IMAMAT 24 - Alkitab Singog In Mongondow Masa In Tanaa

Poḷoḷukad kon togá

¹ Ki Tuhan nopotabá kon i Musa

² nobogoi in parenta mita tanaa kon bangusa Israel: Diadon in ḷana zaitun inta diá binauian in ḷana ibanea bo inta totok in mopia sin ponugung kon togá inta kon bonu in Ḷoḷaigan i Tuhan, sinbá motaau poyongkiton bo umuran moyongkit.

³ Ki Harun musti monoinut kon togá mita tatua nongkon ḷoḷabungnea dapot in doḷo-doḷom kon tampat inta koangoian i Tuhan, kon ḷuai in toḻipoi inta noikoḷob kon Poti Dodandian kon Yuang Totok Motusi. Parenta tatua in musti umuran aidan modapot kon adí bo ompu.

⁴ Ki Harun musti monoinut kon togá mita inta sinudu kon sioḷ totuduan togá inta pinomia nongkon buḷawan sinbá umuran moyongkit kon Ḷoḷaigan i Tuhan.

Roti sosumba oḷudon

⁵ Pogamádon kon topong inta totok in mopia mopuḷú bodoyowá nokilo in kobayongnea bo pomiadon kon roti noḻimbung mopuḷú doman bodoyowá, pomia tumongo kilo komintan.

⁶ Ukat in roti tatua pomia doyowa noguntuḷ, togogonom in toguntuḷ, ukaton kon tudu in meja inta inaipan in buḷawan taakan inta kon bonu in Ḷoḷaigan i Tuhan.

⁷ Bubudaidon in kamania taakan kon pomuḷoi in guntuḷan roti sin monanda kon roti tatua in kuruban kaanon kon i Tuhan.

⁸ Pomuḷoi in singgai in Sabat musti oyúon in roti inta oḷudon kon bonu in Ḷoḷaigan i Tuhan. Tua in nobaḻí kowajiban in bangusa Israel modapot kon adí bo ompu.

⁹ Roti tatua in silai i Harun bo buínea. Bo tua in mustibí kaanon monia kon tampat inta motusi, sin roti tatua in motusibí doman totok nongkon kuruban kaanon inta pinosumba kon i Tuhan inta nobaḻí silai in imang mita.

Hukuman kon intau inta mogodi-godimai kon i Allah bo hukuman tontuḻí

^10-11 Kon ḷoḷaigan intau Israel oyúon in ḷoḷaki tobatú. Ki amánea intau in Mesir bo ki inánea intau in Israel tangoinea ki Selomit, ki adí i Dibri nongkon suku Dan. Kon singgai tobatú sia norogenggeng takin intau Israel kon ḷoḷaigan. Kon dodai in sia norogenggeng, sia nogodi-godimai kon i Allah. Tuamai intau mita Israel nodia kon inia pinobayá kon i Musa,

¹² bo sinahang poḷat mogoḷat mako kon kaputusan i Tuhan mongo onu in musti aidan monia kon inia.

¹³ Ki Tuhan noguman kon i Musa,

¹⁴ “Diadon in intau tatua kon ḷuai in ḷoḷaigan. Bayongan intau inta nokodongog kon inia nogodi-godimai, musti mopoukat in ḻima monia kon uḷu in intau tatua sin mobogoi in katarangan kon sia in kotaḷá. Bo bayongan umat musti mogarab in batu kon inia dapot in matoi.

¹⁵ Mopaḷut mako kon tua potaaudon in soaḷ tanaa kon intau Israel: Ki ine in mogodi-godimai kon i Allah musti momotaan kon tontuḻí in oaidnea

¹⁶ bo hukumon matoi. Ki ineka in mogodi-godimai kon i Tuhan musti ara bo in batu in bayongan jamaat dapot in matoi. Hukum tatua pouma kon intau Israel ande kon intau ango-angoi inta ain nogutun notantú kon Israel.

¹⁷ Ki ine in moḻimod kon intau ibanea musti hukumon matoi.

¹⁸ Ki ine in moḻimod kon biag in intau ibanea musti monoḻiu. Dodoyonan kon tua in ‘nyawa toḻiuan in nyawa’.

¹⁹ Aka intau tobatú nomia kon onu inta nokopopisí kon intau ibanea nobogit, dá aidnea tatua in musti popoaid doman kon inia.

²⁰ Aka sia nomutoḷ kon tuḷan, dá tuḷannea in musti doman putoḷon. Aka sia nokobilog kon mata in intau tosimpaḷ, dá matanea tosimpaḷ musti doman bilogan. Aka sia nomongkug kon intau nodapot noḷabú in ingipon intau tobatú, dá ingiponnea musti doman ḷabúon. Onukabí inaidannea inta nokopopisí kon intau ibanea mobogit, yo musti doman aidan kon inia mobaḻí tontuḻínea

²¹ Ki ine in moḻimod kon biag in intau musti monoḻiu, táe ki ine in moḻimod kon intau musti hukumon dapot in matoi.

²² Hukum tatua popoaid kon i monimu komintan bo kon intau doman ango-angoi inta nogutun kon sigad monimu, sin Akuoi in ki Tuhan, Allahmu.”

²³ Naonda in nopaḷut mako in ki Musa nopotaau in tosingogon tatua kon bangusa Israel, mosia nodia kon intau inta nogodi-godimai kon i Allah tatua pinoḷuai kon ḷoḷaigan bodongka inarab in batu dapot in minatoi. Tua in pinomia in intau Israel podudui in parenta i Tuhan kon i Musa.