IḶUAIAN 33 - Alkitab Singog In Mongondow Masa In Tanaa

Intau Israel pinotabá i Tuhan nonaḷámai kon Buḷud in Sinai

¹ Bo ki Tuhan in noguman kon i Musa, “Taḷaaidon in tampat tanaa bo bayádon poyotakin in bangusa inta diniamu nongkon Mesir tatua mopobayá in butá inta pinodandi-Ku kon i Abraham, kon i Ishak bo kon i Yakub bo kon buí monia.

² Potabá-Kudon mangoi in malaekat tobatú sin modia kon i monimu. Untunon-Kubí in bangusa Kanaan, Amori, Het, Peris, Hewi bo Yebus.

³ Moiko in mayá kon butá inta mopia bo motoḷubú. Táe Akuoi in diábí dumudui kon i monimu, sinbá diá in moiko yopúon-Ku kon yuak in daḷan, sin moiko nion in bangusa inta motogat in gina.”

^4-6 Onda intua ki Tuhan nopotabá kon i Musa nopotaau in tosingogon tanaa kon bangusa Israel, “Moiko in bangusa inta motogat in gina. Aka Akuoi moyotakin monimu umpaka tongá motoyong, yo notantú bidon kon yopúon-Kudon komintan in moiko. Ḷongkutdon in bayongan ḷambámu, dá tantúon-Kudon onu in pomiaan-Ku kon i monimu.” Naonda in mosia nokodongog kon toboḷow i Tuhan tatua, norukorom totok in gina monia nádon intau inta bagu kinopatoian. Bo mosia in noḷongkutdon kon ḷambá monia. Dá naonda in nonaḷámaidon kon Buḷud in Sinai, bangusa in Israel diádon nomaké in ḷambá.

Ḷoḷaigan i Tuhan

⁷ Pomuḷoi mako, aka bangusa Israel mononḷoḷaigan, ki Musa mogamá kon Ḷoḷaigan bo posindogonnea koḻin yayúon nongkon ḷoḷaigan mita monia. Ḷoḷaigan tatua sinangoian Ḷoḷaigan i Tuhan, bo ki ine in moibog moigum kon tonggina i Tuhan, mayá intua.

⁸ Aka ki Musa mayá in Ḷoḷaigan tatua, yo intau mita Israel simindog kon tayowon ngara in ḷoḷaigan monia bo moḻiḻímai kon i Musa dapot in sia tumuot.

⁹ Naonda in ki Musa tumuot, moponagdon in oigi goḷom bo mogogai kon ngara in Ḷoḷaigan. Nongkon goḷom tatua ki Tuhan moyosingog takin i Musa.

¹⁰ Kon dodai intau Israel mokoontong kon oigi goḷom kon ngara in Ḷoḷaigan i Tuhan, mosia komintan simindog bo dumokó kon ngara in ḷoḷaigan monia tontaní.

¹¹ Ki Tuhan noyosingog i Musa noyogintayowan mako, ná intau noyosingog in yobayatnea. Nopaḷut mako kon tua ki Musa nobuidon kon ḷoḷaigannea. Táe ki Yosua ki adí i Nun, tayowmobiag tobatú inta motuḷungmai kon i Musa, umuranpa nogutun kon bonu in Ḷoḷaigan tatua.

Dandi Tuhan moḷukad kon umat-Nea

¹² Kon singgai tobatú ki Musa noguman kon i Tuhan, “Tuhan, Iko nopotabádon kon inakó modia kon bangusa tanaa mayá in butá inta pinodandi-Mu. Táe diábí pinoguman-Mu mongo ki ine in potabá-Mu motuḷung kon inakó. Tuhan, Iko noguman kon kinotaauan-Mu bo kinoibog-Mu in akuoi.

¹³ Aka natua, dá potaaudon kon inakó onu in tomayá-Mu, Tuhan, sinbá akuoi in motaau mogaid kon oaidan-Mu bo umuran moposanang kon gina-Mu. Torop domandon kon bangusa tanaa ain piniḻí-Mu nobaḻí kapunyaan-Mu.”

¹⁴ Ki Tuhan noguman, “Moiko in ḷukadan-Ku sinbá mokouḻí kon butá inta pinodandi-Ku.”

¹⁵ Tubag i Musa, “Aka ki Tuhan diá moyotakin nami, yo donaai potabá in kami monaḷámai kon tampat tanaa.

¹⁶ Naondabí in kotaauan intau kon kinoibog-Mu in akuoi bo bangusa tanaa aka Iko diá motuḷung kon inami? Aka ki Tuhan kotaki-takin nami yo tua in mopoyoposi kon inami takin bangusa mita ibanea kon dunia naa.”

¹⁷ Guman i Tuhan kon i Musa, “Onu in pinoigummu tatua duduian-Ku, sin kinotaauan-Ku in Iko bo kinoibog-Ku doman in iko.”

¹⁸ Bo ki Musa nopoigum, “Tuhan, poontongpa kon inakó in sindar kinoangoian-Mu.”

¹⁹ Tubag i Tuhan, “Akuoi in tumaḻib takin bayongan koagungan-Ku kon tayowonmu, sindaḷan mopotaau in tangoi-Ku inta motusi. Akuoi naa in ki Tuhan, bo Akuoi mopoontong in pia in gina bo tabi kon intau mita inta piniḻí-Ku.

²⁰ Pogot-Ku in diábí poontong-Ku kon inimu, sin diábí motaau intau in mokoontong kon i-Nakó, bo umuran mobiag.

²¹ Kon sí-Kumai naa oyúon in buḷud batu; iko motaaubí in simindog kon tua.

²² Kon dodai in sindar kinoangoian-Ku moitaḻib, iko pobonu-Ku kon bonu in bubú tobatú kon bonu in buḷud batu tatua bo oḻingoian-Kudon in ḻima-Ku dapot in Akuoi moitaḻibdon.

²³ Bo onda intua bingkuton-Kudon in ḻima-Ku sinbá iko mokoontongdon kon i-Nakó nongkon tumi, táe pogot-Ku in diábí ontongonmu.”