IMAMAT 17 - Alkitab Singog In Mongondow Masa In Tanaa

Atorang soaḷ dugú

¹ Ki Tuhan nopotabá kon i Musa

² mopotaau in atorang mita tanaa kon i Harun, kon i adínea mita bo kon bayongan umat Israel.

^3-4 Aka intau tobatú nongkon bangusa Israel moposumba in sapi, domba ande bembé kon i Tuhan, mahaḷuk tatua musti ratáannea kon tayowon ngara in Ḷoḷaigan i Tuhan. Aka ratáannea kon tampat ibanea, yo noḷawangdon in sia kon hukum sin nopobutakdon in dugú. Sia in diá bidon iapon anggota in umat i Allah.

⁵ Makusud in parenta tanaa in bá bangusa Israel modia mopoangoi kon Ḷoḷaigan i Tuhan in bayongan mahaḷuk inta baḻíon sosumba monia inta biasamai ratáan monia kon gobá. Mosia in mustibí modia kon sosumba monia tatua kon i imang kon tayowon ngara in Ḷoḷaigan i Tuhan bo ratáan kon tua mobaḻí kuruban dodamean.

⁶ Ki imang in musti mopobutak in dugú in mahaḷuk tatua kon sí in mezbah kon tayowon ngara in ḷoḷaigan i Tuhan bodongka motubá kon ḷongónea sinbá mokosanang kon gina i Tuhan.

⁷ Bangusa Israel musti tantú motoindudui kon i Tuhan bo diábí motaau mokoimontanmai moratá kon mahaḷuk kon gobá mita sin ogoi posumba kon dimukud mita moraat. Atorang tanaa musti umuran duduian modapot kon adí bo ompu.

⁸ Aka intau Israel tobatú ande intau ango-angoi tobatú inta nogutun notantú kon sigad in intau Israel moposumba in kuruban tubáan ande kuruban ibanea

⁹ kon i Tuhan, yo musti posumbanea intua kon tayowon ngara in Ḷoḷaigan i Tuhan. Aka posumbanea intua kon tampat ibanea, yo sia in diádon motaau poyoiapon anggota in umat i Allah.

¹⁰ Aka intau Israel ande intau ango-angoi inta nogutundon notantú kon sigad intau Israel nokaan kon dugú, yo sia hukumon i Tuhan bo diádon poyoiapon anggota in umat i Allah.

¹¹ Nyawa in bayongan mahaḷuk komintanbí kon bonu in dugúnea. Tuamai ki Tuhan nomarenta sinbá bayongan dugú popobutak kon tudu in mezbah sinbá dosa mita in umat popatandon. Dugú inta nyawa tatua, momopat kon dosa.

¹² Tuamai bangusa Israel ande intau ango-angoi inta nogutun kon sigad monia diá ogoi mokaan kon dugú.

¹³ Aka intau Israel tobatú ande intau ango-angoi tobatú inta nogutun notantú kon sigad in bangusa Israel modomok kon ḷagapan ande mahaḷuk ibanea inta diá haram, yo musti poḷuainea in dugú in mahaḷuk tatua bo bumbunannea in butá.

¹⁴ Nyawa in bayongan mahaḷuk in kon dugúneabí, tuamai in diá ogoi i Tuhan in bangusa Israel mokaan kon dugú. Bayongan intau inta mogaid kon onu inta ilarang tatua yo sia in diádon poyoiapon anggota in umat i Allah.

¹⁵ Pomuḷoi in intau Israel ande intau ango-angoi inta mokaan kon tapú in mahaḷuk inta minatoi tontaní ande minatoi sin dinomok in mahaḷuk ibanea, yo musti momatá kon pakeangnea poḷat moinggú bo oḷatonnea dapot in mata in singgai tumoyop, bain tua bo sia mobaḻí modarit.

¹⁶ Aka diá aidannea in tua, yo sia in musti mobaba kon akibatnea.