KINOBAḺIAN 10 - Alkitab Singog In Mongondow Masa In Tanaa

Buí i adí mita i Nuh

¹ Naa in buí i adí mita i Nuh, inta ki Sem, ki Yapet bo ki Ham. Naonda in kinopaḷutan mako in ḷunud moḷoben, taya toḷu in nokouḻí kon adí mita ḷoḷaki.

² Ki adí mita i Yapet in ki Gomer, ki Magog, ki Madai, ki Yawan, ki Tubal, ki Mesekh bo ki Tiras.

³ Buí i Gomer in intau mita inta nogutun kon Askenas, kon Ripat bo kon Tagorma.

⁴ Buí i Yawan in intau mita inta nogutun kon butá in Elisa, Spanyol, Siprus bo kon Rodes.

⁵ Mosia tua in nobaḻí mogoguyang in bangusa mita inta nogutun kon bingkí mita in dagat bo inta kon ḻibuton mita. Tuata in bayongan buí i Yapet. Pomuḷoi in bangusa bo suku in nogutun kon butá monia tontaní, bo mosia komintanbí oyúon in bahasa tontaní.

⁶ Ki Adí mita i Ham in ki Kus, Mesir, Libia bo Kanaan.

⁷ Buí i Kus tua in intau mita inta nogutun kon Seba, Hawila, Sabta, Raema bo Sabtekha. Buí i Raema in intau mita inta nogutun kon butá in Syeba bo Dedan.

⁸ Ki Kus in kogadí kon adí ḷoḷaki tangoinea in ki Nimrod inta nobaḻí intau inta totok in moroton muna-munamai kon dunia.

⁹ Takin totuḷung i Tuhan sia in nobaḻí pemburu inta totok in motoyang. Tuamai in nobaḻí istiaḷ intau nanaa, “Poigumon mako ki Tuhan mopobaḻí kon inimu tobatú pemburu inta motoyang ná ki Nimrod.”

¹⁰ Kon dungkuḷ dodatuannea pinangkoi nongkon Babel, Erekh, bo Akad, toḷu tatua komintan kon Babilonia.

¹¹ Nongkon tua sia minayá in Asyur, bodongka noposindog in kotá Niniwe, Rehobot-Ir, Kalah

¹² bo Resen inta noiukat kon sigad in Niniwe bo Kalah. Tua komintan in kotábí mongoḷoben.

¹³ Buí i Mesir in intau mita inta nogutun kon Lidia, Anamim, Lehabim, Naptuhim,

¹⁴ Patrusim, Kasluhim, bo Kaptorim. Bangusa Kasluhim tua in nobaḻí mogoguyang in bangusa Pilistin.

¹⁵ Ki adí mita i Kanaan, in ki Sidon in guya-guyang, bo ki Het.

¹⁶ Kanaan naa in nobaḻí doman mogoguyang in bangusa Yebusi, Amori, Girgasi,

¹⁷ Intau in Hewi, Arki, Sini,

¹⁸ Arwadi, Semari bo Hamati. Suku mita in bangusa Kanaan tua in noibaya-bayádon mako nodapot in tampat mita moyayú,

¹⁹ sahingga sigad mita in butá monia iḷumoben nongkon Sidon mopobayá in toḷatan kon Gerar, nodapot kon diug in Gaza, bo kon pomukaan mopobayá in Sodom, Gomora, Adma, bo Zeboim, dapot kon diug in Lasa.

²⁰ Tuata in bayongan buí i Ham. Pomuḷoi in bangusa bo sukunea nogutun kon butánea tontaní bo momaké doman in bahasanea tontaní.

²¹ Ki Sem, ki Guya-guyang i Yapet, in nobaḻí mogoguyang in bayongan in bangusa Ibrani.

²² Ki adí mita i Sem in ki Elam, ki Asyur, ki Arpakhsad, ki Lud bo ki Aram.

²³ Buí i Aram tuata in intau mita inta nogutun kon Us, kon Hul, kon Geter bo kon Mas.

²⁴ Ki Arpakhsad ki amá i Selah. Bo ki Selah ki amá i Eber.

²⁵ Ki Eber kogadí kon adí ḷoḷaki doyowa; inta guya-guyang tangoinea in ki Peleg, sin kon zamannea bangusa mita kon dunia nosila-silai; inta induanea tangoinea in ki Yoktan.

²⁶ Buí i Yoktan in intau mita inta nogutun kon Almodad, Selep, Hazar-Mawet bo Yerah,

²⁷ Hadoram, Uzal, Dikla,

²⁸ Obal, Abimael, Syeba,

²⁹ Opir, Hawila bo Yobab. Tua komintan buí i Yoktan.

³⁰ Butá tampat pinogutunan monia moḷoben nongkon Mesa nopobayá in Separ, tua in buḷud kon dotá in pomukaan.

³¹ Tuata in bayongan buí i Sem. Pomuḷoi in bangusa bo suku nogutun kon butánea-butánea bo momaké doman in bahasanea-bahasanea tontaní.

³² Tua mita in buí i Nuh, bangusa bo bangusa podudui kon buínea-buínea. Mosia tuata inta pinomuían in bangusa mita kon dunia naa naonda in nopaḷut mako in ḷunud moḷoben tatua.