IḶUAIAN 4 - Alkitab Singog In Mongondow Masa In Tanaa

Ki Allah nobogoi kon i Musa in kawasa mogaid kon inta mokoherang.

¹ Bo ki Musa in noguman bui kon i Tuhan, “Táe naonda aka kuma bo intau mita in Israel doí mopirisaya bo diá doman mopandungmai kon tosingogonku mita? Onu in aidanku aka kuma bo mosia in moguman kon ki Tuhan in diábí nokipogontong kon inakó?”

² Ki Tuhan in noḻibó kon i Musa, “Onu in kokada-kadaimu nion?” Tubag i Musa, “Tungkud”.

³ Guman i Tuhan, “Pogarabdon kon butá” Ki Musa nopogarab doman in tungkud tatua, bo tungkud tatua nobaḷui nobaḻí uḷag bo ki Musa in noḷagui iyumayú

⁴ Ki Tuhan noguman kon i Musa, “Diugaidon in uḷag tatua, bo kadaiaidon in iputnea” Ki Musa in dinimiug domandon bo dinomokneadon in uḷag tatua bo nobaḻídon bui tungkud naonda in kinadaiannea.

⁵ Guman i Tuhan, “Aidaidon in natua sinbá intau mita Israel mopirisaya kon Akuoi, ki Tuhan, Allah in mogoguyang monia, ki Allah i Abraham, i Ishak bo Yakub, aindon nokipogontong kon inimu.”

⁶ Ki Tuhan noguman bui kon i Musa, “Pobonuka in ḻimamu kon ḷambungmu.” Dinuduian doman i Musa, bo naonda pinoḷuainea bui in ḻimanea, ḻimanea tatua nobaḻídon nobudó totok sin kinotugatan in panyaki kusta.

⁷ Bo ki Tuhan noguman, “Buika pobonu in ḻimamu kon ḷambungmu.” Dá dinuduian doman i Musa in guman tatua, bo naonda in pinoḷuaineadon bui, nopiadon bui in ḻimanea tatua.

⁸ Guman i Tuhan, “Aka mosia doí mopirisaya kon inimu, ande diá moyakin naonda in mokoontong kon inta mokoherang muna tatua, dá inta mokoherang tanaa in mokopobaḻíbí kon i monia mopirisaya.

⁹ Aka mosia diápa doman mopirisaya kon inimu umpaka ain nokoontong kon inta mokoherang induanea tanaa, bo mosia doí doman mopandungmai kon tosingogonmu mita, yo pogamádon kon tubig topiḻik nongkon Ongkag Nil bo pobutakdon kon butá. Tubig tatua in mobaḻíbí dugú.”

¹⁰ Táe ki Musa in noguman, “O, Tuhan, akuoi naa intaubí inta diá motoḻindat in mosingog, koḻipod ande masai naa, naonda in ki Tuhan nosingog kon inakó. Mobogat in diláku, moḷaḷoi bo diá motoḻindat.”

¹¹ Ki Tuhan in noguman kon inia, “Ki ine in nobogoi in bibig kon intau? Ki ine in nopobaḻí sia bobó ande bongoḷ? Ki ine in nopobaḻí kon inia nokoontong ande bilog? Diábí kinotaauanmu kon Akuoibí naa?

¹² Tanaa mako, bayádon, Akuoi in motuḷung kon inimu mosingog bo motundú kon onu inta musti pogumanmu.”

¹³ Táe ki Musa in notubag, “Akuoi in mopoigum, dikadon mopotabá kon inakó mayá, kaasí Tuhan, potabádon in intau ibanea.”

¹⁴ Bo ki Tuhan in sinumorúdon kon i Musa bo noguman, “Kinotaauan-Ku kon oyúon in kiutatmu ḷoḷaki tobatú inta ki Harun in tangoinea? Kinotaauan-Ku kon sia tua in mopandoibí mosingog. Sia tua in niondon tayo-tayow mangoi mopoangoi in naa, bo mopiabí in ginanea moyodungkuḷmu.

