IMAMAT 14 - Alkitab Singog In Mongondow Masa In Tanaa

Upacara pondaritan naonda in mopia mako in takit inta mokobahaya

¹ Ki Tuhan nopotaau kon i Musa

² in atorang mita kon naonda in pogogaid kon upacara pondaritan naonda in mopia mako in takit kuḻit inta mokobahaya. Kon singgai wakutu intau tatua poniatadon kon ain nodarit, sia in musti diaan kon i imang,

³ bo diaan i imang in sia mayá kon ḷuai in ḷoḷaigan. Aka naonda in pinirikisa mako bo noniatadon kon ain nopia,

⁴ dá ki imang mopotabá kon inia modia kon ḷagapan doyowa inta kobia-biagpa inta diá haram, takin doman topongkó in kayu ḷokuyú, tali nopuya tobatú bo hisop totanga.

⁵ Ḷagapan tobatú musti ratáan kon tudu in kuyon butá inta binonuan in tubig modarit nongkon bokaká.

⁶ Ḷagapan inta tobatú doman takin kayu ḷokuyú, tali nopura bo hisop totanga musti poḷodok kon bonu in dugú in ḷagapan inta ain iratá.

⁷ Pisikan i imang in dugú in ḷagapan tatua kopitu in intau inta ain nopia, bo poniata kon sia tua ain nopia, bo poniata doman kon sia in nodarit. Bo ḷagapan inta nobiagpa tatua musti bayáannea buḻian kon padang gurun.

⁸ Onda intua intau tatua musti momatá kon pakeangnea, mokigonsing bodongka moinggú. Dá modaritdon in sia, bo motaaudon tumuot kon ḷoḷaigan, táe kon bonu in pitupa nosinggai bui sia in diápa motaau tumuot kon ḷoḷaigannea tontaní.

⁹ Kon singgai noginpitu sia musti mokigonsing in buok, kumi, koibing bo bayongan bubuḷ inta kon awaknea. Bo sia musti momatá kon pakeangnea bo moinggú. Bain mopaḷut mako kon tua sia modaritdon.

¹⁰ Kon singgai noginwaḷu intau tatua musti modia kon ki adí in domba koḷakian doyowa bo ki adí in domba kobaayan tobatú inta umurdon totaong inta totok in mopia. Koḻikud intua doman topong toḷu nokilo inta ain binauian in ḷana zaitun noyoḷomboi monag in liter.

¹¹ Bo sia musti diaan i imang takin sosumbanea tatua pobayá in tayowon ngara in Ḷoḷaigan i Tuhan.

¹² Ki imang musti mogamá kon ki adí in domba koḷakian inta tobatú tua takin noyoḷomboi monag in liter in ḷana zaitun sin baḻíon kuruban toḻiu in karugian, posumbanea mobaḻí sosumba tonoion kon i Tuhan.

¹³ Ki adí in domba tatua musti ratáannea kon tampat inta ain sinantú poratáan kon mahaḷuk inta pakéon pokuruban potobut kon dosa bo kuruban inta tubáan. Domba tatua musti ratáan kon tua sin kuruban toḻiu in karugian bo kuruban potobut kon dosa tua in totokbí in motusi bo nobaḻí silai i imang.

¹⁴ Ki imang in musti mogamá kon dugú adí in domba topiḻik bo poḻeponea kon bongoḷan koḷanan, kon ki iná in ḻimanea koḷanan bo kon ki iná in sioḷnea koḷanan in intau inta pinoniatadon kon nodarit tatua.

¹⁵ Onda intua ki imang mogamá kon ḷana zaitun topiḻik bo popoaḻinnea kon paḷad in ḻimanea tontaní inta kon dotá in koḷoigi.

¹⁶ Naonda in mopaḷut mako sia mopoḷodok in gongguyamú in ḻimanea koḷanan kon bonu in ḷana, bo popopisik kopitu kon bonu in Ḷoḷaigan i Tuhan.

