IMAMAT 21 - Alkitab Singog In Mongondow Masa In Tanaa

Kotusian in imang mita

¹ Ki Tuhan nopotabá kon i Musa mopotaau in parenta tanaa kon imang mita buí i Harun, “Tobatú imang in diábí motaau moponajis in awaknea popisí in dumudui mayá kon poḷobongan kon ginaḷumnea,

² koḻikudbí in aka inta minatoi tatua ki inánea, ki amánea, ki adínea, ki utatnea ḷoḷaki,

³ ande ki utatnea bobay inta diápa kobuḷoi, bo nogutun tobaḷoian takinnea.

⁴ Sia diá doman motaau moponajis in awaknea takin dumudui kon upacara poḷobongan kon ginaḷum i buḷoinea.

⁵ Imang tobatú diábí motaau tongá monggonsing kon tongosilai in buoknea bo diá doman motaau monggonsing kon kuminea ande monompaḻí kon awaknea takin ḷanit sin moponiata kon sia in koyogot kinopatoian.

⁶ Sia in kapunyaan-Ku inta ain sinantú-Ku bo diábí motaau in sia moporaatmai kon tangoi-Ku. Sia in moposumba in kuruban kaanon kon i-Nakó, dá sia in mustibí motusi.

⁷ Imang tobatú diábí motaau in motonibuḷoi takin bobay tobatú inta ain nobaḻí sundaḷ ande bobay inta diádon porawan ande inta ain nogogaatan, sin imang tua in kapunyaan-Ku.

⁸ Musti akúon in bangusa Israel kon imang tua in intau inta ain sinondí kon i-Nakó sin sia moposumba in kuruban kaanon kon i-Nakó. Akuoi in ki Tuhan; Akuoi naa in motusi bo Akuoi mopotusi kon umat-Ku.

⁹ Aka ki adí bobay in imang mobaḻí sundaḷ, yo sia tua in mopoompámaidon kon i amánea bo musti turubon dapot in matoi.

¹⁰ Imang Moḷoben ain binaḻí imang takin binutakan in ḷana upacara kon uḷunea bo iḷutudan in pakeang imang moḷoben in sia. Tuamai sia in diá bidon motaau mopomayá mako in buoknea mokitu ande momerak kon ḷambungnea mobaḻí tanda kinopatoian.

^11-12 Sia aindon pinosumba kon i-Nakó sin mobaḻí kapunyaan-Ku, dá diábí motaau moponajis in awaknea. Sia in diábí doman motaau moponajis in Ḷoḷaigan-Ku takin ḷumuai nongkon tua bo mayá tumuot kon baḷoi inta oyúon in intau minatoi, umpaka tua mayat i amánea ande in inánea.

^13-14 Sia in tongábí motaau motonibuḷoi takin bobay porawan nongkon sukunea tontaní. Sia in diábí motaau motonibuḷoi takin tobatú boba-bobay ande bobay inta ain ginaat, ande tobatú bobay inta nokoimontandon in nobaḻí sundaḷ.

¹⁵ Aka sia ḻimimpat kon atorang tatua, dá ki adínea mita inta sabanarnea motusi, mobaḻídon nonajis. Akuoi in ki Tuhan bo Akuoi nopotondídon kon inia nobaḻí Imang Moḷoben.”

¹⁶ Ki Tuhan nopotabá kon i Musa

¹⁷ mopotaau in naa kon i Harun, “Intau tobatú buímu inta awaknea nobogit diábí motaau in moposumba in kuruban kaanon kon i-Nakó. Tua in musti umuran pakéon modapot kon adí bo ompu.

¹⁸ Intau inta moposumba in kuruban diábí motaau aka awaknea mobogit, ná inta bilog ande inta pelong, intau inta mobogit in pogotnea ande anggota in awaknea,

¹⁹ inta ḻempeng in ḻimanea ande inta nosedó in sioḷnea,

²⁰ inta nobungkut ande inta nosingkian, ande inta pinanyaki in matanea ande pinanyaki kuḻit ande inta kinabiri.

²¹ Bayongan buí i Imang Harun inta nobogit in awaknea diábí motaau moposumba in kuruban kaanon kon i-Nakó.

²² Táe sia in motaaubí mokaan kon kaanon inta pinosumba, pinomayá kuruban kaanon inta motusi ande kuruban kaanon inta totok in motusi.

²³ Popisí in intau tatua nobogit in awaknea, dá sia diá motaau dimiug kon toḻipoi inta nopoyotondí in Yuang Motusi ande mezbah. Sia diábí motaau moponajis in barang mita inta ain sinondí kon i-Nakó, sin Akuoi in ki Tuhan, bo Akuoi in nonondí kon barang mita tatua.”

²⁴ Tuata in atorang mita inta pinotaau i Musa kon i Harun bo kon i adínea mita, bo kon bayongan bangusa Israel.