IMAMAT 25 - Alkitab Singog In Mongondow Masa In Tanaa

Taong noginpitu

¹ Kon tudu in Buḷud Sinai ki Tuhan noyosingog takin i Musa bo nopotabá kon inia

² nopotaau in atorang mita tanaa kon bangusa Israel. Aka moiko tumuot kon butá inta ogoi i Tuhan kon inimu, yo nanaa in pohohoromat monimu kon i Tuhan: Pomuḷoi in taong noginpitu moiko diábí motaau in mononggobá ande monompinomuḷa kon butá tatua.

³ Kon bonu in onom notaong moiko musti monompinomuḷa kon gobámu mita, mongimpoḻimping kon anggurmu mita bo mosipun kon bungai in boyómu.

⁴ Táe pomuḷoi in taong impitunea tua in tantúon kon i Tuhan. Dá kinoouput in taong tatua pomayápa mako in butá tatua diá ponompinomuḷaan. Dika monompinomuḷa bo dika mongimpoḻimping kon anggurmu mita.

⁵ Modapot in anggur inta kino bia-biagnea ande anggur nongkon pangkoi in anggurmu inta diá pinoḻimpingan, diábí motaau sipunon monimu bo tagúon, sin taong tatua in nobaḻí taong pogogaian in butá.

⁶ Umpaka natua, yo butá tatua in mobogoibí doman in boyó inta baḻíon kaanon kon i monimu, kon atamu mita, kon intau mita inta sinondananmu, bo intau mita ango-angoi inta nogutun takin i monimu.

⁷ Bo kaanon doman in biagmu mita bo mahaḷuk mita kaḻig kon butámu. Bayongan inta nongkon butá tatua motaaubí kaanon.

Taong Popobuian

⁸ Iapdon in pitu bo poyokali in pitu notaong, kobayongnea opat nopuḷú bo siow notaong.

⁹ Bo kon singgai impuḷúnea buḷan noginpitu, inta kon singgai potobutan kon dosa, bayongan intau kon bayongan tampat in musti mogirup kon torompet.

¹⁰ Musti potondí monimu in taong in ḻima nopuḷúnea tatua, bo mopotaau in kinoḷuatan in bayongan intau kon butá tatua. Kon bonu in taong tatua bayongan kapunyaan inta ain pinotaḷui musti pobuion kon i toginea inta muna ande kon buínea. Ki ine in pinotaḷui nobaḻí ata musti pobuion kon koluarganea.

¹¹ Dikapabí monompinomuḷa kon gobámu. Gandum inta tongá kino bia-biagnea ande bungai in anggur kon gobá in anggurmu inta diá pinoḻimpingan diábí motaau sipunon monimu bo tagúon.

¹² Taong tatua in nobaḻídon taong inta motusi kon inimu. Moiko tongábí motaau mokaan kon onu inta tongá kino bia-biagnea kon gobámu.

¹³ Kon taong tatua bayongan butá inta ain pinotaḷui musti pobuion kon i toginea inta muna.

¹⁴ Dá aka moiko mopotaḷui in butá kon tumpaḷa intau Israel, ande motaḷui kon butá nongkon inia, yo dikabí mosipotaḷuian takin oaid diá motuḻid.

¹⁵ Boḻi in butá tatua musti tantúon podudui in koonggot in taong butá tatua nobogoi in boyó nodapot kon Taong Popobuian moiduduimai.

¹⁶ Aka moonggot, dá mobayong doman in boḻinea. Táe aka motoyong, dá moyakag doman in boḻinea, sin inta pinotaḷui tua in noidoyonbí kon kobarong in bungai in boyó.

¹⁷ Dika monguboḷ kon tumpaḷa intau Israel, táe kotoguondokbí in moiko kon i Tuhan, Allahmu.

Soaḷ taong noginpitu

¹⁸ Duduiaidon in bayongan hukum bo parenta i Tuhan, sinbá moonow in kobobiagmu kon butá tatua.

¹⁹ Butá tatua in mobogoi in boyónea modapot in oyúon kaanon monimu inta tugat kon i monimu bo mogutun kon tua takin mobiag motompia.

²⁰ Táe oyúon degá in moḻibó nanaa: onu in kaanon kon bonu in taong noginpitu tua kon dodai in butá diá ponompinomuḷaan bo diá in bungai in boyó.

