowaḷu, bo dongka minayá nondudur kon datu taya opat tatua nodapot kon kotá in Dan.

¹⁵ Kon tua ki Abram nopoyosilai in intaunea mita kinolo-kolompó, bo dongka nonubu kon musung kon dodai in doḷom bo nonaḷow kon i monia. Sia in nogaḷow kon i monia nodapot kon Hoba kon dotá in utuan kotá in Damsyik.

¹⁶ Ki Abram bui nokoagow kon barang mita inta ain inagow in musung, ná doman tua in ki Lot takin bayongan in kapunyaannea, bo bobay mita takin intau mita ibanea inta dinakop monia.

Ki Melkisedek nomarakat kon i Abram

¹⁷ Naonda in nonaḷow mako kon i datu Kedorlaomer takin datu mita inta notobatú, ki Abram in nobuidon. Bo datu in Sodom minayá nonontomu kon inia kon Ḷopá in Syawe inta sinangoian doman Ḷopá in Datu.

¹⁸ Ki Melkisedek, datu in Salem inta nokadai doman kon oaidan in imang i Allah in Totok Moḷantud, nodia kon roti bo anggur sin ogoi kon i Abram,

¹⁹ Bo ki Melkisedek in nomarakat kon i Abram, kainia, “Poigumon mako ki Allah inta Totok in Moḷantud, inta ain nomaḻí kon ḷangit bo butá, momarakat kon i Abram!

²⁰ Dinayo-dayowdon in ki Allah Inta Totok in Moḷantud, inta ain nobogoi kon inimu in ropot dapot in nokountung nonayow kon musungmu.” Nopaḷut mako kon tua ki Abram nobogoi kon i Melkisedek in mopuḷú noporsen nongkon bayongan barang inta inagownea kon parang tatua inta ain dinianea mangoi.

²¹ Bo nogumandon ki datu in Sodom kon i Abram, “Gamádon in barang mita inta inagow tatua, táe poigumonku totok pobuidon mangoi kon inakó in intauku mita.”

²² Táe ki Abram in notubag, “Akuoi in mongibot kon tayowon i Tuhan, Allah inta Totok in Moḷantud, inta nomaḻí kon ḷangit bo butá,

²³ kon akuoi in diábí mogamá kon onukadon nongkon kapunyaanmu, nodapot in tongákabí siningkoi tougat ande tongáka topongkó tali in silop yo diábí. Sinbá iko diá motaau moguman kon ‘Akuoibí in nokopobaḻí kon i Abram nooyúon.’

²⁴ Akuoi in doíbí mogamá kon onu bo onu sin pakéonku tontaní. Akuoi in tongábí motarima kon onu inta ain pinaké in intauku mita. Táe pomayádon mako in yobayatku mita inta notobatú takinku tua, inta ki Aner, ki Eskol bo ki Mamre, mogamá kon silai monia.”