IḶUAIAN 39 - Alkitab Singog In Mongondow Masa In Tanaa

Pakeang in imang

¹ Ki Bezaleel bo ki Aholiab nodagum kon pakeang pakéon kon ibada, pinomia monia nongkon kaeng wol nobidu, nokamumu bo nopura sin pakéon in imang kon dodai in mosia mopobayá in oaidan monia kon bonu in Yuang Motusi. Pakeang in imang inta pakéon i Harun pinomia ná inta pinarenta i Tuhan kon i Musa.

² Epod pinomia nongkon kaeng linen moaḷus, wol nobidu, nokamumu bo nopura, bo siningkoi buḷawan.

³ Mosia nonontaḷ kon sibatúan in buḷawan bodongka pinongko-pongkó monia pinomia siningkoi inta moaḷus, bo dongka ginaboḷ pinoyotakin in kaeng linen moaḷus bo wol nobidu, nokamumu bo nopura.

⁴ Nopaḷut mako kon tua pinomiaan doman kon doyowa in tali obaga inta nobaḻí tontogot in epod inta pinopodagum kon sínea.

⁵ Baan inta ginaboḷ kino aḷus musti pomiaan nongkon touḷut inta motongkai bo popodagum kon epod tatua dá motobatúdon ná podudui kon inta ain pinarenta i Tuhan kon i Musa.

⁶ Mosia nogatá kon batu delima bodongka pinopobonu monia kon bongkow buḷawan. Kinurig monia kinopira in tangoi adí mita i Yakub inta mopuḷú bodoyowá kon batu tatua.

⁷ Onda intua batu mita tatua pinopotuogdon kon tontogot in obaga in epod mobaḻí tomponuot in tompoingat kon suku Israel inta mopuḷú bodoyowá, ná inta pinarenta i Tuhan kon i Musa.

Oḻingoi in dodob

⁸ Ki Bezaleel bo ki Aholiab nomia kon oḻingoi in dodob nongkon touḷut inta notongkai in touḷut inta pinomia epod, bo sinuji doman kinotongkai.

⁹ Sinonggopat bo kinopí doyowa, kooḷad bo kobanatnea tumpaḷa tododoyowa nopuḷú bodoyowá nosenti.

¹⁰ Kon oḻingoi in dodob tatua pinokompit monia in opat nopipid in batu permata. Kon pipid inta muna pinakéan monia in batu delima, topas bo baiduri sepah.

¹¹ Kon pipid nogindua in zamrud, batu nilam bo intan.

¹² Kon pipid nogintoḷu in batu lazuardi, akik bo batu kecubung.

¹³ Kon pipid noginggopat in batu pirus, yakut, bo ratna cempaka. Batu permata mopuḷú bodoyowá tatua sinogot in buḷawan.

¹⁴ Kon batúan in batu permata inurig in tangoi i adí i Yakub tobatú inta kon sigad in mopuḷú bodoyowá mobaḻí tomponuot in tompoingat kon suku mita Israel.

¹⁵ Bo nomia kon rante nongkon buḷawan taakan inta iḷubid ná tontogot.

¹⁶ Pinomia doman in ḻingkit buḷawan doyowa inta pinoḷutud kon ubung doyowa in oḻingoi in dodob tatua.

¹⁷ Bo rante buḷawan doyowa tatua pinobonu kon ḻingkit mita tatua,

¹⁸ bo ubungnea doyowa ibanea pinopotogot kon bongkow doyowa, dá oḻingoi in dodob tatua motaaudon poyoguputon takin dotá in muna in tontogot obaga inta nongkon epod.

¹⁹ Bodongka pinomia bui in ḻingkit buḷawan doyowa inta pinopoḷutud kon oḻingoi in dodob tatua, kon ubungnea kon ḻimonag dotá in bonunea inta kinodoyotan in epod.

²⁰ Nopaḷut mako kon tua pinomia doman in ḻingkit buḷawan doyowa inta pinoḷutud kon dotá in muna kon tontogot obaga doyowa in epod, kon diug in pinotondoḷan kon pinodaguman kinoḻin onag, kon ḻimonik in baan inta ginaboḷ kino aḷus.

