IMAMAT 2 - Alkitab Singog In Mongondow Masa In Tanaa

Kuruban oḷudon

¹ Aka oyúon intau moposumba in kuruban sosumba kon i Tuhan, yo kuruban tatua in ná tanaa: topong inta totok in mopia inta binutakan in ḷana zaitun bo binubudan in kamania in tudunea.

² Musti diaan in intau tatua kon imang mita inta buí i Harun. Imang moḷoben inta mogaid kon oaidan tatua musti mogamá kon toyoyangkom in topong tatua takin ḷana zaitunnea bo bayongan kamanianea, bodongka tubáannea intua kon tudu in mezbah mobaḻí tompoingat kon tua komintan aindon pinosumba kon i Tuhan. Rongingi in kuruban kaanon tatua mokosanang kon gina i Tuhan.

³ Kiagat in kuruban sosumba tatua in ogoidon kon imang mita. Kuruban tatua motusi totok sin ginamá nongkon kaanon inta ain pinosumba kon i Tuhan.

⁴ Aka inta pinosumba tatua bo roti inta sinubá kon bonu in tampat potototubáan, dá roti tatua musti pomiaan diá ragian. Roti tatua motaaubí in mobunod, pomiaan nongkon bahan topong moaḷus takin ḷana zaitun, motaaubí doman in kukis inta tongá iḻepoan in ḷana zaitun.

⁵ Aka inta pinosumba tatua bo roti inta inangag kon tudu in pogogangagan, dá roti tatua musti pomiaan nongkon topong inta moaḷus takin ḷana zaitun, táe diá ragian.

⁶ Roti inta pinosumba tatua musti ḷosi-ḷosion, bodongka popobutakan in ḷana zaitun.

⁷ Aka inta pinosumba tatua bo roti inta dinungú kon rumping, dá roti tatua musti pomiaan nongkon topong moaḷus bo ḷana zaitun.

⁸ Roti inta pinomia ná tatua musti posumba kon i Tuhan bo poabat kon imang inta modia mayá in mezbah.

⁹ Imang in mogamá kon tosilai nongkon roti tatua bodongka tubáannea kon tudu in mezbah mobaḻí tompoingat kon bayongan tua aindon pinosumba kon i Tuhan. Ronginginea mokosanang kon gina i Tuhan.

¹⁰ Kiagatnea in kon i imangdon mita. Roti tatua motusi totok sin ginamá nongkon kaanon inta ain pinosumba kon i Tuhan.

¹¹ Kuruban sosumba inta inogoi kon i Tuhan diábí motaau in bauian biluk ande ragi, sin biluk bo ragi, diábí motaau tubáan sin posumba kon i Tuhan.

¹² Nongkon bungai in boyó inta ḷontú pomuḷoi in taong, tongosiḷai in musti posumba kon i Tuhan, táe diábí motaau in tubáan kon tudu in mezbah.

¹³ Bayongan kuruban sosumba musti ibungan simuton, sin simuton mobaḻí tanda dodandian i Allah bo i monimu. Dá bayongan sosumba musti ibungan.

¹⁴ Aka moiko moposumba kon i Tuhan in gandum inta muna kinoyut monimu, yo diádon in gandum nobagu inta ain dinodok kino aḷus ande inta ain inangag.

¹⁵ Gandum tatua in mustibí butakan in ḷana zaitun bo bubudan in kamania kon tudunea.

¹⁶ Imang musti motubá kon tongosilai in gandum bo ḷana tatua takin bayongan kamanianea, mobaḻí tompoingat kon tua komintan aindon pinosumbanea kon i Tuhan.