²¹ Kon bonu in taong noginggonom ki Tuhan momarakat kon butámu sinbá boyónea tugat pakéon dapot in toḷu notaong.

²² Bo kon dodai in moiko momuḷa kon gobámu kon taong mongin waḷu, bungai in boyó kon taong noginggonom oyúonpa bo tugatpa kaanon monimu. Modapot in tongkaaḷ kaanon monimu tua tugatpabí moiyaput in wakutu pobatunan kon bungai in boyó kon taong tatua.

Popobuian in butá bo baḷoi

²³ Butámu tua in diábí motaau in potaḷuimu, sin butá tatua in deemanbí iko in kitogi, táe ki Allahbí in kitogi. Moiko in tongábí ná intau ango-angoi inta inogoian in wakutu momaké kon butá tatua.

²⁴ Aka butá totampat bo potaḷui, haknea in mustibí kitoginea muna sinbá motaau buínea tobuton in butá tatua.

²⁵ Aka intau Israel tobatú mobaḻí nomasiking dá pakisadon sia mopotaḷui in butánea, dá ki utatnea inta modagin totok kon inia in kitogi hak motobut kon butá tatua.

²⁶ Aka diá in intau ibanea in motobut kon butá tatua táe kitoginea tatua kon singgai moiduduimai mokopooyúondon bo tugatdon in doitnea potobutan kon butánea,

²⁷ dá sia in musti moguboḻi kon intau inta ain notaḷui kon butánea podudui in bungai in boyó kon butá tatua kon dodai in butá tatua pinotaḷui pinangkoi kon singgai pinopotaḷuian nodapot kon Taong Popobuian. Dá butá tatua in noibuidon kon inia.

²⁸ Táe aka sia diá mokotongod in motobut kon butánea, dá intau inta notaḷui umuranpabí oyúon in haknea kon butá tatua modapot kon Taong Popobuian inta moiduduimai. Kon bonu in taong tatua butá tatua musti pobuion kon i toginea inta muna.

²⁹ Aka intau tobatú mopotaḷui in baḷoinea tobatú inta kon bonu in kotá inta iḻibu sinondok in beton, dá oyúonbí in haknea motobut kon baḷoinea kon bonu in totaong inta iapon pinangkoi kon singgai pinopotaḷuian.

³⁰ Táe aka baḷoi tatua diá sinobutnea kon bonu in totaong tatua dá diádon in haknea motobut bui. Baḷoi tatua mobaḻídon kapunyaan in intau inta notaḷui bo buínea. Kon Taong Popobuian, baḷoi tatua diá bidon pobuion.

³¹ Aka baḷoi kon ḻipú inta sinondok doman in beton pakéon doman in atorang natua: kitoginea muna oyúon in hak motobut kon baḷoi tatua bo baḷoi tatua musti pobuion kon Taong Popobuian.

³² Táe aka intau in Lewi haknea in toonukabí in motobut kon kapunyaan monia kon kotá mita inta ain sinantú kon i monia.

³³ Aka intau in Lewi tobatú mopotaḷui in baḷoinea kon kotá tobatú bo diá tobutonnea bui, dá baḷoi tatua mustibí pobuion bui kon inia kon dodai in Taong Popobuian. Sin baḷoi in intau in Lewi kon kotá mita monia in nobaḻíbí kapunyaan monia inta notantúdon kon sigad in bangusa Israel.

³⁴ Táe ḷopá popokaanan in biag kon diugmai in kotá mita intau in Lewi diábí motaau potaḷui. Tua in nobaḻíbí kapunyaan intau in Lewi dapot kon adí bo ompu.

Mopoḷuan kon intau bogá

³⁵ Aka intau tobangusamu inta nogutun kon sigad monimu nobaḻí nobogá bo diádon mokotompia kon kobiagannea tontaní dá musti bantungan monimu in sia naonda bo intau ango-angoi ande mokokiangoi, sinbá sia umuranpa mobiag kon sigad monimu.

^36-37 Dika moigum kon kauntungan nongkon onu inta pinoḷuanmu kon inia, táe kotoguondokbí in moiko kon i Allahmu, bo pomayádon mako intau tatua mobiag kon sigad monimu. Dika doman motayak kon kauntungan aka moiko mopotaḷui in kaanon kon inia.

