IMAMAT 19 - Alkitab Singog In Mongondow Masa In Tanaa

Kokokudus in kobobiag

¹ Ki Tuhan nopotabá kon i Musa

² mopotaau kon bangusa Israel in parenta tanaa, “Moiko in musti motusi, sin Akuoi ki Tuhan Allahmu in motusi.

³ Bayongan intau musti mohoromat kon i amá bo kon i inánea bo mohoromat kon singgai in Sabat ná inta pinarenta-Ku. Akuoi in ki Tuhan Allahmu.

⁴ Dika mosumba kon toḻindua i Tuhan. Dika momia kon patong nongkon logam bo sumbáan monimu. Akuoi in ki Tuhan Allahmu.

⁵ Aka moiko moposumba in mahaḷuk mobaḻí kuruban dodamean, duduiaidon in atorang mita inta inogoi-Ku, sinbá kuruban tatua tarimaan-Ku.

⁶ Tapúnea musti kaanon kon singgai pinoratáan ande mobangon monik. Tapúnea inta ki agatnea nodapot kon singgai nogintoḷu musti daiton tubáan,

⁷ sin nobaḻídon haram intua. Aka tapú tatua kaanonpa doman, yo kuruban tatua diábí tarimaan-Ku.

⁸ Ki ine in mokaan kon tapú tatua yo kotaḷá sin diá moguntu kon onu inta ain sinantú kon i-Nakó. Intau tatua diá bidon iniap-Ku anggota in umat-Ku.

⁹ Aka moiko mobatundon kon boyó, dikadon ratabon monimu in gandum inta nobiag kon bingkí mita in gobámu, bo dikadon mobui mayá mopuyut kon gandum inta kinotaḷáan kon dodai in pinorataban.

¹⁰ Dika mobui mayá in gobá in anggurmu sin mosipú bui kon bungai in anggur inta kinotaḷáan naonda in moiko nopaḷutdon nosipú muna. Ná doman tua bungainea mita inta ain noḷabú dikadon puyuton monimu. Pomayádon mako intua gamáan in intau mita nongobogá bo intau ango-angoi. Akuoi naa in ki Tuhan Allahmu.

¹¹ Dika monakow, monombodok ande monguboḷ.

¹² Dika modandi podoyon kon tangoi-Ku aka moiko komakusud kon diá mogintompod kon dandi monimu tatua, sin oaid monimu tatua mopoompábímai kon tangoi-Ku. Akuoi in ki Tuhan Allahmu.

¹³ Dika momakisa mogamá ande mogagow kon kapunyaan in tumpaḷa intau. Aka tondan in pinogaidan intau kon inimu dika tahangonmu mako, umpaka tongáka tonggobii.

¹⁴ Dika mogodi-godimai kon intau bongoḷ bo dika mopoḷamboi in batu kon tayowon intau bilog. Moiko mustibí mohoromat bo motoguondok kon i-Nakó, sin Akuoi in ki Tuhan Allahmu.

¹⁵ Moiko musti motuḻid aka monantú kon taḷá; dika momihak kon intau bogá aka taḷánea bo dika moondok kon intau mita inta nooyúon.

¹⁶ Dika moponapud magí-mako in uboḷ kon sigad in intau mita inta tobangusamu, sinbá iko in diá mokopopisí kon kopatoian in tumpaḷa intau. Akuoi in ki Tuhan.

¹⁷ Dika motagú mako kon gina kon i ineka. Tompiadon bui in yogenggengmu takin i ineka, sinbá moiko diá baradosaan popisí in intau ibanea.

¹⁸ Dika mopotuḻí in yaat in ginamu bo dika moyaat in gina kon intau ibanea, táe kotabibí in tumpaḷa intau ná kototabimu kon awakmu tontaní. Akuoi in ki Tuhan.