²¹ Podudui in parenta i Tuhan kon i Musa, ḻingkit oḻingoi in dodob poyotondoḷon in tontogot nobidu kon ḻingkit in epod, dá oḻingoi in dodob tatua umuran moiukat mako kon ḻimonik in baan bo diá moḷuat.

Momia kon pakaeng ibanea sin ḷutudon in imang mita

²² Jubah inta iḷutud kon ḻimonik in epod, komintanbí pinomia nongkon wol nobidu.

²³ Bubú in sigogownea inirigonan in pita inaboḷ sinbá diá mogampang moberak.

^24-26 Kon ḻibu-ḻibu in bingkínea mita kon dotá in ḻimonag pinomiaan kon ḷambá ná bungai in delima inta pinomia nongkon kaeng linen moaḷus bo wol nobidu, nokamumu bo nopura, bo pinoyoḻimban in giring-giring buḷawan, podudui in parenta i Tuhan kon i Musa.

²⁷ Mosia in nomia doman kon ḷambung kon i Harun bo kon i adínea mita,

²⁸ suruban doman, destar bo soḷana nopoḷok nongkon kaeng linen,

²⁹ bo baan nongkon kaeng linen moaḷus, wol nobidu, nokamumu bo nopura, bo pinosujian doman kon ḷambánea, ná inta pinarenta i Tuhan kon i Musa.

³⁰ Pinomiaan doman kon ḷambá nongkon buḷawan totokea, nobaḻí tomponuot kon mosia aindon sinondí sin mogundoi kon i Tuhan. Kon ḷambá tatua inukirdon in tosingogon tanaa “Sinondí mogundoi kon i Tuhan”

³¹ Ḷambá tatua pinokompit kon suruban inta kon dotá in munanea, pinodudui kon parenta i Tuhan kon i Musa.

Oaidan tatua iniḷapatan

³² Kinotontumiannea noḷapatdon in bayongan oaidan momia kon Ḷoḷaigan i Tuhan. Intau Israel ain nogaid kon bayongan yagi-yagi ná inta pinarenta i Tuhan kon i Musa.

³³ Dinia monia in Ḷoḷaigan tatua takin touḷutnea kon i Musa, kokaudnea mita, kayu mita bilabagnea, oigi mita bo aipnea,

³⁴ taḷobnea inta nongkon kuḻit in bembé koḷakian inta binoréan nopura, taḷobnea inta nongkon kuḻit moaḷus, kaeng koḷobnea.

³⁵ Poti Dodandian inta pinobonuan kon batu doyowa takin kayu tombuḻigan bo taḷobnea,

³⁶ meja bo bayongan touḷutnea bo roti sosumba,

³⁷ sioḷ in totuduan togá inta nongkon buḷawan totokea, togánea mita takin bayongan touḷutnea, ḷana inta pakéon kon togá,

³⁸ mezbah nongkon buḷawan, ḷana inta pakéon kon upacara, dupa mobondu, toḻipoi in ḷoḻingkop in Ḷoḷaigan,

³⁹ mezbah porunggu takin kawa sinoḷatak inta pinomia nongkon porunggu, kayu tombuḻigan bo bayongan touḷutnea; tampat in tubig ponondaritan takin aipnea,

⁴⁰ ḻeag mita inta pakéon kon bosínea bo oiginea mita takin aipnea, toḻipoi in ngara bosínea takin tontogotnea mita, oigi mita in Ḷoḷaigan; bayongan in pakakat inta pinaké kon bonu in Ḷoḷaigan,

⁴¹ bo pakeang imang inta pakéon kon ibada kon dodai in mosia mogaid kon oaidan monia kon bonu in Yuang Motusi bo pakeang inta tongá sinantú kon i Harun bo kon i adínea mita.

⁴² Intau mita in Israel ain nogaid kon tua mita notongkai ná inta pinoki aid i Tuhan kon i Musa.

⁴³ Pinirikisa i Musa intua komintan bo inindoianneamai yo inaidan monia intua notongkai totok ná inta ain pinoki aid i Tuhan. Bo binarakatandon i Musa in mosia.