IMAMAT 18 - Alkitab Singog In Mongondow Masa In Tanaa

Kokokudus in tonibuḷoi

¹ Ki Tuhan nopotabá kon i Musa

² mopotaau kon bangusa Israel in parenta tanaa, “Akuoi naa in ki Tuhan Allahmu.

³ Dikabí dumayan kon dodia intau kon Mesir, tampat inta perna pinogutunan monimu, ande dodia in intau Kanaan, inta pinodiaan-Ku kon i monimu masai naa.

⁴ Duduiaidon in hukum-Ku mita bo aidai in onu inta pinoki aid-Ku kon inimu. Akuoi naa in ki Tuhan Allahmu.

⁵ Duduiaidon in atorang mita bo hukum mita inta ogoi-Ku kon i monimu. Aka aidan monimu in natua, mosaḷamat in kobobiagmu. Akuoi naa in ki Tuhan.”

⁶ Ki Tuhan nobogoi in atorang mita tanaa: Dika siuganmu in ginaḷummu.

⁷ Dika siuganmu in ki inámu, inta ki buḷoi amámu, sin sia in hakbí i amámu.

⁸ Dika mopoonagmai kon i amámu takin mosiug moyotakin i buḷoinea tobatú inta kon sigad i buḷoinea ibanea.

⁹ Dika siuganmu in ki utatmu bobay ande ki utatmu uatok, pinomayá inta pinoyobiag takinmu ande inta diá pinoyobiag takinmu.

¹⁰ Dika siuganmu in ki ompumu; tua in mokopooyábímai kon inimu tontaní.

¹¹ Dika siuganmu in ki utatmu bobay inta toamáan táe noyoposi kon iná ande toináan táe noyoposi kon amá, sin sia in ki utatmubí doman.

^12-13 Dika siuganmu in pokuináanmu, pinomayá sia ginaḷum i amámu ande i inámu.

¹⁴ Dika siuganmu in ki buḷoi in pokuamáanmu, sin sia in pokuináanmubí doman.

¹⁵ Dika siuganmu in ki mototakamu

¹⁶ ande ki buḷoi i guya-guyangmu.

¹⁷ Dika siuganmu in adí ande ompu in tobatú bobay inta ain kinotontaḷáanmu. Sin dikabo sia tua in ki adímubí, bo tua in oaidbí inta diá mopia.

¹⁸ Dika motonibuḷoi takin i utat i buḷoimu aka ki buḷoimu nobiagpa.

¹⁹ Dika siuganmu in tobatú bobay inta inangoinea, sin sia tua in nonajispabí

²⁰ Dika mosiug takin ki buḷoi intau ibanea; oaid tatua mokopopisí kon inimu monajis.

²¹ Dika mobogoi in adímu tongáka tobatú sin pokuruban kon bonu in posumbaan kon i dewa Molokh, sin oaid tatua mopoompábímai kon tangoi i Allah, ki Tuhanmu.

²² Ḷoḷaki diábí motaau in mososiugan takin doman ḷoḷaki; kinodoíbí i Allah in oaid natua.

²³ Ḷoḷaki ande bobay diábí motaau mongibog kon mahaḷuk; sin oaid diá mopia tatua mokonajis kon i monimu.

²⁴ Awakmu dika ponajison in oaid mita tatua, sin natuata in dodia in bangusa mita inta nogutun kon Kanaan kon tungkuḷ in moiko diápa kon tua mosia noponajisdon in awak monia. Tuamai mosia inuntun i Tuhan, sinbá moiko motaaudon mogutun kon butá tatua.

^25-27 Mosia ain nomia kon bayongan oaid inta mokorongó tatua, dapot in butá monia nobaḻídon nonajis. Dá i hukum i Tuhan in mosia bo diádon inogoi nogutun kon tua. Táe moiko in dika mokoimontanmai in momia kon oaid mita natua. Moiko komintan, intau Israel bo intau ango-angoi inta nogutun noyotakin monimu, musti umuran dumudui kon atorang bo parenta i Tuhan,

²⁸ sinbá moiko diá hukumon-Nea bo poguntunon nongkon butá tatua ná intau mita inta diá nonotaau kon i Tuhan, inta nogutun kon tua wakutu in moiko diápa.

²⁹ Kinotaauan monimu kon ki ine in momia kon oaid inta mokorongó tatua diá bidon poyoiapon anggota in umat i Allah.

³⁰ Dá ki Tuhan noguman, “Duduiaidon in atorang mita inta inogoi-Ku bo dikadon dumayan kon dodia in intau mita inta nogutun kon butá in Kanaan wakutu in moiko diápa nogutun kon tua. Dika moponajis in awakmu tontaní takin momia kon oaid mita tatua. Akuoi ki Tuhan Allahmu.”