IMAMAT 22 - Alkitab Singog In Mongondow Masa In Tanaa

Kototusi in sosumba

¹ Ki Tuhan nopotabá kon i Musa

² mopotaau in parenta tanaa kon i Harun bo kon i adínea mita, “Kopiaan in mopoaid kon onu inta pinosumba in bangusa Israel kon i-Nakó, sinbá moiko in diá mopokotormai in tangoi-Ku inta motusi. Akuoi in ki Tuhan.

³ Aka tobatú nongkon buímu inta monajis bo dimiug kon sosumba mita inta motusi inta ain sinantú in bangusa Israel kon i-Nakó, dá sia tua in diá bidon motaau mogaid kon oaidan kon mezbah. Atorang tanaa diaan modapot kon adí bo ompu. Akuoi in ki Tuhan.

⁴ Intau tobatú nongkon buí i Harun inta kinotugatan in panyaki kuḻit inta mokobahaya, ande panyaki kon dodiaan dapot in oyúon ḷumoḷayat, sia tua in diábí motaau mokaan kon sosumba aka diápa poniata kon nodaritdon. Imang tobatú mobaḻí monajis aka sia moḻiai kon inta monajis sin noḻiai kon intau minatoi. Sia in monajis doman aka buḻenea ḷumuai,

⁵ ande moḻiai kon mahaḷuk ande intau inta nonajis.

⁶ Imang tobatú inta ain nobaḻí nonajis popisí in kinotugatan tatua, sia in umuran monajis modapot kon mata in singgai tumoyop. Bo naonda mata in singgai tumoyop sia in diápabí motaau mokaan kon kaanon inta pinosumba kon i Tuhan aka diápa muna moinggú in sia.

⁷ Naonda mata in singgai tumoyop bo sia nondaritdon bain tua sia motaaudon mokaan kon tua, sin tuabí in kaanonnea.

⁸ Sia in diábí motaau mokaan kon tapú in mahaḷuk inta minatoi tontaní ande minatoi sin dinomok in mahaḷuk ibanea. Aka sia mokaan, dá sia in mobaḻí monajis. Akuoi in ki Tuhan.

⁹ Bayongan imang musti dumudui kon atorang mita inta inogoi-Ku. Aka diá dumudui, yo moitaḷádon in mosia bo matoi, popisí in noḷawangdon kon atorang mita inta motusi tatua. Akuoi in ki Tuhan, bo Akuoi naa inta ain nonantú kon i monia mobaḻí mogogundoi-Ku.

¹⁰ Sosumba inta ain sinantú kon i-Nakó tongábí motoḷuadí i imang in motaau mokaan; intau ibanea in diábí motaau mokaan kon tua, umpakabí intau tatua nogutun tobaḷoian i imang tatua ande intau inta sinokotondanannea.

¹¹ Táe ata mita inta sinaḷui i imang tontaní ande inta pinononggadí kon bonu in baḷoinea, yo motaaubí in mosia mokaan kon silai i imang tatua.

¹² Adí bobay in imang tobatú inta pinobuḷoi in ḷoḷaki tobatú inta deeman imang diábí motaau mokaan kon sosumba tatua.

¹³ Táe ki adí i imang inta nobaḻídon boba-bobay ande inta ain ginaat takin diá kogadí bo nobuidon mangoi kon baḷoi amánea poḷat domandon nobaḻí tanggungannea, yo motaaudon in sia mokaan kon silai i amánea. Tongábí motoḷuadí i imang in motaau mokaan kon sosumba tatua.

¹⁴ Aka intau tobatú inta deeman tombonu in motoḷuadí i imang bo takin diá sinumuod noikaan kon kaanon inta pinosumba kon i Tuhan, yo sia in musti mobogoi in toḻiunea kon i imang bo dugangan in doyowa nopuḷú noporsen.

¹⁵ Imang mita in diábí motaau moponajis in sosumba mita inta ain sinantú kon i-Nakó

¹⁶ takin mopomayá mako intua kaanon in intau inta diá motaau mokaan kon tua. Oaid tatua mokopomuká kon taḷá kon intau inta mokopoangoi kon hukuman kon inia. Akuoi naa in ki Tuhan, bo Akuoi in nopotusi kon sosumba tatua.”

¹⁷ Ki Tuhan nopotabá kon i Musa

^18-19 nopotaau kon i Harun, kon i adínea mita bo kon bayongan umat Israel in atorang mita tanaa. Aka intau Israel tobatú ande intau ango-angoi tobatú inta nogutundon notantú kon Israel bo moposumba in kuruban tubáan sin moguboḻi kon inta pinodandinea, ande kuruban inta ibogneabí tontaní, yo mahaḷuk tatua in mustibí koḷakian bo inta diá nobogit sinbá tarimaan.

²⁰ Dika moposumba in mahaḷuk inta nobogit, sin ki Tuhan doíbí motarima kon tua.

²¹ Aka intau tobatú moposumba kon i Tuhan in kuruban dodamean sin moguboḻi kon dandinea ande kuruban ibogneabí tontaní, mahaḷuk tatua in diábí doman motaau inta mobogit, sinbá tarimaan.

²² Dika moposumba kon i Tuhan in mahaḷuk inta bilog, inta noputoḷ in tuḷannea ande inta pinaḻían, inta binituḷ, inta pinayaki kon kuḻitnea ande inta inuka. Mahaḷuk natua dika posumba mobaḻí kuruban kaanon kon tudu in mezbah.

²³ Inta baḻíon kuruban ibog tontaní monimu motaaubí in moposumba in mahaḷuk inta diá notompod in kaadaannea; táe aka moguboḻi kon dandi, mahaḷuk natua diábí tarimaan.

²⁴ Dika moposumba kon i Tuhan in mahaḷuk inta goyaaunea nogoguyaat popisí in noigupit, kinosibatan, notompaḻí sin binobakan ande inta iḷumbú. Tua in diábí motaau aidan kon butámu.

²⁵ Biag inta nouḻí nongkon intau ango-angoi diábí motaau posumba mobaḻí kuruban kaanon. Mahaḷuk tatua inanggap nobogit bo diábí motaau tarimaan.

^26-27 Adí in sapi, adí in domba ande adí in bembé inta bagu pinogadí mustibí umuran kotaki-takin i inánea modapot in pitu nosinggai in koonggotnea. Bain mopaḷut mako kon tua mahaḷuk tatua motaau tarimaan mobaḻí kuruban kaanon.

²⁸ Dika mopokuruban in ki iná in sapi ande domba ande bembé takin ki adínea kon tosinggai monag tua.

²⁹ Aka moiko moposumba in kuruban mobaḻí sukur kon i Tuhan, aidaidon intua podudui in atorang, sinbá kurubanmu tarimaan.

³⁰ Kaandon in kuruban tatua kon singgaipa doman tatua, bo dikadon tonggagatanmu dapot kon mobangon monik.

³¹ Ki Tuhan noguman, “Duduiaidon in parenta-Ku mita; Akuoi in ki Tuhan.

³² Dika mopokotormai kon tangoi-Ku inta motusi. Bayongan bangusa Israel musti mosumba kon i-Nakó mobaḻí Inta Totok in Motusi. Akuoi in ki Tuhan bo Akuoi in nopobaḻí kon i monimu motusi.

³³ Akuoi nodia kon i monimu iḻumuai nongkon Mesir, sinbá Akuoi in mobaḻí ki Allahmu. Akuoi in Tuhan.”