IḶUAIAN 6 - Alkitab Singog In Mongondow Masa In Tanaa

Ki Allah nogoiní kon i Musa

¹ Ki Allah in noguman kon i Musa, kai-Nia, “Akuoi naa in ki Tuhan.

² Akuoi nokipogontong kon i Abraham, kon i Ishak bo kon i Yakub mobaḻí ki Allah Inta Totok in Mokawasa, táe Akuoi in diábí ginumuman kon i monia takin tangoi ki ‘Tuhan’.

³ Akuoi nomia doman kon dodandian takin i monia. Akuoi nodandi kon Akuoi in mobogoi kon butá in Kanaan kon i monia, butá tampat kinobiagan monia nobaḻí intau ango-angoi.

⁴ Kinodongogan-Kudon in amui intau Israel inta sinonggata in intau in Mesir, bo kinotoropan-Kudon in dandi-Ku tatua.

⁵ Dá potaaudon kon bangusa Israel kon Akuoi ain noguman: Akuoi naa in ki Tuhan; moiko in pilatan-Ku nongkon pinononggataan in bangusa Mesir. Akuoi in mopoontongdon in kawasa-Ku inta motoyang sin moposaḷamat kon i monimu bo mopoḷabú in hukuman inta mobogat kon bangusa Mesir.

⁶ Moiko in baḻíon-Ku umat-Ku, bo Akuoi in mobaḻí ki Allahmu. Dá kotaauandon monimu kon Akuoi naa in ki Tuhan, Allahmu, inta nopoḷuat kon i monimu nongkon pinononggataan kon Mesir.

⁷ Moiko in diaan-Ku mayá in butá inta pinodandi-Ku takin nongibot kon i Abraham, kon i Ishak bo kon i Yakub; butá tatua in ogoi-Ku kon inimu mobaḻí kapunyaanmu tontaní. Akuoi naa in ki Tuhan.”

⁸ Bayongan koyow i Tuhan tatua pinotaau i Musa kon bangusa Israel, táe mosia in doí mopandungmai kon i Musa, sin pinononggataan inta totok in moraat tatua ain nokoinggamádon kon kamang monia.

⁹ Onda intua ki Tuhan noguman kon i Musa,

¹⁰ “Bayádon kon tayowon i datu in Mesir bo poguman kon mustibí ogoinea in bangusa Israel monaḷámai kon butánea.”

¹¹ Táe ki Musa in notubag, “Intau Israel tontaní doí mokidongog kon inakó. Yo umpaka dá ki datu in Mesir moibog mokidongog kon intau inta diá motoḻindat ná akuoi naa?”

¹² Natuata in pinopopotabá i Tuhan kon i Musa bo kon i Harun sin mopotaau kon bangusa Israel bo kon i datu in Mesir kon mosia in pinotabábí i Tuhan modia kon intau in Israel ḷumuai nongkon butá in Mesir.

Mogoguyang i Musa bo i Harun

¹³ Naa in mogoguyang i Musa bo i Harun: Ki Ruben, ki adí guya-guyang i Yakub, kogadí kon adí ḷoḷaki opat: ki Henokh, ki Palu, ki Hezron, bo ki Karmi. Mosia tua in mogoguyang in suku i Ruben.

¹⁴ Ki Simeon bo ki buḷoinea inta bobay in Kanaan kogadí kon adí ḷoḷaki onom: Ki Yemuel, ki Yamin, ki Ohad, ki Yakhin, ki Zohar bo ki Saul. Mosia tua in mogoguyang in suku Simeon.

¹⁵ Ki Lewi kogadí kon adí ḷoḷaki toḷu: ki Gerson, ki Kehat bo ki Merari; mosia tua in nobaḻí mogoguyang in suku Lewi. Umur i Lewi in 137 notaong.

¹⁶ Ki Gerson kogadí kon adí ḷoḷaki doyowa: ki Libni bo ki Simei; nobarong in buí monia.

¹⁷ Ki Kehat kogadí kon adí ḷoḷaki opat: ki Amram, ki Yizhar, ki Hebron bo ki Uziel. Umur i Kehat 133 notaong.

¹⁸ Ki Merari kogadí kon adí ḷoḷaki doyowa: Ki Mahli bo ki Musi. Tuata in inanakan in suku Lewi takin buí mita monia.

¹⁹ Ki Amran in notonibuḷoi i Yokhebed, ki ai-ai bobay i amánea, bo ki adí monia in ki Harun bo ki Musa. Umur i Amran in 137 notaong.

²⁰ Ki Yizhar kogadí kon adí ḷoḷaki toḷu: ki Korah, ki Nepeg bo ki Zikhri.

²¹ Ki Uziel doman kogadí kon adí ḷoḷaki toḷu: ki Misael, ki Elsapan bo ki Sitri.

²² Ki Harun notonibuḷoi i Eliseba, ki adí bobay i Aminadab; ki Eliseba in mogutat doman i Nahason. Ki Eliseba nopononggadí kon i Nadab, Abihu, Eleazer bo kon i Itamar.

²³ Ki Korah kogadí kon adí ḷoḷaki toḷu: ki Asir, ki Elkana bo ki Abiasap. Mosia tua in mogoguyang nai Korah.

²⁴ Ki Eleazer, adí ḷoḷaki i Harun, notonibuḷoi i adí i Putiel tobatú, bo ki adí monia tua in ki Pinehas. Tuata in bayongan tongguḷu in inanakan bo tongguḷu in baḷoi in suku Lewi.

²⁵ Ki Harun bo ki Musa tuata inta pinarentaan i Tuhan modia kon intau mita Israel ḷumuai nongkon butá in Mesir.

²⁶ Taya dua minayá kon tayowon i datu in Mesir sinbá sia mopoḷuatdon kon intau israel.

Ki Tuhan nobogoi in parenta kon i Musa bo kon i Harun

²⁷ Tungkuḷ in ki Tuhan noyosingog i Musa kon Mesir,

²⁸ Ki Tuhan noguman, “Akuoi naa in ki Tuhan. Potaaudon kon i datu in Mesir in bayongan inta ain pinoguman-Ku kon inimu.”

²⁹ Táe ki Musa in notubag, “Tuhan, kinotaauan-Mudon kon akuoi naa in diá motoḻindat mosingog. Dá umpaka yo ki datu moibog mokidongog kon inakó?”