IMAMAT 11 - Alkitab Singog In Mongondow Masa In Tanaa

Mahaḷuk mita inta motaau kaanon bo inta diá

¹ Ki Tuhan nobogoi kon i Musa bo kon i Harun in atorang mita tanaa

^2-3 kon bangusa Israel. Bayongan mahaḷuk inta nobiag kon toba inta umuran mongongguyom bo inta konukunea nosilai doyowa, tua in halal bo motaau kaanon.

^4-6 Dika mokaan kon unta, pelanduk bo kelinci. Mahaḷuk tatua in haram sin umpaka sia umuran mongongguyom táe konukunea in diábí noḷosi.

⁷ Dika mokaan kon boké. Mahaḷuk tatua in haram, sin umpaka konukunea noḷosi, táe diá in sia mongongguyom.

⁸ Tapúnea in diábí motaau kaanon bo aka minatoidon yo diábí motaau in kadaian mahaḷuk mita haram tatua.

⁹ Moiko motaaubí in mokaan kon bayongan toyá inta kokokapoi bo kogunap.

^10-12 Mahaḷuk inta nobiag kon bonu in tubig táe diá kokokapoi bo diá doman kogunap tua in harambí, dá diá motaau kaanon, bo aka matoidon dikabí moḻiai kon tua.

^13-19 Kon sigad in ḷagapan mita, inta moiduduimai naa inta diá motaau kaanon sin monajis in: ḷagapan boniá, ḷagapan monikuḷu, bayongan ḷagapan boniá, ḷagapan nasar, kawag, ḷagapan unta, camar, blekok bo ḷagapan mita bangow, undan, ḷagapan kasa bo poniki.

²⁰ Bayongan mahaḷuk kokoḻikipan inta kumuá in mayá, tua in harambí

²¹ koḻikudbí inta mokoḷansik.

²² Dá pangkoḷá, jangkrik bo pangkoḷá noḷunow motaaubí kaanon.

²³ Táe bayongan mahaḷuk ibanea inta kokoḻikipan bo inta kumuá in mayá tua in harambí.

^24-28 Intau tobatú mobaḻí monajis modapot in mata in singgai tumoyop aka sia moḻiai kon mahaḷuk tanaa aka matoidon: Mahaḷuk inta kokonukuan, koḻikudbí in konukunea nosilai bo umuran mongongguyom, bo mahaḷuk inta sioḷnea opat bo kokonukuan. Ki ine in modia kon mahaḷuk natua inta ain minatoi, yo intau tatua musti momatá kon pakeangnea, táe sia tua in umuranpabí nonajis modapot kon mata in singgai tumoyop.

^29-30 Boyod in butá, boyod moḷoben, boyod mointok, buḻiḻik, tumpaḷak mita, landak, ḻibang, bengkarung, kií bo toba-tobandi, tua mita in haram.

³¹ Ki ine in moḻiai kon mahaḷuk tatua kon wakutu in mahaḷuk tatua kobia-biagpa ande minatoidon yo intau tatua in nonajisdon modapot kon mata in singgai tumoyopdon.

³² Aka mahaḷuk tatua minatoidon bo moḷabú kon barang tobatú, dá barang tatua mobaḻí monajis. Barangkabí onu in koḷabúannea, pinomayá nongkon kayu, kaeng, kuḻit ande kaeng sosapi, bo pinakékabí pinongonu in barang tatua. Barang tatua in mustibí tagomonpa muna kon bonu in tubig, táe umuranbí doman monajis modapot kon mata in singgai tumoyop.

³³ Aka mahaḷuk inta minatoidon tatua noḷabú kon bonu in kuyon butá, dá bayongan inta kon bonu in kuyon tatua mobaḻíbí monajis, bo kuyon tatua mustidon ḷosion.

³⁴ Kokaanon inta kotugatan in tubig nongkon kuyon tatua mobaḻí doman monajis, bo tubig inumon inta kon bonu in kuyon tatua monajis doman.

³⁵ Onukabí in koḷabúan mahaḷuk inta ain minatoi tatua mobaḻíbí monajis. Doḷuong ande tungku nongkon butá inta kinoḷabúan in mahaḷuk minatoi tatua in mustibí ḷosion sin nonajis.

³⁶ Koḻikudbí in bokaká ande parigí, yo aka ibanea mako in mobaḻíbí monajis aka koḷabúan in mahaḷuk inta minatoidon tatua.

³⁷ Aka mahaḷuk minatoi tatua bo noḷabú kon batoḷ inta ain inambor, yo batoḷ tatua in umuranbí nodarit.

³⁸ Táe aka batoḷ tatua bo koyot in inagoman kon tubig bo kinoḷabúan in mahaḷuk inta ain minatoi tatua, dá batoḷ tatua in nobaḻídon nonajis.

³⁹ Ki ine in moḻiai kon awak in mahaḷuk halal inta ain minatoi yo sia in nonajisdon modapot kon mata in singgai tumoyop.

⁴⁰ Intau inta nodia ande nokaan kon tapú in mahaḷuk inta minatoi tatua mustibí momatá kon pakeangnea, táe sia in umuranbí nonajis modapot kon mata in singgai tumoyop.

^41-42 Bayongan mahaḷuk inta maya-mayá mako kon tudu in butá, pinomayá inta ḷumandai, inta kosioḷ opat ande mobayong in sioḷnea, tua in harambí bo diábí motaau kaanon.

⁴³ Dika moponajis in awakmu takin mokaan kon mahaḷuk natua.

⁴⁴ Akuoi naa in ki Tuhan Allahmu, tuamai ḷukadaidon sinbá moiko umuran motusi, sin akuoi naa in motusi.

⁴⁵ Akuoi naa in ki Tuhan inta nodia kon i monimu iḻumuai nongkon Mesir, sinbá Akuoi mobaḻí ki Allahmu. Moiko musti motusi, sin Akuoi naa in motusi.

⁴⁶ Tuata in nobaḻí atorang soaḷ mahaḷuk takin doman ḷagapan, mahaḷuk inta nobiag kon bonu in tubig bo inta maya-mayá mako kon tudu in butá naa.

⁴⁷ Moiko in musti motaau mopoyoposi inta modarit bo inta nonajis, kon sigad in mahaḷuk inta motaau kaanon bo mahaḷuk inta diá motaau kaanon.