IḶUAIAN 34 - Alkitab Singog In Mongondow Masa In Tanaa

Batu pomomaisan doyowa inta nobagu

¹ Onda intua ki Tuhan noguman kon i Musa, “Pomakangdon kon batu doyowa ná inta muna. Kon batu tatua pomaisan-Ku kon tosingogon mita ná inta koḻipod pinais-Ku kon batu inta ain irumogmu tua.

² Posadiadon ikoḷom doḷo-doḷom sin motakod kon Buḷud in Sinai bo tumayow kon i-Nakó kon tudu in buḷud tatua.

³ Diá tobatúmai intau motaau tumakin kon inimu ande simindog kon dotá in ondakabí kon buḷud tatua. Sapi bo domba mita donaai pomayá mako mayá mokaan kon bonok kon tua.”

⁴ Bo ki Musa in nomakang kon batu tulis doyowa tatua, bo nopoikoḷomai kon singgai doḷo-doḷompa totok sia notakod kon Buḷud in Sinai takin kodia-dia in batu tatua ná inta ain pinoki aid i Tuhan kon inia.

⁵ Dá noponagdon in ki Tuhan kon bonu in goḷom tobatú; Sia in sinimindog takin i Musa kon tampat tatua, bo nonangoi kon tangoi-Nea inta motusi, tuata in Tuhan.

⁶ Onda intua ki Tuhan sinumaḻib kon tayowon i Musa bo noguman, “Akuoi ki Tuhan, in ki Allah inta nopuḻing in pia in gina bo tabi. Tabi-Ku mobarong totok, Akuoi naa in motoḷutui bo diá ḷagi tumorú.

⁷ Umuranbí in Akuoi motabi kon ribuan buí bo mongampung kon taḷá bo dosa; táe intau inta kon dosa in diábí pomayá-Ku mako takin diá hukumon, bo hukumon-Ku doman in adí mita bain ompu modapot kon buí nogintoḷu bo noginggopat popisí in dosa in guyanga monia.”

⁸ Kon dodai doman tatua ki Musa dinumokó nosumba.

⁹ Gumannea, “Tuhan, aka totu-totuu kon ibog-Mu in akuoi, akuoi mopoigum, moibogdon ki Tuhan moyotakin nami. Bangusa tatua totuu kon motogat in gina, táe ampungaipa in raat bo dosa nami bo tarimadon kami mobaḻí umat-Mu tontaní.”

Dodandian sinoimbagudon bui

¹⁰ Ki Tuhan noguman kon i Musa, “Tanaa mako Akuoi momiadon kon dodandian takin bangusa Israel. Kon tayowon mata monia Akuoi mogaid kon inta mokoherang mita inta diápa dodai onda inaidan kon sigad in bangusa inta kon ondaka in kon dunia naa. Bayongan bangusa in mokoontong kon soaḷ mita mokoherang inta pomiaan-Ku, sin Akuoi, ki Tuhan in momiabí kon tobatú oaidan inta motoyang kon i monimu.

¹¹ Duduiaidon in hukum mita inta inogoi-Ku kon inimu singgai naa. Akuoi in moguntundon kon bangusa Amori, Kanaan, Het, Peris, Hewi bo Yebus kon dodai in moiko mayá moparang.

¹² Dika momia kon dodandian takin intau mita kon butá inta kobayáan monimu, sin tua in mobaḻídon poyogaḷap inta mokopopisí kon kopatoianmu.

¹³ Dá, dikadon mogaid kon natua, táe tokoumpagdon in mezbah mita monia, rimumudon in tugu mita karamat monia bo toko pupuḷdon in oigi mita i Asyera, berhala monia.

¹⁴ Dika mosumba kon ilah ibanea, sin Akuoi ki Tuhan, in Allah inta doí potongkaion in onukabí.

¹⁵ Dika momia kon dodandian takin bangusa kon butá tatua, sin kon dodai in mosia mosumba bo moposumba in kuruban kon ilah mita monia, mosia in monongganutbí kon i monimu, bo moiko in dumuduibí.

¹⁶ Aka ki adí mita monimu motonibuḷoi in bobay mita ango-angoi, yo mosia in dondouḷugandon in bobay mita tatua sinbá monaḷámaidon kon i-Nakó bo mosumbadon kon ilah mita monia.

¹⁷ Dika momia poḷat mosumba kon ilah mita inta pinomia nongkon logam.

¹⁸ Porameaidon in Singgai Moḷoben Roti Diá in Ragi. Ná inta ain pinarenta-Ku kon inimu, moiko in musti mokaan kon roti diá iragian kon bonu in pitu nosinggai kon buḷan Abib, sin kon bonu in buḷan tatuata moiko in nonaḷámai kon Mesir.