¹⁵ Pongongumandon takinnea bo potaaudon kon inia onu inta musti singogonnea. Akuoi in motuḷungbí kon i namunda bo motundú kon onu in musti singogon bo aidan.

¹⁶ Sia in mustibí mosingog podoyon kon tangoimu kon tayowon in umat. Sia in mobaḻí tondoḷ in bibigmu bo iko inanggapnea naonda bo ki Allah inta moguman kon onu inta musti singogonnea.

¹⁷ Diadon in tungkud tatua, iko in mogaidbí kon onu mita inta mokoherang takin mopomaké in tungkud tatua.”

Ki Musa nobui kon Mesir

¹⁸ Nopaḷut mako kon tua ki Musa nobui kon baḷoi i Yitro, ki nunutonnea, bo noguman kon inia, “Ogoiaipa akuoi in wakutu mobui kon Mesir sin mayá moindoi kon i utatku mita bo moindoi doman mongo nongobiagpa in mosia.” Ki Yitro in noguman kon i Musa, “Bayádon takin pia-pia mako.”

¹⁹ Kon tungkuḷ in ki Musa kon butápa in Midian, ki Tuhan noguman kon inia, “Pobuidon kon Mesir. Bayongan intau inta moibog moḻimod kon inimu minatoidon komintan.”

²⁰ Dá ki Musa in nonongganut kon i buḷoinea bo kon i adínea mita bo pinotakoineadon in mosia kon keledai bodongka nobuat takin i monia minayá in Mesir. Podudui in parenta i Allah, ki Musa in nodia doman kon tungkudnea.

²¹ Ki Tuhan noguman kon i Musa, “Akuoi ain nobogoi in kawasa kon inimu mogaid kon inta mokoherang mita. Dá aka iko mobuidon kon Mesir, yo aidaidon in bayongan inta mokoherang tatua kon tayowon i datu Mesir. Táe baḻíon-Kubí in sia motontogat in gina, dapot in diábí ogoinea in bangusa tatua mayá.

²² Bo pogumandon kon i datu tatua kon Akuoi, ki Tuhan, nongoyow nanaa: ‘Israel in ki adí-Ku inta guya-guyang,

²³ bo iko ain pinarentaan-Ku sinbá mobogoi kon i adí-Ku tatua mayá sinbá sia in motaaudon mosumba kon i-Nakó, táe diá inogoimu. Tanaa in Akuoi moḻimodon kon i adímu inta guya-guyang.’ ”

²⁴ Kon tampat tobatú pinonḷoḷaigan kon bonu in binayáan tatua, ki Tuhan namangoi kon i Musa sin moḻimod kon inia.

²⁵ Bo Ki Zipora ki buḷoinea, nogamá kon batu moḷanit bo pinonoit kon i adínea, bodongka pinoḻiainea kon sioḷ i Musa. Guman i Zipora, “Iko buḷoi inta dinugúku.”

²⁶ Soaḷ tatua siningognea pinopodoyonan in upacara ponoitan. Dá ki Tuhan diá nobaḻí noḻimod kon i Musa.

²⁷ Kon dodai intua ki Tuhan noguman kon i Harun, “Bayádon kon padang gurun mokipodungkuḷ kon i Musa.” Ki Harun minayá, bo noyodungkuḷ i ai-ainea kon buḷud motusi, bo inayokannea in ki Musa.

²⁸ Ki Musa in nongonguman kon i Harun kon bayongan inta pinoguman i Tuhan kon inia tungkuḷ in sia pinotabá mobui kon Mesir, pinotaaunea doman in bayongan inta mokoherang inta musti aidannea.

²⁹ Onda intua ki Musa bo ki Harun minayá in Mesir bo nosipun kon bayongan itoi Israel.

³⁰ Ki Harun nopotaau kon i monia in bayongan inta pinoguman i Tuhan kon i Musa, bo ki Musa in nogaid kon bayongan inta mokoherang kon tayowon intau mita tatua.

³¹ Dá nopirisayadon in mosia, bo naonda in dinongog monia kon ki Tuhan ain noḷongow kon bangusa Israel bo noindoidon kon bayongan roriga monia, mosia in sinumungkud bo nosumba.