¹⁷ Bo ḷana topiḻik inta kon ḻimanea musti poḻeponea kon tampat mita inta ain iḻepoannea in dugú, inta kon bongoḷan koḷanan, kon ki iná in ḻima koḷanan, bo ki iná in sioḷ koḷanan in intau inta poniata kon modarit.

¹⁸ Ki agat in ḷana tatua musti pobutak kon uḷu in intau tatua. Natuata in pogogaid i imang kon upacara pondaritan kon intau tatua kon tayowon i Tuhan.

¹⁹ Onda intua ki imang musti moposumba in kuruban potobut kon dosa sinbá intau inta monajis tatua modarit. Mopaḷut mako kon tua musti in sia moratá kon mahaḷuk sin baḻíon kuruban inta tubáan

²⁰ bo posumbanea poyotakinon in kuruban oḷudon kon tudu in mezbah. Natuata in pogogaid i imang kon upacara pondaritan kon intau tatua, bo sia in modaritdon.

²¹ Aka intau tatua nobiag nobogá bo diá mokopooyúon, dá mobaḻí kuruban toḻiu in karugian tatua motaaubí in sia modia kon ki adí in domba tobatú sin baḻíonnea kuruban tonoion kon i Tuhan. Koḻikud intua topong doman tokilo inta ain binauian in ḷana zaitun sin baḻíon kuruban oḷudon, bo ḷomboi monag in liter in ḷana zaitun.

²² Sia musti doman modia kon ḷagapan paḷoma doyowa inta moḻinea ande moḻi in tarangkuku: tobatú in baḻíon kuruban potobut kon dosa bo inta tobatú doman in baḻíon kuruban tubáan.

²³ Bayongan sosumba tatua musti diaannea kon i imang kon tayowon ngara in Ḷoḷaigan i Tuhan kon singgai noginwaḷu upacara pondaritan kon awaknea.

²⁴ Ki imang mogamá kon ki adí in domba bo ḷana zaitun tatua bo posumbanea mobaḻí sosumba tonoion kon i Tuhan, bo tua in mobaḻí silai in imang.

²⁵ Bo ki imang musti moratá kon ki adí in domba tatua bo mopoḻepo in dugú topiḻik kon bongoḷan koḷanan, kon ki iná in ḻima koḷanan, bo kon ki iná in sioḷ koḷanan in intau inta poniata kon nodarit.

²⁶ Ki imang musti mogaḻin kon ḷana topiḻik kon paḷad in ḻimanea koḷoigi

²⁷ bo gongguyamú in ḻimanea koḷanan pakéonnea mopopisik in ḷana tatua kopitu kon bonu in Ḷoḷaigan i Tuhan.

²⁸ Bo ḷana topiḻik inta kon ḻimanea musti poḻepo kon tampat mita inta ain iḻepoan in dugú, inta kon bongoḷan koḷanan, kon ki iná in ḻima koḷanan bo kon ki iná in sioḷ koḷanan in intau inta poniata kon nodarit.

²⁹ Ki agat in ḷana musti popobutak kon uḷu in intau tatua sin pogaidan kon upacara pondaritan kon awaknea tontaní kon tayowon i Tuhan.

³⁰ Onda intua ki imang musti moposumba in ḷagapan paḷoma tobatú inta moḻineapa ande moḻi in tarangkuku

³¹ baḻíon kuruban potobut kon dosa, bo inta tobatú doman ibanea in baḻíon kuruban tubáan poyotakinon in kuruban oḷudon. Natuata in pogogaid i imang kon upacara pondaritan kon intau tatua kon tayowon i Tuhan.

³² Tuata in atorang soaḷ upacara pondaritan mopaḷut mako kinotugatan in panyaki kuḻit inta mokobahaya kon intau inta moyangkó.

Ponopadan kon baḷoi

³³ Ki Tuhan nobogoi kon i Musa bo kon i Harun

³⁴ in atorang mita soaḷ baḷoi inta kinodakitan in ponopadan inta ḷumekep. Atorang mita tanaa pinaké naonda in bangusa Israel sinumuot kon Kanaan, butá inta inogoi i Tuhan kon i monia.

