IMAMAT 16 - Alkitab Singog In Mongondow Masa In Tanaa

Singgai moḷoben pongampungan kon dosa

¹ Naonda in ki adí i Harun inta doyowa minatoi kon tungkuḷ in noposumba in tuḷú inta kinodoí i Tuhan, ki Tuhan noguman kon i Musa,

² kai-Nia, “Potaaudon kon i Harun ki utatmu tua, kon tongábí kon singgai inta ain sinantú sia in motaau tumuot kon Yuang inta Totok in Motusi inta ain sinondí in toḻipoi, sin kon tuata Akuoi mokipogontong kon bonu in goḷom kon ḻimonik in taḷob in Poti Dodamean. Aka ki Harun ḻimimpat kon parenta tatua, yo matoi in sia.

³ Ki Harun motaau tumuot kon bonu in Yuang Totok Motusi aka sia moposumba in sapi koḷakian batánea mobaḻí kuruban potobut kon dosa bo domba koḷakian tobatú baḻíon kuruban tubáan.”

⁴ Moiduduimai kon tua ki Harun musti monarukira kon atorang mita tanaa. Kon tungkuḷ in sia diápa tumuot kon Yuang inta Totok in Motusi sia musti moinggúpa muna bodongka momaké in pakeang imang, inta ḷambung, soḷana mopoḷok, baan bo bogot in uḷu, inta komintan nongkon kaeng linen.

⁵ Bo umat in Israel musti mobogoi in kon i Harun in bembé koḷakian doyowa inta pakéon kuruban potobut kon dosa bo inta bo domba koḷakian tobatú in pakéon kuruban tubáan.

⁶ Ki Harun musti moposumba in sapi koḷakian tobatú mobaḻí kuruban potobut kon dosa kon inia bo kon tombonu in baḷoinea.

⁷ Bembé koḷakian doyowa inta dinia in umat Israel musti diaan kon tayowon ngara in Ḷoḷaigan i Tuhan.

⁸ Kon tua sia musti mopogonik in undi inta batu doyowa, tobatú in sinontandaan “ogoi kon i Tuhan” bo inta tobatú doman in “kon i Azazel”.

⁹ Bembé inta piniḻí kon i Tuhan musti posumba mobaḻí kuruban potobut kon dosa.

¹⁰ Bembé inta kinopiḻían kon i Azazel musti diaan kobia-biag kon tayowon i Tuhan bodongka buntunon pobayá in padang gurun kon i Azazel, sinbá dosa mita in bangusa Israel popatandon.

¹¹ Naonda in ki Harun moposumba bo moratá kon sapi koḷakian inta nobaḻí kuruban potobut kon dosanea bo tombonu in baḷoinea,

¹² musti in sia mogamá kon tampat in tuḷú nongkon mezbah bo bonuannea in baga in tuḷú kopuḻingon bo doyowa noyangkom in dupa moaḷus, bodongka diaannea tumuot kon Yuang Totok Motusi.

¹³ Dupa tatua musti tubáannea kon tayowon in Poti Dodandian, sahingga poyoknea moikoḷubung kon taḷob in poti tatua bo diádon ontongon i Harun, sin aka ontongonnea, yo matoi in sia.

¹⁴ Bo ki Harun musti mogamá kon dugú in sapi topiḻik, bo takin gongguyamúnea tontaní popopisiknea in dugú tatua kon dotá in muna in taḷob in Poti Dodandian bo kopitu doman kon muna in Poti.

¹⁵ Mopaḷut mako kon tua ki Harun musti moratá kon bembé sin pokuruban potobut kon dosa in umat Israel. Dugú in bembé tatua musti diaannea kon Yuang Totok Motusi, bo popopisik kon dotá in muna taḷob in Poti Dodandian bo kon tayowon Poti, ná pinogogaid kon dugú in sapi koḷakian.

¹⁶ Natuata in pogogaid aka mondarit kon Yuang Totok Motusi nongkon kinonajisan in bangusa Israel bo bayongan dosa monia. Ḷoḷaigan i Tuhan musti daritan sin noitoyuak kon ḷoḷaigan in bangusa Israel bo kinotugatan in kinonajisan monia.

