IMAMAT 20 - Alkitab Singog In Mongondow Masa In Tanaa

Hukuman kon intau inta diá motoindudui

¹ Ki Tuhan nopotabá kon i Musa

² mopotaau in naa kon bangusa Israel, “Bayongan intau kon sigad monimu ande intau ango-angoi inta nogutun kon sigad monimu inta mopokuruban in adínea kon i Molokh, musti ara bo in bayongan intau dapot in sia matoi.

³ Intau inta mopokuruban in adínea kon i Molokh, moponajis in Ḷoḷaigan-Ku bo mopoompámai kon tangoi-Ku inta motusi. Hukumon-Ku in sia bo diádon poyoiapon-Ku anggota in umat-Ku.

⁴ Aka intau mita tongá mopomayá mako in dodia in intau natua bo diá mopoḷabú in hukuman matoi kon inia,

⁵ dá Akuoidon tontaní in mohukum kon inia, bayongan tombonu in baḷoinea, takin bayongan intau inta noyotakinnea nonaḷámai kon i-Nakó bo minayá nosumba kon i Molokh. Mosia in diá bidon iapon-Ku anggota in umat-Ku.

⁶ Intau inta mayá moigum kon tonggina kon boḻian inta mogoinímai kon dimukud in intau inta ain minatoi in hukumon-Kubí bo diádon iapon-Ku anggota in umat-Ku.

⁷ Ḷukadai sinbá moiko umuran motusi, sin Akuoi in ki Tuhan Allahmu.

⁸ Duduiaidon in hukum-Ku mita, sin Akuoi in ki Tuhan inta ain nopotondí kon i monimu sin mobaḻí mogogundoi-Ku.”

⁹ Ki Tuhan nobogoi in atorang mita tanaa, “Intau inta mogodi-godimai kon i amánea ande kon i inánea musti hukumon matoi. Sia matoi popisí in taḷánea tontaní.

¹⁰ Aka intau Israel tobatú monuaḻing kon buḷoi in intau inta tobangusanea, dá sia bo bobay tatua in musti hukumon matoi.

¹¹ Intau ḷoḷaki tobatú inta mosiug takin i buḷoi tobatú i amánea, yo sia tua nogagowdon kon hak i amánea. Ḷoḷaki bo bobay tatua in mustibí hukumon matoi. Mosia in minatoi sin pinopisí in taḷá monia tontaní.

¹² Aka intau tobatú mosiug takin i mototakanea bobay, dá intau doyowa tatua musti hukumon matoi. Mosia aindon nonuaḻing, bo mosia minatoi popisí in taḷá monia tontaní.

¹³ Aka intau ḷoḷaki tobatú bo mosiug doman takin ḷoḷaki ibanea tobatú, yo mosia tua ain nomia kon oaid inta moraat bo mokooyá, dá taya dua tua musti hukumon matoi. Mosia in minatoi sin pinopisí in taḷá monia tontaní.

¹⁴ Aka ḷoḷaki tobatú mobuḷoi kon bobay tobatú takin ki iná in bobay tatua, dá taya toḷu tua in musti turubon dapot in matoi, popisí in mosia nomia kon oaid inta moraat totok. Oaid ná mita tatua in diábí motaau in aidan kon sigad monimu.

¹⁵ Aka ḷoḷaki tobatú mongibog kon mahaḷuk, dá intau bo mahaḷuk tatua musti ḻimodon.

¹⁶ Aka bobay tobatú mokipaké kon mahaḷuk, dá bobay bo mahaḷuk tatua musti ḻimodon. Mosia matoi popisí in oaid monia tontaní.

¹⁷ Aka ḷoḷaki tobatú mosiug takin i bobaynea ande takin ki bobaynea inta toamáan táe noyoposi kon iná ande toináan táe noyoposi kon amá, dá mosia tua in diádon iapon umat-Ku. Mosia aindon nomia kon oaid inta moraat totok bo musti motarima kon bungai in oaidnea.

¹⁸ Aka ḷoḷaki tobatú mosiug kon bobay tobatú inta inangoinea, dá mosia diá bidon iapon umat-Ku.

¹⁹ Aka ḷoḷaki tobatú moniug kon bobay inta pokuináannea, dá taya dua tua musti motanggung kon bungai in oaid monia tontaní tatua.

²⁰ Aka ḷoḷaki tobatú moniug kon i buḷoi pokuamáannea, yo sia in nokopoompámaidon kon pokuamáannea. Ḷoḷaki bo bobay tatua musti motanggung kon hukuman kon i monia, dapot in matoi mosia tua diá mokouḻí kon adí.

²¹ Aka ḷoḷaki tobatú mogagow kon buḷoi i utatnea, yo sia tua in nokopoompámai kon i utatnea bo ain nomia kon oaid inta moraat tatua. Dapot in matoi mosia tua diá mokouḻí kon adí.”

²² Ki Tuhan noguman, “Duduiaidon in bayongan hukum bo parenta-Ku, sinbá moiko diá poguntunon kon butá in Kanaan, kon tampat inta pinodiaan-Ku kon i monimu.

²³ Dika dumayan kon kabiasaan in bangusa inta nogutun kon tua. Mosia noponakit in gina-Ku takin oaid monia inta moromú. Tuamai mosia tua in pinoguntun-Ku, sinbá moiko motaau tumuot kon butá tatua.

²⁴ Butá inta nooyúon bo mopia tatua aindon pinodandi-Ku kon i monimu, dá ogoi-Kubí intua mobaḻí kapunyaanmu. Akuoi in ki Tuhan Allahmu inta nopotondí kon i monimu nongkon bangusa mita ibanea.

²⁵ Tuamai moiko musti motaau mopoyoposi onda in mahaḷuk inta haram nongkon inta diá haram. Dika mokaan kon mahaḷuk inta haram. Mahaḷuk tatua pinoniata-Kudon kon haram, dá aka mokaan yo moiko mobaḻí monajis.

²⁶ Moiko pinotondí-Ku nongkon bangusa mita ibanea sinbá mobaḻí kapunyaan-Ku. Moiko in musti motusi sin Akuoi in ki Tuhan, bo Akuoi in motusi.

²⁷ Bayongan intau ḷoḷaki ande bobay inta umuran mogoiní kon dimukud mita inta ain minatoi yo musti ara bo in batu modapot in matoi. Intau tatua in matoi popisí in oaidnea tatua.”