IMAMAT 12 - Alkitab Singog In Mongondow Masa In Tanaa

Upacara pondaritan kon bobay inta bagu nononggadí

¹ Ki Tuhan nobogoi kon i Musa in atorang mita tanaa

² kon bangusa Israel. Aka bobay tobatú mopononggadí in adí ḷoḷaki, dá kon bonu in pitu nosinggai bobay tatua in nonajispabí, notongkai ná kon dodai in sia umaan buḷan.

³ Kon singgai noginwaḷu ki adínea in mustidon toiton.

⁴ Mopaḷut mako kon tua toḷupa nopuḷú bo toḷu nosinggai bobay tatua in nonajispabí sin umuranpa oyúon in dugú ḷumuai. Sia in diábí motaau moḻiai kon barang mita inta pakéon kon ibada bo diá doman motaau tumuot kon Ḷoḷaigan i Tuhan modapot mopaḷut in wakutu pondaritan.

⁵ Aka bobay tobatú mopononggadí in adí bobay, dá kon bonu in mopuḷú bo opat nosinggai bobay tatua in nonajispabí, notongkai ná kon wakutu in sia umaan buḷan. Nopaḷut mako kon tua onompa nopuḷú bo onom nosinggai bui bobay tatua umuranpa nonajis sin tantúpa oyúon dugú ḷumuai.

⁶ Naonda in wakutu pondaritan mopaḷutdon, pinomayá in sia nopononggadí in adí ḷoḷaki ande adí bobay, bobay tatua musti modia kon sosumbanea kon i imang kon tayowon ngara in Ḷoḷaigan i Tuhan. Sosumba tatua in ná batangan ki adí in domba tobatú inta umurdon totaong sin pomiaan kuruban inta tubáan, bo togapang doman in ḷagapan paḷoma inta baḻíon kuruban potobut kon dosa.

⁷ Ki imang musti moposumba in sosumba in bobay tatua kon i Tuhan bo mogaid kon upacara sin pondaritan kon inta monajis kon bobay tatua, dá bobay tatua in modaritdon. Tuata inta musti aidan in bobay naonda in mopaḷut mako mononggadí in sia.

⁸ Aka bobay tatua diá mokopooyúon kon ki adí in domba tobatú, dá sia in mustidon modia kon ḷagapan paḷoma doyowa inta noguodpa ande ḷagapan tarangkuku inta moḻineapa doman: tobatú in aidan kuruban tubáan bo inta tobatú in aidan kuruban potobut kon dosa. Imang musti mogaid kon upacara pondaritan kon inta monajis kon bobay tatua, dá bobay tatua in modaritdon.