IḶUAIAN 36 - Alkitab Singog In Mongondow Masa In Tanaa

¹ Ki Bezaleel, ki Aholiab, bo bayongan mogogimok inta nokouḻí kon pandoi bo koahlian nongkon i Tuhan, nonotaau kon bayongan inta toko pakéon kon Ḷoḷaigan i Tuhan. Mosia in musti momia kon bayongan yagi-yagi ná inta ain pinarenta i Tuhan.”

Bangusa Israel nobogoi in salehe noantó

² Ki Musa nogoiní kon i Bezaleel, kon i Aholiab bo bayongan intau inta nokouḻí kon koahlian nongkon i Tuhan bo takin pia in gina mobantung, bo pinoki pomangkoiandon nogaid.

³ Inogoi i Musa kon i monia in bayongan inta pinosalehe in intau Israel sin pakéon pogaid kon Ḷoḷaigan i Tuhan. Táe bangusa Israel umuranpabí doman modia mangoi kon sosumba kon i Musa muḷoi in doḷo-doḷom.

⁴ Bo bayongan in mogogimok inta koyogot mogaid kon oaidan tatua

⁵ nopotaau kon i Musa, “Touḷut mita inta pinosalehe in intau mita tatua aindon noiḻiu kon onu inta toko pakéon kon oaidan inta pinoki aid i Tuhan.”

⁶ Dá pinotaaudon i Musa kon bayongan in ḷoḷaigan kon tugatdon in salehe inta paraḷu pakéon pogaid kon ḷoḷaigan i Tuhan; dá intau mita in diádon nodia bui kon onukadon.

⁷ Touḷut mita inta ain pinosalehe monia noiḻiudon kon tugat pakéon poginḷapat kon oaidan tatua.

Mogogimok mita nomiadon kon Ḷoḷaigan i Tuhan

⁸ Onda intua, ki inta totok in motaau kon sigad in mogogimok mita tatua nomia kon Ḷoḷaigan i Tuhan. Ḷoḷaigan tatua pinomia monia nongkon mopuḷú nopongkó in kaeng moaḷus inta pinoyogaboḷ in kaeng wol nobidu, nokamumu bo nopura, bodongka pinoyogaboḷ doman gambar in kerub.

⁹ Pongkóan in kaeng mita tatua kotongkaion in ukurannea; kobanatnea in mopuḷú bodoyowá nometer, bo kooḷadnea in doyowa nometer.

¹⁰ Ḻima nopongkó in kaeng tatua pinoyotondoḷ nobaḻí ḻeag tobatú, bo ḻima doman nopongkó ibanea pinomia doman natua.

¹¹ Kon bingkí in ḻeag doyowa tatua pinogaidan doman kon tontoyaud nongkon kaeng nobidu,

¹² Toḷoḻima nopuḷú in kon batúan in ḻeag, dá nobaḻí tumongo gapang.

¹³ Bo pinomiaan doman kon ḻima nopuḷú in kokaud buḷawan sin mopoyoguput in ḻeag doyowa tatua.

¹⁴ Nopaḷut mako kon tua mosia in nomia kon atop in Ḷoḷaigan tatua nongkon mopuḷú bomitá in kaeng inta pinomia nongkon bubuḷ in bembé.

¹⁵ Batúan in pongkóannea notongkai in ukurannea, kobanatnea mopuḷú botoḷú nometer bo kooḷadnea doyowa nometer.

¹⁶ Ḻima nopongkó pinoyotondoḷ nobaḻí ḻeag tobatú, bo onom nopongkó ibanea pinomia doman natua.

¹⁷ Ḻima nopuḷú in tontoyaud pinopodagum kon bingkí in ḻeag inta muna bo ḻima nopuḷú doman ibanea pinopodagum kon bingkí in ḻeag inta nogindua.

¹⁸ Bodongka pinomia doman in ḻima nopuḷú in kokaud nongkon porunggu sin mopoyotondoḷ in ḻeag doyowa tatua binaḻí atop in Ḷoḷaigan.

