IMAMAT 7 - Alkitab Singog In Mongondow Masa In Tanaa

Kuruban toḻiu in karugian

¹ Naa in atorang mita pogogaid kon kuruban toḻiu in karugian. Kuruban tatua totok in motusi.

² Mahaḷuk inta pakéon kon kuruban tatua musti ratáan kon tampat pororataan kon mahaḷuk inta baḻíon kuruban tubáan, bo dugúnea in popobutak kon sí opat in mezbah.

^3-4 Ki imang in musti moposumba kon tudu in mezbah bayongan ḷongó in mahaḷuk tatua: Iputnea inta oyúon in ḷongó, ḷongó inta noikoḷob kon bonu in siannea, kombiloi takin ḷongónea, bo tonsilai inta totok in mopia nongkon poatnea.

⁵ Tua mita musti tubáannea kon tudu in mezbah mobaḻí kuruban kaanon kon i Tuhan. Kuruban tatua in nobaḻí kuruban toḻiu in karugian.

⁶ Bayongan intau ḷoḷaki kon bonu in baḷoi imang mita motaaubí mokaan kon ponoyá inta pinokuruban tatua, táe tua musti kaanon monia kon tampat inta ain sinantú, sin kuruban tatua motusi totok.

⁷ Aka kuruban potobutan kon dosa bo kuruban toḻiu in karugian notongkai in atorangnea: Tapú in biag inta pokuruban in nobaḻí silai i imang inta noposumba.

⁸ Kuḻit in biag tatua in nobaḻí domandon silai i imang.

⁹ Pomuḷoi in kuruban oḷudon inta sinubá kon bonu in tampat pototubáan ande dinungú kon bonu in rumping ande inta inangag, tua in nobaḻí silai i imang inta noposumba.

¹⁰ Táe kuruban oḷudon inta diá dinungú, pinomayá inta binauian in ḷana ande inta noingkag, tua mita nobaḻí silai in imang mita inta buí i Harun, bo mustibí silaion kotongkaion kon i monia.

Kuruban dodamean

¹¹ Naa in atorang mita pogogaid kon kuruban dodamean inta pinosumba kon i Tuhan.

¹² Aka kuruban tatua pinosumba takin makusud mopoyaput in sukur, dá poyotakinon in mahaḷuk tatua pokuruban in roti diá iragian. Roti tatua motaaubí inta mobunod nongkon topong pomiaan kukis takin ḷana in zaitun, motaaubí doman in roti noingkag monipit inta iḻepoan in ḷana, ande kukis topong inta pinomia pinoyotakin in ḷana zaitun.

¹³ Koḻikud intua musti posumba doman roti inta iragian.

¹⁴ Nongkon noyagi-yagimai in roti tongosilai in musti posumba kon i Tuhan, bo tua in nobaḻí silai i imang inta nogamá kon dugú in mahaḷuk tatua bo nopobutak kon mezbah mobaḻí kuruban dodamean.

¹⁵ Tapúnea musti kaanon kon dodai in mahaḷuk tatua pinosumba, topiḻikmai diábí motaau tonggagatan modapot in mobangon monik.

¹⁶ Aka intau tobatú modia kon kuruban dodamean sin mogintompod kon dandinea, ande kuruban inta nomuká nongkon ginanea tontaní, diá bidon musti kodaiton kaanon kon singgai doman tatua. Ibanea in motaaubí kaanon mobangon monik.

¹⁷ Aka kon singgai nogintoḷu bo oyúonpa in ki agatnea, dá ki agatnea tatua musti daiton tubáan.

¹⁸ Táe aka kon singgai nogintoḷu bo ponoyá tatua kaanonpa doman, dá kuruban tatua in diá bidon tarimaan bo diádon mobaḻí barakat kon intau tatua, sedang bo mobaḻíbí poton. Intau inta mokaan kon tua mobaḻídon kotaḷá bo musti motarima kon akibatnea.

¹⁹ Tapú inta kinotugatan in inta monajis musti tubáan modait bo diábí motaau kaanon. Tapú inta mobaḻí kuruban dodamean tongábí motaau kaanon in intau mita inta diá monajis.

²⁰ Aka intau inta mokaan kon ponoyá tatua bo dodai intua monajis, dá sia diádon pinoyoiap anggota umat i Tuhan.

²¹ Aka intau tobatú nokaan kon ponoyá inta pinokuruban tatua bo mopaḷut mako kon tua sia moḻiai kon inta monajis, pinomayá kon intau ande inta nongkon mahaḷuk, dá sia doman in diádon poyoiapon anggota in umat i Tuhan.

²² Ki Tuhan nobogoi kon i Musa in atorang mita tanaa

²³ kon bangusa Israel. Ḷongó in sapi, domba ande bembé diábí motaau kaanon.

²⁴ Ḷongó in mahaḷuk inta minatoi monag naníon ande dinomok in mahaḷuk moraat ibanea, diábí motaau in kaanon táe motaaubí in pakéon kon kaparaḷuan ibanea.

²⁵ Intau inta mokaan kon ḷongó in mahaḷuk inta motaau posumba mobaḻí kuruban kaanon kon i Allah, yo intau tatua in diá bidon poyoiapon umat i Tuhan.

²⁶ Intau Israel, kon ondaka in pinogutunannea, diábí motaau in mokaan kon dugú in ḷagapan ande dugú in mahaḷuk ibanea.

²⁷ Ki ine in ḻimimpat kon atorang tatua yo diá bidon iniap umat i Tuhan.

²⁸ Ki Tuhan nobogoi kon i Musa in atorang mita tanaa

²⁹ kon bangusa Israel. Ki ine in modia kon kuruban dodamean, musti mopotondí in tongosilai sin diaan posumba kon i Tuhan.

³⁰ Sia tontaní in musti modia kon kuruban kaanon tatua. Ḷongó bo dodob in mahaḷuk tatua musti posumba mobaḻí sosumba inta sinonoi kon i Tuhan.

³¹ Ki imang musti motubá kon ḷongó in mahaḷuk tatua kon tudu in mezbah, táe dodobnea in nobaḻíbí silai in imang mita.

³² Páanea koḷanan in musti ogoi mobaḻí tonsilai tontaní

³³ kon imang inta noposumba in dugú bo ḷongó in kuruban dodamean tatua.

³⁴ Dodob bo páa koḷanan in nobaḻí oogoi husus inta ginamá i Tuhan nongkon sosumba sinonoi in bangusa Israel bo ogoi kon imang mita. Tuata in umuran mobaḻí pinononsilai in bangusa Israel kon imang mita.

³⁵ Nongkon kaanon inta pinosumba kon i Tuhan, tuata in inogoinea kon i Harun bo kon i adínea mita kon singgai kon tungkuḷ in mosia baḻíondon imang.

³⁶ Kon singgai tatua ki Tuhan nomarenta kon bangusa Israel sinbá nongkon sosumba monia, tonsilai tatua in ogoi kon imang mita. Atorang tatua in musti umuran duduian in bangusa Israel.

³⁷ Natuata in atorang mita pogogaid kon kuruban inta tubáan, kuruban oḷudon, kuruban potobut kon dosa, kuruban toḻiu in karugian, kuruban ponabisan bo kuruban dodamean.

³⁸ Ki Tuhan nobogoi in atorang mita tatua kon i Musa kon Buḷud in Sinai kon tungkuḷ in ki Tuhan nopotabá kon bangusa Israel noposumba in kuruban kon padang gurun Sinai.