IḶUAIAN 40 - Alkitab Singog In Mongondow Masa In Tanaa

Ki Musa noposindog in Ḷoḷaigan kon i Tuhan

¹ Ki Tuhan noguman kon i Musa,

² “Posindogdon in Ḷoḷaigan-Ku kon tanggal imitánea kon buḷan dungkuḷ.

³ Diadon potuot in Poti Dodandian inta pinobonuan kon Parenta Mopuḷú bo popokoḷobdon in kaeng koḷobnea kon munanea.

⁴ Ukatdon in meja takin touḷutnea mita. Potuot domandon in sioḷ in totuduan togá bo poyongkitdon in togánea.

⁵ Ukatdon in mezbah buḷawan pototubáan kon dupa kon tayowon in Poti Dodandian, bo popobambédon in toḻipoi kon ḷoḻingkop in Ḷoḷaigan.

⁶ Ukatdon in mezbah pototubáan kon kuruban kon tayowon ḷoḻingkop in Ḷoḷaigan.

⁷ Ukatdon in tampat in tubig kon sigad in Ḷoḷaigan bo mezbah tatua, bo bonuaidon in tubig.

⁸ Onda intua bambédon in ḻeag poḻibu kon bosí in Ḷoḷaigan, bo popobambé domandon in toḻipoi ngara in bosínea.

⁹ Onda intua Ḷoḷaigan bo bayongan touḷutnea musti posumbamu kon i-Nakó takin mopoḻepo in ḷana upacara, dá tua komintan tongábí ogoi kon i-Nakó.

¹⁰ Posumbadon in mezbah bo bayongan touḷutnea ná tatua, sinbá bayongan intua tongádon ogoi kon i-Nakó.

¹¹ Natua doman in pomiaanmu kon tampat in tubig bo aipnea.

¹² Mopaḷut mako kon tua, potabádon in ki Harun bo ki adínea mita mamangoi kon ngara in Ḷoḷaigan bo mondarit kon awak.

¹³ Ḷutudaidon in pakeang imang kon i Harun, bo butakaidon in ḷana upacara in sia sinbá sia tantúondon tongá mogundoi kon oaidan-Ku mobaḻí imang.

¹⁴ Bo potabádon in ki adínea mita dimiug, bo ḷutudaidon in ḷambung in mosia.

¹⁵ Bo butakai domandon in ḷana in mosia ná ki amá monia, sinbá mosia mobaḻí doman imang inta mogundoi kon i-Nakó. Pinongin mopobutak in ḷana ná tatua, suku monia in umurandon mobaḻí imang modapot kon adí bo ompu monia”.

¹⁶ Inaidan i Musa in bayongan tatua pinodudui kon ná inta pinarenta i Tuhan.

¹⁷ Dá kon tanggal imitánea kon buḷan dungkuḷ kon taong nogindua naonda in bangusa Israel nonaḷámai kon butá in Mesir, Ḷoḷaigan i Tuhan pinosindogdon.

¹⁸ Ki Musa nogukat kon aipnea mita, noposindog in tombaḷoinea mita, nopoyoguḻitdon in kayu mita bilabagnea, bo noposindogdon in oiginea mita.

¹⁹ Bo binukáneadon atop in Ḷoḷaigan takin taḷob in dotá in ḷuai ná inta ain pinarenta i Tuhan.

²⁰ Onda intua batu doyowa tatua pinobonunea kon bonu in Poti Dodandian. Bo ki Musa nopotaḷobdon in taḷob in Poti tatua bo pinoḷutudneadon in kayu tombuḻigannea kon bonu in ḻingkitnea.

²¹ Bo Poti tatua pinotuotneadon kon bonu in Ḷoḷaigan tatua bo binambéneadon in kaeng koḷubung kon tayowonnea, ná inta pinarenta i Tuhan kon inia.

²² Onda intua inukatdon i Musa in meja kon bonu in Ḷoḷaigan, kon dotá in utuan inta kon dotá in ḷuai in toḻipoi,

²³ bo kon tudu in meja tatua inukatdon in roti sosumba, notongkai ná inta pinarenta i Tuhan kon i nia.

²⁴ Sioḷ totuduan in togá inukatnea domandon kon bonu in Ḷoḷaigan, kon dotá in toḷatan, noyogintayow in meja tatua,

²⁵ bodongka pinoyongkit in togá mita tatua kon tayowon i Tuhan.

²⁶ Mezbah buḷawan inukatneadon kon bonu in Ḷoḷaigan, kon tayowon in kaeng,

²⁷ bo sinubánea in dupa mobondu ná inta ain pinarenta i Tuhan kon i Musa.

²⁸ Binambé domandon i Musa in toḻipoi ngara in Ḷoḷaigan,

²⁹ bo kon tayowon ngara tatua inukatneadon in mezbah sin potuduan kon kuruban tubáan. Kon tudu in mezbah tatua pinosumbaneadon in kuruban sinubá bo kuruban sosumba.

³⁰ Porunggu tampat in tubig inukatnea kon sigad in Ḷoḷaigan bo mezbah, bodongka binonuannea in tubig.

³¹ Ki Musa, ki Harun bo ki adínea mita mondarit kon ḻima bo sioḷ monia kon tua,

³² pomuḷoi in mosia tumuot kon bonu in Ḷoḷaigan i Tuhan ande dimiug kon mezbah.

³³ Kon ḻibu in Ḷoḷaigan bo mezbah tatua inoḻingoian i Musa in ḻeag, bodongka binambénea in toḻipoi ngara in bosínea. Dá noḷapatdon oaidan mita tatua.

Goḷom noḻingkup kon Ḷoḷaigan i Tuhan

³⁴ Onda intua noikoḷubungdon monag in goḷom tatua kon Ḷoḷaigan i Tuhan, bo Ḷoḷaigan tatua nobayagdon totok sin ki Tuhan namangoi.

³⁵ Tuamai ki Musa in diá notaau sinumuot kon bonu in Ḷoḷaigan tatua.

³⁶ Pomuḷoi in goḷom tatua momonik nongkon tudu in Ḷoḷaigan i Tuhan, bangusa Israel mongokai kon ḷoḷaigan monia sin pampingon kon tampat ibanea.

³⁷ Táe aka goḷom tatua diá momonik, mosia diábí mobuat nongkon tua.

³⁸ Kon tungkuḷ in bangusa Israel umuranpa kon bonu in binayáan monia, yo ki Tuhan kon Ḷoḷaiganbí tatua inta aka singgai dá naonda bo goḷom bo aka doḷom dá naonda bo tuḷú.