KINOBAḺIAN 11 - Alkitab Singog In Mongondow Masa In Tanaa

Ḷangkeang in Babel

¹ Dungkuḷmai, bangusa mita kon dunia naa tongábí tobatú in bahasanea bo pososingog monia in komintanbí notongkai.

² Naonda in mosia nopobayá kon dotá in pomukaan, mosia nodapotdon kon ḷopá tobatú kon Babilonia, bo nogutun notantú kon tua.

³ Mosia in nosigumanan tobatú bo tobatú, nanaa: “Igai, kita in mogaid kon tela bo tubáan naton dapot in motogat.” Natuata in mosia nogaid kon tela inta motaau pakéon kon bangunan, bo aspal in pakéon monia pongompit.

⁴ Guman monia, “Koḻigai in kita moposindog in kotá takin tobatú ḷangkeang inta ḻimonikannea modapot kon ḷangit, sinbá kita kotaauandon in bayongan dunia naa bo kita diá domandon moirarit kon dunia naa.”

⁵ Dá ki Tuhan namangoidon sin moindoi kon kotá bo ḷangkeang inta pinosindog in intau.

⁶ Bo ki Tuhan noguman, “Mosia naa in tobangusa bo tobahasaan doman, bo naa bagu pomangkoian in tomayá mita monia. Diádon moonggot bo mosia in mokomampudon momia kon onuka in kinoibog monia.

⁷ Maníka kita in momangoi bo mopotombauk in bahasa monia sinbá diádon mosia mosimangaḻean kon singog in tobatú bo tobatú.”

⁸ Natuata in aid i Tuhan noporarit kon i monia kon bonu in dunia naa. Bo nogogaidon in mosia noposindog in kotá tatua.

⁹ Manangka intua kotá tatua sinangoian Babel, sin kon tuata in ki Tuhan nopotombauk in bahasa in bayongan bangusa, bo nongkon tua mosia in pinorarit i Tuhan kon dunia naa.

Buí i Sem

¹⁰ Naadon in buí i Sem. Doyowa notaong nopaḷut mako kon ḷunud moḷoben, naonda in ki Sem umur mogatut notaong, sia in nokouḻí kon adí ḷoḷaki tobatú inta tangoinea in ki Arpakhsad.

¹¹ Onda intua sia in nobiagpa ḻima nogatut notaong, bo nokouḻípa in sia kon adí mita ibanea.

¹² Kon tungkuḷ in ki Arpakhsad umur toḷu nopuḷú bo ḻima notaong, nokouḻí in sia kon adí ḷoḷaki, tangoinea in ki Selah.

¹³ Naonda intua ki Arpakhsad nobiagpa opat nogatut bo toḷu notaong, bo nokouḻípa doman bui kon adí mita ibanea.

¹⁴ Kon tungkuḷ in ki Selah umur toḷu nopuḷú notaong, nokouḻí in sia kon adí ḷoḷaki, tangoinea in ki Eber.

¹⁵ Naonda intua ki Selah nobiagpa opatpa nogatut bo toḷu notaong bo nokouḻípa doman bui kon adí mita ibanea.

¹⁶ Kon tungkuḷ in ki Eber umur toḷu nopuḷú bo opat notaong, sia in nokouḻí kon adí ḷoḷaki, tangoinea in ki Peleg.

¹⁷ Onda intua ki Eber in nobiagpa opat nogatut bo toḷu nopuḷú notaong, bo nokouḻípa doman bui kon adí mita ibanea.

¹⁸ Kon tungkuḷ in ki Peleg umur toḷu nopuḷú notaong, sia in nokouḻí kon adí ḷoḷaki, tangoinea in ki Rehu.

¹⁹ Onda intua ki Peleg nobiagpa doyowa nogatut bo siow notaong, bo nokouḻípa doman bui kon adí mita ibanea.

²⁰ Kon tungkuḷ in ki Rehu umur toḷu nopuḷú bodoyowá notaong, sia nokouḻí kon adí ḷoḷaki, tangoinea in ki Serug.

²¹ Naonda intua ki Rehu nobiagpa doyowa nogatut bo pitu notaong bo nokouḻípa doman bui kon adí mita ibanea.

²² Kon tungkuḷ in ki Serug umur toḷu nopuḷú notaong, sia in nokouḻí kon adí ḷoḷaki, tangoinea in ki Nahor.

²³ Naonda intua ki Serug nobiagpa doyowa nogatut notaong bo nokouḻípa doman kon adí mita ibanea.

²⁴ Kon tungkuḷ in ki Nahor umur doyowa nopuḷú bo siow notaong, sia nokouḻí kon adí ḷoḷaki, tangoinea in ki Terah.

²⁵ Naonda intua ki Nahor nobiagpa mogatut bo mopuḷú bo siow notaong, bo nokouḻípa doman kon adí mita ibanea.

²⁶ Naonda in ki Terah umur pitu nopuḷú notaong, sia in nokouḻí kon adí ḷoḷaki taya toḷu: ki Abram, ki Nahor bo ki Haran.

Buí i Terah

²⁷ Naadon buí i Terah: Ki Terah ki amá i Abram, i Nahor bo i Haran. Ki Haran in kogadí kon adí ḷoḷaki, tangoinea in ki Lot.

²⁸ Ki Haran minatoi kon ḻipú kinolahirannea, tuata in Ur kon Babilonia, kon dodai in ki amánea nobiagpa.

²⁹ Ki Abram in notonibuḷoi takin i Sarai, bo ki Nahor notonibuḷoi takin i Milka ki adí bobay i Haran. Ki Haran kogadípa kon adí ḷoḷaki ibanea, tangoinea in ki Yiska.

³⁰ Táe ki Sarai in bantó.

³¹ Ki Terah in nonaḷámai kon kotá in Ur kon Babilonia noyotakin i Abram ki adínea, bo ki Lot ki ompunea, bo ki Sarai mototakanea bobay. Makusudnea mayá in butá in Kanaan. Táe naonda noyaputmai kon Haran, mosia nogutun notantú kon tua.

³² Bo kon tampat tatua doman ki Terah minatoi kon dodai in sia umur doyowa nogatut bo ḻima notaong.