¹⁹ Nopaḷut mako kon tua pinomiaan doman kon taḷobnea doyowa sin pogoḻingoi kon Ḷoḷaigan tatua, tobatú in nongkon kuḻit in domba koḷakian inta binoréan nopura, bo inta ibanea nongkon kuḻit moaḷus.

²⁰ Onda intua mosia nomia kon tombaḷoi mita in Ḷoḷaigan nongkon kayu akasia inta pinosindog kinotuḻid.

²¹ Batúan in tombaḷoi koḷantudnea opat nometer bo kooḷadnea in onom nopuḷú bo onom nosenti.

²² Kon batúan in tombaḷoi pinomiaan kon patok doyowa inta pinoyogapang, dá tombaḷoi mita tatua motaau poyo-poyotondoḷon.

²³ Bo kon dotá in toḷatan Ḷoḷaigan pinomiaan kon doyowa nopuḷú in tombaḷoi,

²⁴ pinakéan in opat nopuḷú in aipnea nongkon saḷaka, tododoyowa kon batúan in tombaḷoi inta popoaip kon patoknea doyowa.

²⁵ Bo kon dotá in Utuan Ḷoḷaigan tatua pinomiaan doman kon doyowa nopuḷú in tombaḷoi,

²⁶ takin doman opat nopuḷú in aipnea inta pinomia nongkon saḷaka, tododoyowa kon batúan in tombaḷoi.

²⁷ Bo kon dotá in tumi in Ḷoḷaigan inta kon dotá in toyopan pinomiaan kon tombaḷoi onom

²⁸ bo tombaḷoi doyowa in kon sikunea.

²⁹ Tombaḷoi mita inta kon sikunea tatua pinoyotondoḷ nongkon sioḷnea nodapot kon dotá in ḻimonikannea. Tombaḷoi doyowa inta nopotonsiku ná tatua.

³⁰ Dá waḷu komintan in kobayong in tombaḷoi takin aipnea saḷaka mopuḷú bo onom, tododoyowa in kon batúan in tombaḷoi.

³¹ Bo pinomia monia in kayu bilabagnea nongkon kayu akasia mopuḷú bo ḻima, ḻima in pakéon kon tombaḷoi mita inta kon sí tobatú in Ḷoḷaigan,

³² ḻima doman in kon sínea ibanea, bo ḻima doman in pakéon kon dotá in tumi in Ḷoḷaigan inta kon dotá in toyopan.

³³ Kayu bilabag inta kon ruak, pinobilabag kinotombotak in koḷantud tombaḷoi, nongkon popod tobatú pinobayá in popod tobatú in Ḷoḷaigan tatua.

³⁴ Tombaḷoi in Ḷoḷaigan bo kayu mita bilabag tatua inoḻitan in buḷawan, bo pinakéan in ḻingkit mita buḷawan sin pogopod kon kayu mita tatua.

³⁵ Mosia in nomia doman kon toḻipoi in ḷoḻingkop nongkon kaeng moaḷus inta pinoyogaboḷ in kaeng wol nobidu, nokamumu bo nopura, bo sinujian doman gambar in kerub.

³⁶ Bo pinosindog doman monia in oigi opat inta pinomia nongkon kayu akasia inta inoḻitan in buḷawan takin doman kokaud buḷawan inta inuḷak kon tudu in aipnea inta saḷaka opat. Oigi tatua pinomia monia sin popobambéan in kaeng tatua.

³⁷ Bo inaidandon in toḻipoi in ḷoḻingkop in Ḷoḷaigan tatua nongkon kaeng moaḷus inta pinoyogaboḷ in kaeng wol nobidu, nokamumu bo nopura bo iḷambáan doman in sujian.

³⁸ Sinbá oyúon in popobambéan kon toḻipoi in ḷoḻingkop dá pinomiaan domandon kon oigi ḻima inta ain pinoyotondoḷ in kokaud mita. Popod mita bo tondoḷ mita in oigi ḻima tatua inoḻitan in buḷawan, táe aipnea ḻima in pinomia nongkon porunggu.