IḶUAIAN 26 - Alkitab Singog In Mongondow Masa In Tanaa

Ḷoḷaigan i Tuhan

¹ “Pomiadon kon ḷoḷaigan Kon sigad in ḷoḷaigan mopuḷú tatua pomia doman kon i-Nakó in ḷoḷaigan inta nongkon kaeng linen moaḷus tatua, sujion takin kaeng wol nobidu, nokamumu bo nopura. Poposuji doman moyotakin in gambar in kerub.

² Kaeng mita tatua musti pongkóon kotongkaion in ukurannea, kobanatnea mopuḷú bodoyowá nometer bo kooḷadnea in doyowa nometer.

³ Ḻima nopongkó in kaeng tatua musti poyotampiton mobaḻí ḻeag tobatú, bo inta ḻima doman ibanea musti pomiaan doman natua.

⁴ Pomiaai kon tontoyaud nongkon kaeng nobidu kon bingkí in ḻeag doyowa tatua,

⁵ ḻima nopuḷú in tontoyaud kon ḻeag tobatú.

⁶ Pomiaai doman kon tongkaud nongkon buḷawan ḻima nopuḷú in kobayongnea sin popoyotondoḷan kon ḻeag doyowa tatua sinbá motaau potobatúon.

⁷ Atop in Ḷoḷaigan tatua yo pomiaai kon mopuḷú nopongkó in kaeng nongkon bubuḷ in bembé.

⁸ Ukurannea in musti kotongkaion, kobanatnea in mopuḷú botoḷú nometer bo kooḷadnea in doyowa nometer.

⁹ Ḻima nopongkó musti poyotampiton baḻíon ḻeag tobatú, bo onom nopongkó ibanea in musti pomiaan doman natua. Tondoḷnea inta noginggonom musti kopíon doyowa sinbá moioḻingoi kon dotá in muna in Ḷoḷaigan.

¹⁰ Pakéaidon in tontoyaud ḻima nopuḷú kon bingkí in ḻeag inta dungkuḷ bo tontoyaud inta ḻima nopuḷú kon bingkí in ḻeag inta nogindua.

¹¹ Pomiaaidon kon ḻima nopuḷú in tongkaud nongkon porunggu bo pokaud kon tontoyaud tatua sinbá ḻeag doyowa tatua motaau tobatúon mobaḻí atop in Ḷoḷaigan.

¹² Tongosilai in pongkóan kaeng inta ḻiunea tua in pogoḻingoi kon dotá in tumi in Ḷoḷaigan.

¹³ Ḻiu in kaeng inta kooḷadnea ḻima nopuḷú nosenti inta kinobobanat in Ḷoḷaigan musti pomayá mako moikoḷob mako kon sí in Ḷoḷaigan tatua.

¹⁴ Pomiaai doman kon doyowa in kokoḷob kon dotá in ḷuai in Ḷoḷaigan, tobatú in nongkon kuḻit in domba koḷakian inta binoréan in nopura bo tobatú doman in nongkon kuḻit inta moaḷus.

¹⁵ Pomiaai domandon kon tombaḷoi in Ḷoḷaigan tatua inta posindogon kotuḻidon, aidai nongkon kayu akasia.

¹⁶ Batúan in tombaḷoi koḷantudnea opat nometer bo kooḷadnea onom nopuḷú bo onom nosenti.

¹⁷ Kon batúan in tombaḷoi musti oyúon in patok togogapang, dapot tombaḷoi mita tatua motaau poyotondoḷon tobatú bo tobatú.

¹⁸ Kon dotá in toḷatan Ḷoḷaigan, pomiaaidon kon tombaḷoi doyowa nopuḷú,

¹⁹ takin opat nopuḷú in aipnea nongkon saḷaka, bo tododoyowa kon batúan ḻimonag in tombaḷoi ponukid kon patoknea doyowa.

²⁰ Kon dotá in utuan in Ḷoḷaigan, pomiaaidon kon doyowa nopuḷú in tombaḷoi

²¹ takin aipnea opat nopuḷú nongkon saḷaka, tumongo dodoyawa kon batúan in tombaḷoi.

²² Kon dotá in tumi in Ḷoḷaigan dotá in toyopan, pomiaai kon onom in tombaḷoi

²³ bo tombaḷoi doyowa kon sikunea mita.

²⁴ Tombaḷoi mita in sikunea tatua musti poyotondoḷon nongkon dotá in ḻimonagnea dapot kon ḻimonikannea. Tombaḷoi doyowa inta nopotonsiku kon sikunea tatua musti natua in pomomia.

²⁵ Dá nobaḻímai waḷu komintan in koantó in tombaḷoi tatua, bo mopuḷú bo onom in aipnea nongkon saḷaka, tododoyowa in kon ḻimonag in tombaḷoi.

²⁶ Pomiaai doman kon mopuḷú bo ḻima in kayu bandainea nongkon kayu akasia, toḷoḻima in kon sí tobatú in Ḷoḷaigan,

²⁷ ḻima in kon sínea ibanea, bo ḻima doman in kon sí in Ḷoḷaigan dotá in tumi inta kon dotá in toyopan.

²⁸ Kayu bandainea inta kon yuak musti popobandai potombotak in tombaḷoi in koḷantudnea, nongkon popod posipongkó in Ḷoḷaigan tatua.

²⁹ Tombaḷoi in Ḷoḷaigan bo kayu mita bandainea tatua musti oḻitan in buḷawan. Ḻingkit mita inta ponahang kon kayu mita tatua musti pomiaan nongkon buḷawan.

³⁰ Posindogdon in Ḷoḷaigan tatua podudui in tomayá inta pinoontong-Ku kon inimu kon tudu in buḷud tanaa.

³¹ Pomiaaidon kon kaeng toḻipoi in ḷoḻingkop tobatú nongkon kaeng moaḷus inta sinuji takin kaeng wol nobidu, nokamumu bo nopura. Sujidon in kaeng tatua takin gambar in kerub.

³² Pobambé in kaeng toḻipoi in ḷoḻingkop tatua kon oigi opat inta kayu akasia inta inoḻitan in buḷawan takin kokaud buḷawan inta pinoḻitú kon ḻimonik in aip saḷaka inta opat.

³³ Bo popobambédon in kaeng tatua kon ḻimonag in pipidan kokaud kon atop in Ḷoḷaigan. Kon tumi musti popoukat in Poti Dodandian inta pinobonuan kon batu inta pinomaisan kon hukum i Tuhan. Kaeng tatua nonigad kon Yuang Motusi nongkon Yuang Totok Motusi.

³⁴ Poukat in taḷob in Poti Dodandian tatua kon tudu in poti tatua.

³⁵ Meja pogogukatan kon sosumba musti tampaton kon ḷuai in Yuang Totok Motusi kon dotá in utuan, bo sioḷ in pototuduan kon togá in kon dotá in toḷatan kon bonu in Ḷoḷaigan tatua.

³⁶ Pomiaaidon kon toḻipoi inta pakéon kon ḷoḻingkop in Ḷoḷaigan, pomia nongkon kaeng moaḷus inta sinuji takin kaeng wol nobidu, nokamumu bo nopura, iḷambáan in borénea mita.

³⁷ Kon toḻipoi tatua musti pomiaan kon oigi ḻima nongkon kayu akasia inta inoḻitan in buḷawan bo pinoyoguput doman takin kokaud buḷawan ḻima. Pomiaai doman aip ḻima nongkon porunggu kon batúan in oigi mita tatua.”