IMAMAT 6 - Alkitab Singog In Mongondow Masa In Tanaa

¹ Ki Tuhan nobogoi in atorang mita tanaa kon i Musa.

^2-3 Intau tobatú musti moposumba in kuruban aka sia nogaidon kon dosa kon i Tuhan pinopisí in sia doídon mopobui in kapunyaan intau inta pinoki tagúpa kon inia, ande sia nonguboḷdon kon intau, nonakow kon kapunyaan intau, ande ain nokouḻí kon kapunyaan intau inta ain nobuḻi, táe momayow poḷat doman mongibot.

^4-5 Intau inta kotaḷá tatua in musti moguboḻi bui kon bayongan inta ain nouḻínea takin oaid diá mojujur. Kon dodai in sia kinotaauandon kon ain nogaid kon inta noitaḷá, dá sia in mustibí moguboḻi kon tua mita kon i toginea, bo dugangan in doyowa nopuḷú noporsen.

⁶ Mobaḻí kuruban toḻiu in karugian, dá intau tatua musti moposumba in domba tobatú ande bembé koḷakian inta totok in mopia bo boḻinea in iapon podudui in pogogiap kon boḻi inta sinantú kon Ḷoḷaigan i Tuhan.

⁷ Ki imang mopokuruban intua potobut kon dosa intau tatua, dá intau tatua in ampungandon i Tuhan.

Kuruban inta tubáan

⁸ Ki Tuhan nopotabá kon i Musa

⁹ mopotaau kon i Harun bo kon i adínea mita in atorang mita tanaa soaḷ kuruban inta daiton tubáan. Ki imang musti mogukat kon kuruban tubáan kon tudu in mezbah bo pomayánea mako kon tua tonggobii tua, bo tuḷúnea in mustibí umuran modokot.

¹⁰ Naonda in kuruban tatua mobaḻí ḷobud, ki imang mogisoḷanádon in soḷana mopoḷok bo jubah inta nongkon kaeng linen, mustinea gamáan in ḷobud inta noyobauk in ḷongó tatua kon tudu in mezbah bo ukatonnea kon símai in mezbah.

¹¹ Mopaḷut mako kon tua sia musti momaḷuidon kon pakeang bodongka modia kon ḷobud tatua kon ḷuai in ḷoḷaigan, pobayá in tampat inta ain sinantú potagúan kon tua.

^12-13 Pomuḷoi in doḷo-doḷom ki imang musti mopondudub in kayu kon tudu in mezbah, monompia kon kuruban tubáan kon tudunea, bo motubá kon ḷongó in kuruban dodamean. Tuḷú kon tudu in mezbah musti umuran modokot bo diábí motaau in pomayá mako mopiong.

Kuruban oḷudon

¹⁴ Naadon in atorang mita soaḷ kuruban oḷudon kon i Tuhan. Kuruban tatua musti diaan in intau tobatú inta nongkon buí i Harun kon tayowon in mezbah.

¹⁵ Sia in musti mogamá kon toyoyangkom in topong moaḷus takin ḷana bo bayongan in kamanianea, bodongka motubá kon tudu in mezbah mobaḻí tompoingat kon bayongan kuruban tatua pinosumba kon i Tuhan. Rongingi in kuruban tatua mokosanang kon gina i Tuhan.

^16-17 Topong inta ki agatnea musti aidan roti inta diá ragian bo kaanon in imang mita kon tampat inta ain sinantú, inta kon bosí in Ḷoḷaigan Tuhan. Tuata in nobaḻí silai in imang mita inta inogoi i Tuhan kon i monia nongkon kuruban kaanon. Kaanon tatua motusi totok, naonda bo kuruban potobut kon dosa bo kuruban toḻiu in karugian.

¹⁸ Bayongan in ḷoḷaki nongkon buí i Harun musti mokaan kon tua; tua in nobaḻí atorang mononoi kon i monimu dapot kon adí bo ompumu; tuata in nobaḻí silai monia nongkon kaanon inta ain pinosumba kon i Tuhan. Intau ibanea inta moḻiai kon kaanon inta ain pinokuruban tatua, in mobodito sin popisí in kototusinea.

¹⁹ Ki Tuhan nobogoi in atorang mita tanaa kon i Musa

²⁰ naa in sosumba i Harun bo buínea mita, inta musti posumba monia kon i Tuhan kon dodai in mosia baḻíondon imang; Mosia in musti moposumba in topong gandum tokilo kon i Tuhan. Tongosilai kon tua musti posumbanea doḷo-doḷom bo kiagatnea in posumbanea wakutu in ḷoḷabungnea.

²¹ Topong tatua in mustibí poyobauion in ḷana, bodongka tubáan kon tudu in pogogangagan, onda intua ḷosi-ḷosion bo posumba mobaḻí kuruban oḷudon. Rongingi in kuruban tatua mokosanang kon gina i Tuhan.

²² Buí i Harun inta binaḻídon Imang Moḷoben in mustibí umuran moposumba in kuruban tatua. Tua komintan musti tubáan sin mobaḻí sosumba kon i Tuhan.

²³ Bayongan kuruban oḷudon inta posumba in imang musti tubáan kodaiton, bo topiḻikmai diábí motaau in kaanon.

Kuruban potobut kon dosa

²⁴ Ki Tuhan nopotabá kon i Musa

²⁵ mopotaau kon i Harun bo kon i adínea mita in atorang mita tanaa soaḷ kuruban potobut kon dosa. Mahaḷuk inta baḻíon kuruban potobut kon dosa musti ratáan kon tampat pororataan kon mahaḷuk inta nobaḻí kuruban tubáan. Kuruban tatua motusi totok.

²⁶ Imang inta moposumba in kuruban tatua musti mokaan kon tua kon tampat inta ain sinantú, kon bosí in Ḷoḷaigan i Tuhan.

²⁷ Ki ineka ande onuka in moiḻiai kon tapú in biag tatua yo mokouḻíbí kon bodito sin popisí in ropot in kototusinea. Aka ḷambung tobatú kotugatan dugú in mahaḷuk inta pinopopisik tatua, dá ḷambung tatua musti batáan kon tampat inta ain sinantú.

²⁸ Kuyon butá inta pinaké pinotuonan kon ponoyá inta pokuruban tatua musti ḷosion. Aka kuyon uatoi in pinaké, dá kuyon tatua musti radatan bodongka daritan in tubig.

²⁹ Bayongan ḷoḷaki kon bonu in baḷoi imang motaaubí mokaan kon kaanon intau pinokuruban bo inta totok in motusi tatua.

³⁰ Mahaḷuk inta pinaké kon upacara potobutan kon dosa inta ginamá in dugúnea ibanea bo dinia kon Yuang Motusi, mustibí tubáan kopayongon bo diábí motaau in kaanon.