¹⁹ Duduiaidon in parenta-Ku mita. Dika mopoyobuḷoi in mahaḷuk inta noyoposi in batangannea. Dika mopomuḷa in doyowa norupa in bibit kon gobá tobatú. Dika moḷutud kon pakeang inta pinomia nongkon siningkoi doyowa inta noyoposi.

²⁰ Aka ḷoḷaki tobatú modandi kon mopotaḷui in ki atánea bobay kon ḷoḷaki ibanea sin podugangnea baḻíon buḷoi tobatú, bo intau inta moibog motaḷui tatua diá noguboḻi, bo kitogi ata inta muna tatua munadon nosiug takin ata tatua, dá taya dua tua musti hukumon, táe diábí motaau hukumon dapot in matoi, sin naondaka yo bobay tatua in umuranpabí doman ki atanea.

²¹ Ḷoḷaki tatua in musti modia kon domba koḷakian tobatú kon tayowon ngara in Ḷoḷaigan-Ku sin baḻíon kuruban toḻiu in karugian.

²² Ki imang musti mopokuruban in domba tatua kon bonu in upacara pondaritan, sinbá dosa intau tatua ampungan. Dá Akuoi, ki Allah in mongampungdon kon inia.

²³ Aka moiko tumuotdon kon butá in Kanaan bo momuḷa kon ayop mita kon tua, dá kon bonu in toḷu notaong dungkuḷ bungainea mita musti anggapon monimu haram bo diá motaau kaanon monimu.

²⁴ Kon taong noginggopat bayongan bungainea musti posumba sin moponiata in sukurmu kon i-Nakó, ki Tuhan.

²⁵ Bain kon taong noginḻima bo motaaudon moiko mokaan kon bungainea. Aka duduian monimu in bayongan atorang tatua, yo bayongan pangkoi in ayopmu modugangdon modatog in bungainea. Akuoi in ki Tuhan Allahmu.

²⁶ Dika mokaan kon dugú. Dika momaké in totaau mita pongonggaing.

²⁷ Dika ḻibuonmu gonsingan in buok kon uḷumu ande mongarug kon kumimu.

²⁸ Dika momai-maismai kon kuḻitmu sin momia kon tanda mita ande monompaḻí kon awakmu sin mobaḻí tanda mobaḷu kon intau minatoi. Akuoi in ki Tuhan.

²⁹ Dika mopoompámai in tangoi i adímu mita bobay takin mopobaḻí kon i monia bobay sundaḷ kon kuil. Aka momia kon natua yo moiko in aindon noporomúmai kon butámu, bo oaid mita inta moromú tatua mongawasadon kon tua.

³⁰ Ḷukadai in singgai in Sabat bo horomatdon in tampat mita inta ain sinantú posumbaan kon i-Nakó. Akuoi in ki Tuhan.

³¹ Dika mayá moigum kon tonggina in boḻian mita inta umuran moḻibó kon dimukud in intau mita inta ain minatoi. Aka aidan monimu intua yo moiko in mobaḻí monajis. Akuoi in ki Tuhan Allahmu.

³² Koinsimbí bo horomat in guyanga mita. Moiko in musti mohoromat bo motoguondok kon i-Nakó, sin Akuoi in ki Tuhan.

³³ Dika mopoaid in diá mopia kon intau angoi-angoi inta nogutun kon butámu.

³⁴ Baḻí in mosia ná intau mita tobangusamu bo kotabidon in mosia ná kototabi monimu kon awak monimu tontaní. Toropdon kon moiko tontaní nokoimontan doman nobiag nobaḻí intau ango-angoi kon butá in Mesir. Akuoi in ki Tuhan Allahmu.

³⁵ Dika monombodok kon intau ibanea takin mopomaké in ukuran, simbangan ande pogogukuran inta diá moitutui.

³⁶ Paké in meter, simbangan ande ukuran inta mobanar. Akuoi ki Tuhan Allahmu, bo Akuoi aindon nodia kon i monimu iḻumuai nongkon Mesir.

³⁷ Duduiaidon in bayongan hukum bo parenta-Ku. Akuoi in ki Tuhan.”