IḶUAIAN 27 - Alkitab Singog In Mongondow Masa In Tanaa

Mezbah

¹ “Pomia in mezbah tobatú nongkon kayu akasia. Tonggopaton, kobanat bo kooḷadnea tumpaḷa doyowa nometer bo doyowa nopuḷú nosenti bo koḷantudnea in tometer bo toḷu nopuḷú nosenti.

² Kon sikunea mita kon ḻimonik musti pomiaan kon tungoi mita inta poyotobatúon in mezbah. Musti komintan oḻitan in porunggu.

³ Pomiaaidon kon rumping mita, sikop, palo mita, porok bo doḷuong. Komintan touḷut tatua musti pomiaan nongkon porunggu.

⁴ Pomiaaidon kon toḷatak nongkon porunggu bo ḷutudai in ḻingkit opat sin popobonuan in kayu pononombuḻigan kon sikunea opat kon dotá in ḻimonagnea.

⁵ Koḷantud in toḷatak kawa tatua in musti motombotak kon koḷantud in mezbah. Toḷatak kawa tatua musti pooḻit kon ḻimonag in mezbah.

⁶ Pomiaai kon kayu pononombuḻigan doyowa nongkon kayu akasia oḻitan in porunggu,

⁷ bo pobonu kon bonu in ḻingkit mita inta kon sí in mezbah posibotak kon dodai in mobuḻig kon mezbah tatua.

⁸ Pomiadon in mezbah tatua nongkon dopí bo tongguangai kon dotá in bonunea, podudui in tomayá inta poontong-Ku kon inimu kon buḷud tanaa.”

Tampat pooibadaan kon Ḷoḷaigan i Tuhan

⁹ “Pomiaaidon kon tampat pooibadaan kon ḻibu in Ḷoḷaigan-Ku inta sinondok in ḻeag nongkon kaeng moaḷus. Kon dotá in toḷatan, ḻeag tatua kobanatnea in 44 nometer,

¹⁰ pinopotogot kon oigi porunggu doyowa nopuḷú, inta komintan inaipan in porunggu, bo kokaud takin toyoyaudnea nongkon saḷaka.

¹¹ Pomia doman in natua kon dotá in utuan.

¹² Kon dotá in toyopan, ḻeag tatua kobanatnea in 22 nometer, takin oigi mopuḷú takin aipnea mopuḷú doman.

¹³ Kon dotá in pomukaan, inta sinon ḷoḻingkopan, kobanat in ḻeag tatua in 22 doman nometer.

^14-15 Kon dotá in koḷoigi bo koḷanan musti pakéan in ḻeag, tua komintan kobanatnea onom nometer bo onom nopuḷú nosenti takin oigi toḷu bo toḷu doman in aipnea.

¹⁶ Kon ḷoḻingkopnea mustibí oyúon in toḻipoi inta kobanatnea siow nometer, pomiaan nongkon kaeng moaḷus inta sinuji takin kaeng wol nobidu, nokamumu bo nopura, bo iḷambáan in siningkoi norupa-rupamai in batangannea. Kaeng toḻipoi in ḷoḻingkop tatua musti pobambé kon oigi opat bo aipnea in opat doman.

¹⁷ Bayonganan oigi inta kon ḻibumai in palas tatua musti poyo-poyotondoḷon momaké in tontoyaud saḷaka; kokaudnea musti pomiaan nongkon saḷaka bo aipnea nongkon porunggu.

¹⁸ Ḻeag kon ḻibumai in tampat pooibadaan tatua kobanatnea in 44 nometer, kooḷadnea in 22 nometer bo koḷantudnea in doyowa nometer bo doyowa nopuḷú nosenti. Ḻeag tatua in musti pomiaan nongkon kaeng moaḷus inta aipnea nongkon porunggu.

¹⁹ Bayongan touḷut inta pinaké kon bonu in Ḷoḷaigan, patok mita in Ḷoḷaigan bo ḻeagnea musti pomiaan nongkon porunggu.”

Pononompia kon togá

²⁰ “Pokidiaai intau in Israel in ḷana zaitun totokea bo inta totok in mopia sin ponugung kon togá inta kon bonu in Ḷoḷaigan-Ku sinbá motaaudon poyongkiton bo umuran doman moyongkit.

²¹ Ki Harun bo ki adínea mita musti umuran moindoi kon togá tatua nongkon ḷoḷabungnea dapot in doḷo-doḷom kon tampat inta koangoian-Ku, kon ḷuai in kaeng inta noibambé kon tayowon in Poti Dodandian. Parenta tatua in mobaḻí parenta inta mononoi kon intau in Israel bo kon bayongan in buí monia.”