³⁸ Tuata in parenta i Tuhan Allahmu inta ain nodia kon i monimu iḻumuai nongkon Mesir sin mobogoi kon butá in Kanaan kon inimu, sinbá Sia mobaḻí Allahmu.

Popoḷuatan kon ata

³⁹ Aka intau tobangusamu inta nogutun kon sigad monimu nobaḻí nobiag nobogá dapot in sia nopotaḷuidon in awaknea mobaḻí ata kon inimu, yo intau tatua in diábí motaau pokiaidan monimu in oaidan intau ata.

⁴⁰ Sia musti mogutun kon inimu mobaḻí intau inta sinondanan bo mogaid kon oaidanmu modapot kon Taong Popobuian.

⁴¹ Kon dodai intua sia bo ki adínea mita motaaudon monaḷámai kon baḷoimu bo mobui kon koluarganea bo kon butá in mogoguyangnea.

⁴² Intau Israel tua in mogogundoibí mita i Tuhan; Siabí in nodia kon i monia iḻumuai nongkon Mesir, dá tuamai mosia in diábí motaau potaḷui mobaḻí ata.

⁴³ Dá intau Israel inta nopotaḷui in awaknea kon inimu diábí motaau pomiaanmu ibo-ibog. Kotoguondokbí in moiko kon i Allahmu.

⁴⁴ Aka moiko moparaḷu kon ata, yo motaaubí in moiko motaḷui kon bangusa mita inta nogutun kon diugmai monimu.

⁴⁵ Moiko in motaau doman motaḷui kon mongoadí mita nongkon bangusa ango-angoi inta nogutun kon sigad monimu. Adí mita in intau ango-angoi inta pinononggadí kon butámu motaaubí in mobaḻí kapunyaan monimu

⁴⁶ bo motaaubí doman popoabat kon i adí mita monimu sin baḻíon monia ata kon bonu in mosia mobiagpa. Táe aka tumpaḷa intau Israel diábí motaau in pomiaan monimu ibo-ibog.

⁴⁷ Aka intau ango-angoi inta kon sigad monimu mobaḻí nobiag nooyúon, bo oyúon in intau Israel kon sigad monimu nobaḻí nobiag nobogá nodapot in sia nopotaḷui in awaknea mobaḻí ata kon intau ango-angoi tatua ande kon koluarganea,

⁴⁸ yo intau Israel tatua umuranbí oyúon in haknea tobuton. Intau tobatú nongkon i utatnea inta ḷoḷaki,

⁴⁹ ande ki utat i amánea inta ḷoḷaki, ande ginaḷum motoḷuadínea ande intau ibanea nongkon ginaḷumnea inta modaginpa totok, motaaubí in motobut kon inia. Ande sia tontaní bo kon singgai moiduduimai mokomampudon, dá motaaubí tumobut tontaní in sia.

⁵⁰ Ata tatua in mustibí muna moyosingog takin intau inta notaḷui kon inia. Musti iapon monia in taong pinangkoi kon sia nopotaḷui in awaknea nobaḻí ata modapot kon Taong Popobuaian inta noiduduimai, bo dongka monantú kon boḻi inta musti potobutnea. Boḻinea tatua musti tantúon podudui in pogiapan kon tondan inta inogoi kon intau inta totondanan.

^51-52 Ata tatua musti mopobui in boḻi inta pinototaḷui monia kon inia ná kobayong in tondan intau totondanan kon bonu in taong mita inta diápa pinogaidannea,

⁵³ nádon onda bo ain nogaid in sia mobaḻí intau tototondanan inta sinondanan pomuḷoi in taong. Ki tuangnea in diábí motaau mopomia ibo-ibog kon inia.

⁵⁴ Táe aka sia diá kotobutan takin cara natua, dá sia takin ki adínea mita in mustibí poḷuatondon kon Taong Popobuian moiduduimai.

⁵⁵ Intau Israel tobatú in diábí motaau umuran mobaḻí ata kon bonu in kinobiagannea sin bangusa Israel tua in bobantungbí mita i Tuhan. Ki Tuhanbí inta ain nodia kon i monia iḻumuai nongkon Mesir. Siabí tua in ki Tuhan, Allah monia.