IḶUAIAN 9 - Alkitab Singog In Mongondow Masa In Tanaa

Bodito noginḻima: Bayongan bobiagon minatoi

¹ Ki Tuhan noguman kon i Musa, “Bayádon pokipodungkuḷai in ki datu, bo pogumandon kon inia kon ki Tuhan, Allah intau Ibrani, noguman: ‘Pomayádon mako in umat-Ku mayá sinbá mosia motaau mosumba kon i-Nakó.

² Aka diá doman ogoimu mayá in mosia,

³ yo poangoi-Kudon in bodito inta totok in motoyang kon bayongan bobiagonmu, pinomayá kabaḷo, keledai, unta, sapi, domba bo bembému.

⁴ Poyoposion-Ku in bobiagon intau Israel bo bobiagon in intau Mesir. Bobiagon intau Israel in diá tobatúmai in matoi.

⁵ Akuoi, ki Tuhan, monantú kon ikoḷomdon in bodito tatua poangoi-Ku.’ ”

⁶ Nopoikoḷomai kon singgai ki Tuhan nogaid kon ná inta ain pinoguman-Nea. Bayongan in bobiagon intau in Mesir minatoi, táe bobiagon intau Israel diábí tobatúmai in minatoi.

⁷ Datu in noḻibó mongoonu in nobaḻí, bo inoumandon kon inia kon bobiagon intau Israel diá tobatúmai in minatoi. Táe datu tantúpabí doman nokopotontogat kon gina bo diápabí doman inogoinea in bangusa tatua mayá.

Bodito noginggonom: Bituḷ

⁸ Tuhan noguman kon i Musa bo kon i Harun, “Pogamádon kon tongonumai noyoyakup in ḷobud nongkon kokuitan. Bo naonda in kon tayowon i datu, musti in ki Musa mopotabud in ḷobud tatua kon ḷangit.

⁹ Dá ḷobud tatua noitabudon kon bayongan butá in Mesir. Bo ḷobud tatua mopomuká in bituḷ mita inta mobotow bo mobaḻí paḻí inta monombobog kon intau bo kon bobiagon.”

¹⁰ Ki Musa bo ki Harun in nogamá domandon kon ḷobud, bo minayá in tayowon i datu. Ki Musa nopotabud in ḷobud tatua kon ḷangit. Bo nomukádon in bituḷ mita inta mobotow nobaḻí paḻí inta motombobog kon intau bo kon mahaḷuk.

¹¹ Mososihir mita diá motaau mamangoi kon tayowon i Musa sin bayongan awak monia nopuḻingdon in bituḷ ná inta kon intau mita in Mesir ibanea.

¹² Táe ki Tuhan nopotontogat doman in gina i datu, bo ná doman inta ain pinoguman i Tuhan, datu in doíbí mopandungmai kon tosingogon i Musa bo i Harun.

Bodito noginpitu: Uyan Eis

¹³ Ki Tuhan noguman kon i Musa, “Ikoḷom doḷo-doḷompa totok iko bayádon pokipodungkuḷ kon i datu, bo potaaudon kon inia kon ki Tuhan, Allah intau Ibrani noguman: ‘Pomayápa mako in umat-Ku mayá sinbá mosia motaau moibada kon i-Nakó.

¹⁴ Sin tanaa Akuoi in mopoangoidon bui in bodito inta deemandon tongá kon pogawai mita bo rayat, táe kon inimu domandon, sinbá kotaauanmu kon diábí in mokoḻiu monik kon i-Nakó in kon dunia naa.

¹⁵ Sin aka kuma Akuoi in noibog nohukum kon inimu bo rayatmu pinongin takit, yo noyopúdon komintan in moiko.

¹⁶ Táe pinomayá-Kupa mako moiko in nobiag, sinbá Akuoi in motaaupa mopoontong in kawasa-Ku kon inimu, sinbá tangoi-Ku totokdon kotaauan in bayongan intau kon dunia naa.

¹⁷ Umpaka natua, iko umuranpabí doman mosiḷantud bo diápa doman ogoimu mayá in umat-Ku.

