IḶUAIAN 7 - Alkitab Singog In Mongondow Masa In Tanaa

¹ Ki Tuhan noguman kon i Musa, “Akuoi in mopobaḻí kon inimu naonda bo ki Allah kon tayowon i datu, bo ki utatmu ki Harun in mosingog kon inia mobaḻí nabimu.

² Potaaudon kon i Harun in bayongan inta pinarenta-Ku kon inimu. Potabádon in ki Harun moguman kon i datu kon sia in mustibí mobogoi kon intau Israel monaḷámai kon butá in Mesir.

³ Táe baḻíon-Ku in datu motogat in gina. Iko in diábí pandungonneamai, umpakabí Akuoi mopoangoi in bodito mobarong kon butá in Mesir.

⁴ Tuamai Akuoi in mobogoi in hukuman mobogat kon Mesir, onda intua diaan-Kudon bayongan in bangusa Israel, umat-Ku, ḷumuai nongkon butá tatua.

⁵ Dá intau in Mesir monotaaudon kon Akuoi naa in Tuhan, kon dodai in Akuoi mohukum kon i monia bo modia kon Israel ḷumuai nongkon butá monia”.

⁶ Ki Musa bo ki Harun nogaid kon onu inta ain pinarenta i Tuhan.

⁷ Ki Musa in umur 80 notaong bo ki Harun in umur 83 notaong kon tungkuḷ in mosia minayá kon tayowon i datu in Mesir.

Tungkud i Harun

⁸ Ki Tuhan noguman kon i Musa bo kon i Harun,

⁹ “Aka datu mopoigum kon i monimu mogaid kon ki inta mokoherang mobaḻí bukti, yo potabádon ki Harun mogamá kon tungkudnea bo mopogarab in tungkud tatua kon butá kon tayowon i datu. Tungkud tatua in mobaḷuibí mobaḻí uḷag.”

¹⁰ Dá minayádon in ki Musa bo ki Harun kon tayowon i datu bo nogaid kon onu inta pinoki aid i Allah. Ki Harun nopogarab in tungkudnea kon butá kon tayowonmai i datu bo pogawainea mita, bo tungkud tatua nobaḷui nobaḻí uḷag.

¹¹ Tuamai ki datu in nogoiní doman kon intaunea mita inta mototaau bo inta mososihir, bo mosia in nogaid doman kon ná tua pinongin totaau monia tatua.

¹² Mosia in nopogarab in tungkud monia kon butá bo tungkud mita tatua nobaḷui nobaḻí uḷag. Táe tungkud monia tua iḻiom in tungkud i Harun.

¹³ Umpaka natua, ki datu umuranpa doman motontogat in gina bo doí mopandungmai kon tosingogon i Musa bo i Harun, ná inta ain muna pinoguman i Tuhan.

Mesir pinopoumaan in bodito Tubig nobaḻí dugú

¹⁴ Onda intua ki Tuhan noguman kon i Musa, “Datu tatua totok motogat in gina; diábí ogoinea in intau Israel mayá.

¹⁵ Tuamai bayádon pokipodungkuḷ kon inia in doḷo-doḷom, kon dodai in sia moponag kon Ongkag in Nil. Diadon in tungkud inta motaau mobaḷui mobaḻí uḷag tatua bo oḷatdon in koangoiannea kon bingkí in ongkag.

¹⁶ Pogumandon kon i datu tatua: Ki Tuhan, ki Allah intau Ibrani, nopotabá kon inakó sin mopotaau kon i Tuangku sinbá ogoimudon umat-Nea mayá mosumba kon i-Nia kon padang gurun. Táe umaain tanaa ki Tuangku doí mokidongog.

¹⁷ Tuamai, ki Tuhan noguman nanaa, ‘Nongkon onu in aidan-Ku moiduduimai naa, yo kotaauanmudon kon Akuoibí in ki Tuhan. Tungkud tanaa pomobakku kon tubig in ongkag tanaa, bo tubig tanaa mobaḷuidon mobaḻí dugú.

¹⁸ Toyá mita kon bonunea in matoi, bo ongkag tanaa in mobongkogdon, dá bangusa in Mesir diá motaau monginum nongkon tubig tanaa.’ ”

¹⁹ Ki Tuhan noguman kon i Musa, “Potabádon in ki Harun mogamá kon tungkudnea bo potonggó kon bayongan tubig in Mesir, kon got mita bo kon tabang mita inta kon butá in Mesir. Tubignea in mobaḻídon dugú, bo kon bayongan butá tatua in komintandon oyúon dugú, nodapot in tubig mita kon bonu in pononionan mita kon tubig inta pinomia nongkon kayu bo tampayang mita inta nongkon batu.”

²⁰ Ki Musa bo ki Harun nogaid kon onu inta pinoki aid i Tuhan. Kon tayowon i datu bo pogawainea mita, ki Harun notonggó kon tungkudnea bodongka pinomobak kon tubig in Ongkag Nil, dá tubig in ongkag tatua nobaḷui nobaḻí dugú

²¹ Toyá mita kon bonu in tubig tatua minatoi, bo totokdon in nobongkog, nodapot in intau mita in Mesir diá motaau monginum nongkon tubig tatua. Kon butá in Mesir komintandon oyúon in dugú.

²² Táe intau mososihir mita kon Mesir nomia doman kon natua takin pongotahuan monia, dá ki datu tantú mokopotontogatpa doman kon gina. Ná inta ain pinoguman muna i Tuhan, kon datu in doí mokidongog kon i Musa bo kon i Harun

²³ Sedang bo sia nobuibí minayá in komaḻig bo diábí nopandung topiḻikmai kon onu inta nobaḻí tatua.

²⁴ Bayongan intau in Mesir nongaḻi kon ḻimbuong kon bingkí mita in ongkag tatua sin motayak kon tubig inumon, sin tubig in ongkag tatua diá motaau inumon.

²⁵ Pitudon nosinggai noitaḻib naonda in ki Tuhan nopouma in bodito kon Ongkag in Nil.