IḶUAIAN 30 - Alkitab Singog In Mongondow Masa In Tanaa

Mezbah pototubáan kon dupa

¹ Ki Tuhan noguman bui kon i Musa, “Pomiadon kon mezbah tobatú pototubáan kon dupa inta pomiaan nongkon kayu akasia.

² Pomia intua kotonggopaton; kobanat bo kooḷadnea tumpaḷa togogopat nopuḷú bo ḻima nosenti, bo koḷantudnea in siow nopuḷú nosenti. Kon sikunea opat pomiaaidon kon tungoi mita inta tobatúon in mezbah tatua.

³ Dotá in ḻimonikannea, poḷat doman in sínea opat bo tungoinea mita musti oḻitan in buḷawan taakan bo pinakéan in bongkow buḷawan in ḻibunea.

⁴ Pomia kon ḻingkit doyowa kon ḻimonag in bongkow kon sínea doyowa sin pogopod kon kayu pobobuḻigan kon mezbah tatua.

⁵ Tombuḻigan tatua musti pomiaan nongkon kayu akasia bo oḻitan in buḷawan.

⁶ Poukatdon in mezbah tatua kon dotá in ḷuai in toḻipoi inta kon tayowon in Poti Dodandian, kon tampat poyodungkuḷan-Ku takinmu.

⁷ Pomuḷoi in doḷo-doḷom kon dodai in ki Harun mamangoi sin moposadia in togá, musti in sia motubá kon dupa mobondu kon tudu in mezbah tatua.

⁸ Tua in musti pomiaannea doman kon dodai in sia mopoyongkit in togá wakutu in ḷoḷabungnea. Sosumba kamania tatua musti umurannea pomiaan dapot in adí bo ompu.

⁹ Donaai moposumba kon tudu in mezbah tatua in dupa inta pinoton, kuruban mahaḷuk ande kuruban oogoi; donaai doman mopobutak in kuruban tubig in anggur kon tudunea.

¹⁰ Komintan in totaong ki Harun musti mogaid kon upacara pondaritan kon mezbah takin mopopisik kon tungoi opat in dugú in biag inta pinokuruban sin pongampungan kon dosa. Tua in musti pomiaan pomuḷoi in taong dapot kon adí bo ompu. Mezbah tatua musti motusi komintan bo tongábí kon i-Nakó.”

Pajak in Ḷoḷaigan i Tuhan

¹¹ Ki Tuhan noguman kon i Musa,

¹² “Kon tungkuḷ in pinogiapan kon bangusa Israel, bayongan in ḷoḷaki musti moguboḻi kon i-Nakó in doit tobutan kon inia sinbá diá in sia kotugatan in bodito kon dodai in pogiapandon.

¹³ Bayongan intau inta iapondon kon pogiapan tatua musti moguboḻi podudui in boḻi inta ain sinantú kon Ḷoḷaigan-Ku mobaḻí salehe inta tongá poyaput kon i-Nakó.

¹⁴ Komintan intau inta iapon kon bonu in pogiapan tatua, ḷoḷaki inta umurdon doyowa nopuḷú notaong bo namonik, yo musti mobogoi in salehe sinondí tua.

¹⁵ Intau inta nooyúon dikabí moguboḻi kon moiḻiu kon tua, tongá intau inta nobogá in diábí doman motaau moguboḻi moonag nongkon tua kon tungkuḷ in mosia moguboḻi kon doit tobutan kon inia tontaní.

¹⁶ Gamádon in doit tatua nongkon bangusa Israel, bo pakédon kon popopandung kon poibadaan kon bonu in Ḷoḷaigan-Ku. Komintan tua in doitbí tobutan kon i monia tontaní, bo umuran-Kudon kotoropan in moḷukad kon i monia.”

Tampat in tubig ponondaritan

¹⁷ Ki Tuhan noguman kon i Musa,

¹⁸ “Pomiaai kon tampat in tubig ponondaritan tobatú nongkon porunggu bo aipnea in nongkon porunggu doman. Poukat in bak tatua kon sigad in Ḷoḷaigan bo mezbah, bo bonuaidon in tubig.

¹⁹ Tubig tatua pakéon kon i Harun bo kon i adínea mita sinbá mosia motaau mondarit kon ḻima bo sioḷ

^20-21 kon dodai in mosia diápa tumuot kon Ḷoḷaigan ande dimiug kon mezbah sin modia kon kuruban inta tubáan. Musti aidan monia intua sinbá diá ḻimodon. Atorang tatua musti umuran duduian monia bo in buí monia dapot in mononoi.”

Ḷana in upacara

²² Ki Tuhan noguman kon i Musa,

²³ “Pogamádon kon pododungú mita inta totok in mopia, onom nokilo in taḷong inta notontubig, toḷu nokilo in kayu manis, toḷu nokilo in túan mobondu, bo onom nokilo in kayu teja.

²⁴ Tua komintan simbangon podudui in simbangan inta pinaké kon Ḷoḷaigan-Ku. Dugangai doman in opat noliter ḷana zaitun,

²⁵ bo pomiadon kon ḷana pakéon kon upacara, inta kinaug ná ḷana mobondu.

²⁶ Pakédon in sampuran mita tatua poḷana kon Ḷoḷaigan-Ku, Poti Dodandian,

²⁷ meja bo bayongan touḷutnea, sioḷ in pototuduan kon togá bo touḷutnea, mezbah pototubáan kon dupa,

²⁸ mezbah pototuduan kon kuruban tubáan takin bayongan touḷutnea, bo tampat in tubig takin aipnea.

²⁹ Natua in pononondímu kon barang mita inta ogoi kon i-Nakó, sinbá komintan motusi. Onukabí in moitugat kon mezbah tatua musti posarakan kon i Tuhan, bo ki inekabí in moḻiai kon tua mobodito sin ropot in kototusinea.

³⁰ Toguḷuai in ḷana in ki Harun bo ki adínea mita sinbá mosia in duíondon imang inta mogaid kon oaidan-Ku.

³¹ Pogumandon kon bangusa Israel in naa: Naadon in mobaḻí ḷana pakéon kon upacara inta pakéon kon i-Nakó.

³² Ḷana tatua in diábí motaau pobutak kon intau mita biasa. Dika momia kon ḷana ná tatua takin momaké in sampuran natua doman. Ḷana tatua motusi, bo musti anggapon mobaḻí barang motusi.

³³ Intau inta momia kon ḷana ná tatua, ande pakéon kon intau inta deeman imang, yo sia tua in diá bidon poyoiapon umat-Ku.”

Dupa

³⁴ Ki Tuhan noguman kon i Musa, “Pogamádon kon tongonumai norupa in pododungú inta kobayongnea notongkai, inta puḷut in taḷong, kuḻit in ḷungká, puḷut in rasamala bo dupa inta mopia totok.

³⁵ Pakédon intua komintan pogaid mobaḻí dupa inta mobondu. Dugangai doman in simuton sinbá dupa tatua umuran momurni bo motaau pakéon posumba kon i-Nakó.

^36-37 Tosilai in dupa tatua musti dodokon korumomokon. Diadon intua kon Ḷoḷaigan-Ku bo potabudon intua kon tayowon in Poti Dodandian. Dupa tatua in musti baḻíon barang motusi inta tongá tondíon kon i-Nakó. Dika momia kon dupa inta pakéon monimu potongkai in ná pomomia kon dupa tatua.

³⁸ Ki ine in momia kon mobondu mita natua, diádon poyoiapon umat-Ku.”