³⁵ Ki ine in mokodungkuḷ kon oyúon in nonopad kon bonu in baḷoinea, musti mopotaau in soaḷ tatua kon i imang.

³⁶ Kon dodai in ki imang diápa namangoi monaridi kon inta nonopad tatua, musti in sia mopotaau muna sinbá bayongan yagi-yagi poḷuaion nongkon bonu in baḷoi tatua. Aka diá, yo onukabí in kon bonu in baḷoi tatua monajisdon komintan. Bo musti in ki imang mamangoi

³⁷ sin monaridi kon nonopad tatua. Aka oyúon in tamak mita mongo budó ande noḻin ḷunow ande nosimpuya inta ontongon ná tumonop kon dinding,

³⁸ ki imang musti monaḷámai kon baḷoi tatua bo kunsíannea pitu nosinggai in koonggotnea.

³⁹ Kon singgai noginpitu sia in musti mamangoi bo monaridi bui. Aka pinonopadan tatua ḷumekep,

^40-41 dá sia musti mokibongkar in dinding inta kinotugatan in ponopadan tatua bo bayongan dinding dotá in bonunea musti karugan. Bo pinongarugan kon pelester bo batu mita tatua musti ḷumbúon kon tampat tobatú inta monajis kon ḷuai in kotá.

⁴² Bo batu mita inta pinoḷuai tatua musti toḻiuan in batu mita inta mobagu. Bayongan dinding in baḷoi tatua musti bui pelesteron toimbaguon.

⁴³ Aka ponopadan tatua momuká bui, bokaka batu mita in baḷoi tatua ain binaḷuian bo dindingnea mita ain kinarugan bo pinelesterdon bui,

⁴⁴ dá ki imang in musti mamangoi bo monaridi bui kon baḷoi tatua. Aka ponopadan tatua bo ḷumekep dá baḷoi tatua in nonajis

⁴⁵ bo musti bongkaron. Batu mita, kayu mita bo bayongan pelesternea musti pobayá in tampat nonajis kon ḷuai in kotá.

⁴⁶ Intau inta sinumuot kon baḷoi tatua kon dodai in iḻingkopan, yo intau tatua nonajisdon nodapot kon mata in singgai tumoyop.

⁴⁷ Ki ine in mosiug ande mongaan kon baḷoi tatua musti momatá kon pakeangnea.

⁴⁸ Táe aka ki imang mamangoidon bo naonda in sinaridinea mako bo diábí in ponopadan nomuká bui naonda in baḷoi tatua pinelester bui, dá musti poniata in imang tatua kon nodarit in baḷoi tatua, sin ponopadan tatua aindon noinggamá komintan.

⁴⁹ Bo kon pondaritan kon baḷoi, dá ki imang musti mogamá kon ḷagapan doyowa, kayu ḷokuyú, tali nopura bo hisop totanga.

⁵⁰ Ḷagapan tobatú in musti ratáannea kon tombutung in kuyon inta binonuan tubig nodarit inta nongkon bokaká.

⁵¹ Bo kayu ḷokuyú, tali nopura, hisop bo ḷagapan inta nobiagpa tatua musti poḷodok kon bonu in dugú in ḷagapan inta ain iratá bo kon bonu in tubig inta modarit tatua. Mopaḷut mako kon tua baḷoi tatua musti pisikannea kopitu.

^52-53 Ḷagapan inta nobiagpa tatua musti buḻiannea kon padang gurun kon ḷuai in kotá. Natuata in upacara pondaritan kon baḷoi, bo baḷoi tatua in nodaritdon.

⁵⁴ Tuata in atorang mita soaḷ panyaki kuḻit inta mokobahaya,

^55-56 soaḷ bobagá mita, tumbobog ande oḷaap mita ande bobagá mita kon awak, bo soaḷ ponopadan kon pakeang ande kon baḷoi.

⁵⁷ Atorang mita tatua mangaḻenea monantú mongo barang tobatú ande intau nodarit mongo diá.