¹⁸ Ikoḷom doḷo-doḷom ná tanaa, Poangoi-Kudon in uyan eis inta totok in motoyang, ná inta diápa dodai onda in nobaḻí kon Mesir nongkon koḻipod dapot in tanaa mako.

¹⁹ Dá parentaaidon sinbá bayongan in bobiagon bo bayongan in kapunyaanmu inta kon ḷuai pobayádon kon tampat inta moisiung. Bayongan intau bo bobiagon inta kon ḷuai bo inta diádon mokoponiung in matoibí sin koḷabúan in uyan eis.’ ”

²⁰ Tongonumai in pogawai mita moḷantud noondok kon tosingogon i Tuhan. Mosia in nodia kon ata mita bo bobiagon monia sinumuot kon bonu in baḷoi sinbá koḷukadan.

²¹ Táe ibanea in doí nopandungmai kon tompoingat tatua bo sinaḷáanmai monia in ata mita bo bobiagon monia kon tampat popokaanan monia in bobiagon.

²² Bo ki Tuhan noguman kon i Musa, “Tonggódon monik in ḻimamu, bo uyan eis moḷabúdon monag kon bayongan butá in Mesir. Uyan tatua moiḷabú kon intau, bobiagon bo bayongan pinomuḷa kon gobá.”

²³ Ki Musa notonggó monik kon tungkudnea, bo ki Tuhan nopoonag in gotup bo uyan eis, bo kilat moyotampí kon butá. Ki Tuhan nopoangoi

²⁴ in uyan eis inta totok in motoyang sinakinan in kilat bo rosi inta monampí magí mako. Tuata in uyan eis inta totok in motoyang kon bonu in ouman in Mesir.

²⁵ Kon bayongan butá kon tua uyan eis tatua noyompat kon bayongan in yagi-yagi kon gobá, takin doman intau bo bobiagon. Bayongan in pinomuḷa kon gobá nogoguyaat bo pangkoi mita in kayu nongotuaḷ.

²⁶ Tongádon butá in Gosyen, tampat pinogutunan intau mita Israel, in diá kinoonagan in uyan eis.

²⁷ Bo datu in nogoiní kon i Musa bo kon i Harun, bo noguman, “Akuoi ain nogaid kon dosa. Ki Tuhanbí in nobanar, akuoi bo rayatku ain nogaid kon noitaḷá.

²⁸ Posambayangdon kon i Tuhan; totokdon in moyoyiga in kami popisí in gotup bo uyan eis tanaa. Pomayákudon mako in moiko mayá. Donaaidon mogutun kon naa in moiko.”

²⁹ Guman i Musa kon i datu, “Naonda in ḷuaiku kon kotá tanaa, akuoi in buidon motonggó kon ḻima sin mosambayang kon i Tuhan. Gotup in mogogaidon bo uyan eis in mooḷá domandon, sinbá kotaauandon i Tuangku kon dunia naa in ki Tuhanbí in kitogi.

³⁰ Táe kotaauankubí kon ki Tuangku bo pogawai mita i Tuang in diápabí doman moondok kon i Tuhan Allah.”

³¹ Pinomuḷa rami bo makeang, sin rami koyogot momungai, bo makeang koyogot momatu.

³² Táe gandum bo inta monombatoḷ diábí nogoguyaat sin deemanpa semponea.

³³ Bo ki Musa in nonaḷámaidon kon i datu bo minayá in ḷuai in kotá; kon tua sia notonggó kon ḻimanea sin mosambayang kon i Tuhan. Kon dodaipa doman tatua nogogaidon in gotup, uyan eis bo diádon nonguyan.

³⁴ Táe naonda in ki datu nokoontong kon uyan eis nogogaidon takin gotup bo uyan, dá sia buidon nogaid kon dosa. Sia bo pogawainea mita umuranbí nokopotogat kon gina.

³⁵ Ná inta ain pinoguman muna i Tuhan kon i Musa, kon ki datu in diábí mobogoi kon intau Israel mayá.