¹⁷ Pinangkoi kon dodai in ki Harun tumuot kon Yuang Totok Motusi sin momia kon upacara pondaritan modapot in sia ḷumuai, diá tobatúmai in motaau kon bonu in Ḷoḷaigan tatua. Naonda in mopaḷut mako in sia momia kon upacara potobutan kon dosanea bo kon tombonu in baḷoinea bo dosa in bayongan bangusa Israel,

¹⁸ ki Harun musti ḷumuai bo mayá kon mezbah in kuruban tubáan sin mondarit kon mezbah tatua. Sia in musti mogamá kon dugú in sapi topiḻik bo dugú in bembé bo poḻeponea kon tungoi mita inta kon siku in mezbah.

¹⁹ Musti gongguyamúnea tontaní in pakéonnea mopopisik in dugú topiḻik kopitu kon tudu in mezbah. Natuata in pogogaid ki Harun mondarit kon mezbah nongkon kinonajisan in bangusa Israel, sinbá mobaḻí modarit.

Bembé morondí

²⁰ Naonda in mopaḷut mako momia kon upacara pondaritan kon Yuang Totok Motusi bo tampat mita ibanea kon Ḷoḷaigan i Tuhan takin mezbahnea, ki Harun musti moposumba kon i Tuhan in bembé inta nobiag inta piniḻí kon i Azazel.

²¹ Ḻimanea musti poukatnea kon ḻimonik in uḷu in bembé tatua poḷat mongaku kon bayongan taḷá, dosa bo ḷawang in bangusa Israel. Natuata in pomomamping kon bayongan taḷá in bangusa Israel kon tudu uḷu in bembé tatua. Bo intau tobatú inta ain sinantú musti moguntun kon bembé tatua pobayá in padang gurun.

²² Bembé tatua in modia kon bayongan dosa in bangusa Israel mopobayá in butá inta noḷogatdon bo diádon pinogutunan bo bembé tatua in buḻiandon kon padang gurun.

²³ Mopaḷut mako kon tua ki Harun musti tumuot kon bonu in Ḷoḷaigan, moḷongkut kon pakeang imang inta iḷutudnea kon dodai in sia sinumuot kon Yuang Totok Motusi, bo monaḷámai kon pakeang tatua kon bonunea.

²⁴ Bo sia musti moinggú kon tampat tobatú inta ain sinantú bo moḷutúdon bui kon pakeangnea tontaní. Mopaḷut mako kon tua sia musti ḷumuai bo moposumba in kuruban tubáan sin pongampung kon dosanea tontaní bo dosa in bangusa Israel.

²⁵ Ḷongó in mahaḷuk inta pokuruban potobut kon dosa musti tubáan kon mezbah.

²⁶ Intau inta momuḻi kon bembé kon i Azazel kon padang gurun musti momatá kon pakeangnea bo moinggú kon dodai in sia diápa mobui kon ḷoḷaigan.

²⁷ Sapi koḷakian bo bembé inta pinokuruban potobut kon dosa, inta dugúnea dinia sinumuot kon bonu in Yuang Totok Motusi sin potobut kon dosa, musti diaan poḷuai kon ḷoḷaigan bo tubáan. Kuḻit, tapú bo bonu in sian mahaḷuk doyowa tatua musti tubáan kopayongon.

²⁸ Intau inta motubá kon tua musti momatá kon pakeangnea bo moinggú kon dodai in sia diápa mobui kon ḷoḷaigan.

Pororame kon singgai potobutan kon dosa

^29-31 Atorang mita tanaa musti umuran duduian dapot in adí bo ompu. Kon singgai noginpuḷú buḷan noginpitu, intau Israel bo intau ango-angoi inta nogutun kon sigad monia musti mopuasa bo imaḷowanpa in mogaid, sin singgai tanaa in singgai inta totok in motusi. Kon singgai tatua musti aidan in upacara pondaritan kon bangusa Israel nongkon bayongan dosa monia sinbá mosia modaritdon.

³² Imang Moḷoben, inta ain binaḻí bo inta ain sinantú kon i Allah sin momaḷui kon i amánea, musti mogaid kon upacara pondaritan tatua. Sia musti momaké in pakeang inta ain sinantú,

³³ bo momia kon upacara pondaritan kon Yuang Totok Motusi, tampat mita ibanea nongkon Ḷoḷaigan i Tuhan, mezbah, imang mita bo bayongan umat Israel.

³⁴ Upacara tatua musti aidan totaong in komintan sin pondaritan kon bangusa Israel nongkon bayongan dosa monia. Tuata in atorang mita inta musti umuran duduian monia dapot kon adí bo ompu. Inaidan i Musa intua notongkai ná inta ain pinoguman i Tuhan kon inia.