IḶUAIAN 37 - Alkitab Singog In Mongondow Masa In Tanaa

Pinomiaan kon Poti Dodandian

¹ Ki Bezaleel in nomia kon Poti Dodandian nongkon kayu akasia, kobanatnea in mogatut bo mopuḷú nosenti, kooḷad bo koḷantudnea in togogonom nopuḷú bo onom nosenti.

² Dotá in bonu bo ḷuainea inaipan in buḷawan taakan, bodongka pinomiaan kon bongkownea nongkon buḷawan.

³ Onda intua pinomiaannea kon ḻingkit opat nongkon buḷawan sin popobonuan in kayu tombuḻigannea bo tua in pinouḷaknea kon sioḷ in poti opat tatua, takin ḻingkit kon sínea.

⁴ Pinomiaannea doman kon tombuḻigannea nongkon kayu akasia, bo inoḻitannea in buḷawan,

⁵ bo kayu tombuḻigan tatua pinobonunea kon ḻingkit mita inta kon sí in poti tatua.

⁶ Onda intua pinomianea kon taḷobnea tobatú nongkon buḷawan taakan, kobanatnea in mogatut bo mopuḷú nosenti bo kooḷadnea in onom nopuḷú bo onom nosenti.

⁷ Pinomiaannea doman kon kerub doyowa nongkon buḷawan sinontaḷ,

⁸ tumongo batu in kon posipopod in taḷobnea tatua. Kerub doyowa tatua sinobatú takin taḷobnea

⁹ bo pinomia pinoyogintayow, takin koḻikip inta sinongká noioḻingoi kon taḷob in poti tatua.

Meja pototuduan kon roti sosumba

¹⁰ Ki Bezaleel nomia kon meja nongkon kayu akasia, inta kobanatnea waḷu nopuḷú bo waḷu nosenti, kooḷadnea onom nopuḷú bo onom nosenti.

¹¹ Meja tatua inoḻitannea in buḷawan taakan bo kon ḻibunea pinomiaannea kon bongkow nongkon buḷawan.

¹² Bo nomia in sia kon bingkí in meja, kooḷadnea in 7,5 nosenti. Bingkínea tatua mita binongkowannea in buḷawan.

¹³ Pinomiaannea kon ḻingkit opat sin popobonuan in kayu tombuḻigannea bo pinoḷutudnea kon sioḷ in meja opat.

¹⁴ Ḻingkit inta pobonuan kon kayu tombuḻigan tatua pinoguḻit kon diug in bingkí in meja.

¹⁵ Kayu tombuḻigan tatua pinomia nongkon kayu akasia bo inoḻitan in buḷawan.

¹⁶ Sia in nomia doman kon pindan mita, palo mita, kendi mita bo mangko mita sin pobonuan kon anggur inta poposumba. Bayongan touḷut in meja tatua pinomianea nongkon buḷawan taakan.

Sioḷ in pototuduan kon togá

¹⁷ Ki Bezaleel nomia kon sioḷ in pototuduan kon togá nongkon buḷawan taakan. Aip bo kokadaiannea pinomia nongkon buḷawan sinontaḷ. Bungang mita ḷambá, takin dáun bo poḷapánea sinobatú takin kokadaiannea.

¹⁸ Kon kokadaian tatua pinomiaan kon tanga onom, tumototoḷu in tanga kon sínea posibotak.

¹⁹ Kon batúan in tanganea pinomiaan kon ḷambá inta bungang badam toḷu takin dáun bo poḷapánea.

²⁰ Kon kokadaiannea pinomiaan kon ḷambá inta bungang badam opat takin dáun bo poḷapánea.

²¹ Kon ḻimonag in tanga mita tatua pinomiaan doman kon dáun tobatú.

²² Bayongan sioḷ totuduan in togá tatua takin dáun bo tanganea mita pinomia nongkon buḷawan taakan inta sinontaḷ.

²³ Kon sioḷ totuduan in togá tatua pinomianea kon togá pitu takin pakakat ponondarit kon sumbu in togá bo duḷangnea nongkon buḷawan taakan.

²⁴ Buḷawan taakan inta pinaké inaidan sioḷ totuduan in togá takin touḷutnea kobogatnea in toḷu nopuḷú bo ḻima nokilo.

Mezbah pototubáan kon dupa

²⁵ Ki Bezaleel nomia kon mezbah tobatú nongkon kayu akasia sin pototubáan kon dupa. Mezbah tatua notonggopat; koḷanggó bo kooḷadnea in togogopat nopuḷú bo ḻima nosenti bo koḷantudnea in siow nopuḷú nosenti. Bo kon sikunea opat dotá in omonikanea pinomiaan kon tungoi inta pinoyotobatú takin mezbah tatua.

²⁶ Dotá in ḻimonikannea, sínea opat bo tungoinea mita inoḻitan in buḷawan taakan bo ḻibunea in pinomiaan kon bongkow buḷawan.

²⁷ Pinomianea doman kon ḻingkit doyowa kon ḻimonag in bongkow buḷawan kon sínea doyowa sin pogopod kon kayu tombuḻigan in mezbah tatua.

²⁸ Tombuḻigan tatua pinomia nongkon kayu akasia bo inoḻitan in buḷawan.

Ḷana in upacara bo dupa

²⁹ Ki Bezaleel nomia doman kon ḷana in upacara bo dupa totokea inta mobondu, pinoyobauk naonda bo ḷana mobondu.