IMAMAT 15 - Alkitab Singog In Mongondow Masa In Tanaa

Inta monajis kon intau

¹ Ki Tuhan nobogoi kon i Musa in atorang mita tanaa

² kon bangusa Israel. Aka intau ḷoḷaki tobatú oyúon in ḷumoḷayat nongkon dodiaannea popisí in sia nodia kon panyaki doman kon dodiaannea, dá inta iḷumoḷayat tatua in nonajis,

³ pinomayá inta iḻumuai ande inta diá iḻumuai.

⁴ Tampat inta iḻitúan ande pinosiugan in intau tatua in nobaḻí domandon nonajis.

^5-8 Ki ine in moḻiai kon intau oyúon in ḷumoḷayat tatua ande moḻiai kon pinosiugannea, ande ḻimitú kon tampat inta ain iḻitúannea ande dinuyáan in intau tatua, yo musti in sia momatá kon pakeangnea bo moinggú, táe sia monajispabí modapot kon mata in singgai tumoyopdon.

⁹ Ḷoḻitúan in intau inta modia kon kabaḷo ande onukabí inta iḻitúan in intau inta ḷuaian in ḷumoḷayat tatua modaitbí monajis.

¹⁰ Ki ineka in moḻiai kon inta ain iḻitúan in intau tatua, mobaḻí doman monajis modapot kon mata in singgai tumoyop. Bayongan intau inta mobingkat kon barang tatua musti momatá kon pakeangnea bo moinggú, bo sia tontaní in monajispabí doman modapot kon mata in singgai tumoyop.

¹¹ Aka intau inta ḷuaian in ḷumoḷayat tatua diá muna monomok bo moḻiai kon intau ibanea, dá intau inta iḻiainea tatua musti momatá kon pakeangnea bo poḷat moinggú, bo sia in monajis modapot kon mata in singgai tumoyop.

¹² Kuyon butá inta iḻiai in intau tatua musti ḷosion bo pakakat inta kinadaiannea musti batáan.

¹³ Aka intau tatua mopia, dá sia musti mogoḷatpa pitu nosinggai in koonggotnea bui. Mopaḷut mako kon tua sia musti momatá kon pakeangnea bo moinggú kon bokaká, dá modaritdon in sia.

¹⁴ Kon singgai noginwaḷu sia in musti modia kon ḷagapan paḷoma doyowa inta moḻineapa ande moḻi in tarangkuku kon tayowon ngara in Ḷoḷaigan i Tuhan bo posarakannea kon i imang.

¹⁵ Ki imang musti moposumba in ḷagapan tobatú mobaḻí kuruban potobut kon dosa, bo inta tobatú in baḻíon kuruban tubáan. Natuata in pogogaid i imang kon upacara pondaritan kon intau tatua kon tayowon i Tuhan.

¹⁶ Aka ḷoḷaki tobatú bo ḷuaian in buḻe, dá sia in mustibí moinggú táe umuranpabí doman sia nonajis modapot kon mata in singgai tumoyop.

¹⁷ Barang onukabí pinomayá kaeng ande kuḻit inta kinotugatan in buḻe tatua mustibí batáan; barang tatua in monajispabí dapot mata in singgai tumoyop.

¹⁸ Naonda in mopaḷut mako mosiug moyotakin, pinomayá ḷoḷaki ande bobay yo mustibí moinggú, táe mosia in umuranbí doman monajis modapot kon mata in singgai tumoyop.

¹⁹ Bobay tobatú inta yogot angoion buḷan, monajisbí kon bonu in pitu nosinggai. Ki inekabí in moḻiai kon inia mobaḻíbí monajis modapot kon mata in singgai tumoyop.

²⁰ Onukabí in iḻitúan ande pinosiugan in bobay tatua kon bonu in sia inangoineapa yo mobaḻíbí monajis.

^21-23 Ki ine in moḻiai kon tampat inta ain pinosiugan ande iḻitúan in bobay inta inangoinea tatua, mustibí momatá kon pakeangnea bo moinggú, bo sia monajis modapot kon mata in singgai tumoyop.

²⁴ Aka ḷoḷaki tobatú bo mosiug takin bobay inta inangoinea, yo ḷoḷaki tatua in mobaḻí doman monajis kon bonu in pitu nosinggai, bo bayongan tampat inta pinosiugannea mobaḻí doman monajis.

²⁵ Aka bobay tobatú toḷogan in dugú kon dodai in sia deemanpabí angoionnea, ande nopaḷutdon in wakutu inangoinea táe diápa doman mogogai in dugú ḷumuai, dá sia in nonajispabí ná kon dodai in sia inangoinea.

²⁶ Tampat inta pinosiugan ande iḻitúannea kon dodai in kaadaannea natua yo mobaḻí monajis.

²⁷ Ki ine in moḻiai kon tampat tatua mobaḻí doman monajis. Sia musti momatá kon pakeangnea bo moinggú, bo sia in monajispabí modapot mata in singgai tumoyop.

²⁸ Naonda in toḷogan dugú tatua mogogaidon, bobay tatua in musti mogoḷatpa bui modapot in pitu nosinggai. Bain mopaḷut mako kon tua bo modarit in sia.

²⁹ Kon singgai noginwaḷu sia musti modia kon ḷagapan paḷoma doyowa inta moḻineapa ande moḻi in tarangkuku kon i imang kon tayowon ngara in Ḷoḷaigan i Tuhan.

³⁰ Ḷagapan tobatú musti posumba mobaḻí tobutan dosa, bo inta tobatú in posumba baḻíon kuruban inta tubáan. Natuata in pogogaid i imang kon upacara pondaritan kon bobay tatua kon tayowon i Tuhan.

³¹ Ki Tuhan nopotabá kon i Musa moponorop kon bangusa Israel sinbá monarukira mongo kon dodai onda mosia monajis bo diá monajis, sinbá mosia diá moponajis kon Ḷoḷaigan i Tuhan inta kon yua-yuak in ḷoḷaigan monia. Aka mosia moponajis in Ḷoḷaigan tatua, yo matoi in mosia.

³² Natuata in atorang mita soaḷ intau ḷoḷaki inta ḷuaian in ḷumoḷayat popisí in panyakinea kon dodiaan ande ḷuaian in buḻe,

³³ bo soaḷ bobay inta angoionnea, bo soaḷ ḷoḷaki inta mosiug moyotakin in bobay inta inangoinea.