¹⁹ Bayongan adí ḷoḷaki inta guya-guyang bo bobiagon koḷakian inta muna pinogadí tua in Akuoibí in kitogi,

²⁰ táe moiko musti motobut kon ki adí in keledai inta muna pinogadí takin moposumba in ki adí in domba tobatú inta mobaḻí toḻiunea. Aka moiko doí motobut kon tua, yo sigogow in keledai tatua musti putoḷon monimu. Bayongan adí monimu ḷoḷaki guya-guyang musti tobuton monimu. Diá tobatúmai intau motaau mamangoi kon i-Nakó aka sia diá modia kon sosumba.

²¹ Onom nosinggai in pogaidan; dika mogaid kon singgai noginpitu, umpaka sempodon in ponononggobá ande sempo pobatunan kon bungai in boyó.

²² Porameaidon in Pesta Posipunan kon Boyó kon sempo in moiko mogamá kon bungai in gandum inta ḷontú. Porameaidon doman in Pesta Pondok Daun kon buit in taong, kon dodai in moiko mosipú kon bungai in ayop.

²³ Kotoḷu in totaong bayongan intau ḷoḷaki musti mamangoi mosumba kon i-Nakó, ki Tuhan Allah Israel.

²⁴ Naonda in mopaḷut mako Akuoi mopoguntun in bangusa mita nongkon tayowonmu bo dugangan-Kudon in kooḷad in butámu, diá tobatúmai intau in mobarani mogagow kon butámu kon dodai in moiko mayá sin morame kon Pesta Roti Diá in Ragi, Pesta Pobatunan kon Boyó bo Pesta Pondok Daun.

²⁵ Kon tungkuḷ in moiko moposumba in biag iratá, dika moposumba in onuka inta pinomia nomaké in ragi. Biag inta iratá inta pakéon pokuruban kon porayaan Paska musti kodaiton doḷom doman tua; diá motaau in tonggagatan dapot in mobangon monik.

²⁶ Pomuḷoi in taong moiko musti modia mayá kon Baḷoi i Tuhan Allahmu in bungai in boyómu inta ḷontú nongkon butámu. Tapú in ki adí in domba ande ki adí in bembé diábí motaau dungúon poyotakinon tubig in teté i inánea.”

²⁷ Ki Tuhan noguman kon i Musa, “Paisdon in tosingogon mita tatua, sin pinodoyon kon tosingogon tatua Akuoi momia kon dodandian takinmu bo takin bangusa Israel.”

²⁸ Opat nopuḷú nosinggai bo opat nopuḷú nogobii ki Musa nogutun kon tua noyotakin i Tuhan, bo kon bonu in wakutu tatua sia in diábí nongaa-ngaan diá doman nonginu-nginum. Tosingogon mita kon dodandian tatua, tuata in Parenta i Allah inta mopuḷú, pinaisnea kon batu pomomaisan.

Ki Musa nosiḻig nongkon Buḷud in Sinai

²⁹ Kon tungkuḷ in ki Musa nosiḻig nongkon Buḷud in Sinai kodia-dia in Parenta Mopuḷú tatua, pogotnea in nonindar sin sia ain nongonguman i Tuhan, táe ki Musa tontaní in diábí nonotaau kon pogotnea tua in nonindar.

³⁰ Ki Harun bo bayongan rayat nokoontong kon pogot i Musa nonindar, bo mosia moondok in dimiug kon inia.

³¹ Táe ki Musa in nogoiní kon i monia, dá ki Harun bo bayongan itoi monia in dinimiugdon kon inia, bo ki Musa nopoyaput in singog kon i monia.

³² Nopaḷut mako kon tua bayongan rayat Israel noyosipun iḻimibu kon inia, bo pinotaaudon i Musa kon i monia komintan in bayongan hukum inta inogoi i Tuhan kon inia kon tudu in Buḷud Sinai.

³³ Naonda in nopaḷut mako nongonguman monia, ki Musa nopogoḻingoi in kaeng kon pogotnea.

³⁴ Pomuḷoi in ki Musa tumuot kon bonu in Ḷoḷaigan i Tuhan sin mongonguman i Tuhan, kaeng tatua bukáneadon modapot in sia ḷumuaidon. Bo naonda in sia ḷumuai potaauneadon in koyow i Tuhan tatua kon bangusa Israel,

³⁵ bo inontong monia pogot i Musa nonindar. Dá inoḻingoianneadon bui in pogotnea modapot in sia tumuotdon bui sin moyosingogdon bui i Tuhan.